"მაშინ პუტინმა დამირეკა და მითხრა, რაც მოხდა, მოხდა, მაგრამ..."
07-08-2018
"მაშინ პუტინმა დამირეკა და მითხრა, რაც მოხდა, მოხდა, მაგრამ..."
ეს ომი არ დაწყებულა 2008 წელს, ეს ომი დაიწყო 1989 წლის 9 აპრილს, გაგრძელდა ცხინვალის კონფლიქტით, შემდეგ აფხაზეთის ფართომასშტაბიანი ომით, სადაც რუსეთმა მოახერხა და 500 000-მდე აფხაზეთის მკვიდრი აფხაზეთის ტერიტორიიდან გააძევა და აფხაზეთზე ჩაიგდო ხელში კონტროლი, - ამის შესახებ საქართველოს მესამე პრეზიდენტმა, მიხეილ სააკაშვილმა აგვისტოს ომის 10 წლისთავთან დაკავშირებით "ფეისბუქში" გავრცელებულ ვიდეომიმართვაში განაცხადა.

მისი თქმით, რუსეთი საქართველოს არსებობას 2003 წლამდე "ითმენდა", რადგან საქართველო არშემდგარი სახელმწიფო იყო, თუმცა "ვარდების რევოლუციის" შემდეგ
ვითარება შეიცვალა. ამასთან, სააკაშვილის თქმით, აჭარის დაბრუნების შემდეგ, მას რუსეთის პრეზიდენტმა, ვლადიმერ პუტინმა დაურეკა და უთხრა, რომ მომავალში "არანაირი საჩუქრები აღარ იქნებოდა".

"2018 წლის 7 აგვისტოს სრულდება 10 წელი რუსეთ-საქართველოს ფართომასშტაბიანი ომის დაწყებიდან. ეს იყო ძალიან მძიმე, ტრაგიკული და ამავე დროს ძალიან გმირული მომენტი ჩვენი
ისტორიის. მე მინდა, დღეს რამდენიმე საკითხზე გესაუბროთ, რომელიც ძალიან მნიშვნელოვანია. პირველ რიგში ვთქვათ, რომ ეს ომი არ დაწყებულა 2008 წელს, ეს ომი დაიწყო 1989 წლის 9 აპრილს, გაგრძელდა ცხინვალის კონფლიქტით, შემდეგ აფხაზეთის ფართომასშტაბიანი ომით, სადაც რუსეთმა მოახერხა და 500 000-მდე აფხაზეთის მკვიდრი აფხაზეთის ტერიტორიიდან გააძევა და აფხაზეთზე ჩაიგდო ხელში კონტროლი, შემდეგ ეს გრძელდებოდა ძალიან ბევრ პროვოკაციაში, მაგრამ 2003 წლამდე რუსეთი საქართველოს არსებობას ითმენდა, რადგან საქართველო არშემდგარი სახელმწიფო იყო. ეს იყო ტერიტორია, სადაც იყო კორუფცია, კონტრაბანდა, ხალხი იყო უკიდურესად იმედგაცრუებული და ამიტომ რუსეთს განსაკუთრებული ქმედებების განხორციელება არ სჭირდებოდა, 2003 წელს მოხდა "ვარდების რევოლუცია", 2004 წლიდან დაიწყო რეფორმები, რომელმაც მართლა აღაფრთოვანა თანდათან მთელი მსოფლიო და 2004 წელს ჩვენ კონტროლი დავიბრუნეთ აჭარაზე, ტერიტორიაზე, რომელსაც მთლიანად რუსეთი აკონტროლებდა. ეს იყო პირველი შემთხვევა საბჭოთა კავშირის დაშლის დროიდან, როდესაც რუსეთს ვიღაცამ ტერიტორია წაართვა და მაშინ მე პუტინმა დამირეკა და მითხრა, რაც მოხდა, მოხდა, მაგრამ ამის მერე იცოდე, სამხრეთ ოსეთსა და აფხაზეთში არანაირი საჩუქრები ჩვენგან არ გექნებათ და მან დაიწყო ფართომასშტაბიანი კონფლიქტისთვის მზადება", - განაცხადა სააკაშვილმა ვიდეომიმართვაში.

იხილეთ ვიდეომიმართვა
ალექს
08 აგვისტო 2018 07:16
რუსეთს ომი 200 წლით ადრე რომ აქვს დაწყებული ვიცით ,მაგრამ საქართველოს შენც ეომე მიშა,მტრის წისქვილზე ასხი წყალი ,ერს აყარე ნაცარი ,ის პოლიტიკურ ეკონომიკური მოდელი და ადმინისტრირების ინსტრუმენეტები შენ რომ ძალმომრეობით დაამკვიდრე ამ ქვეყანაში , იყო სწორედ ომის ამგვარად წარმართვის და ოკუპაციით დამთავრების ,საერთაშორისო მხარდაჭერის ეპიზოდურობის და არათანმიმდევრულობის მიზეზი ,დიახ ,მათი უმეტესობის აზრით 2008 წლის აგვისტოში დიდი და პატარა დიქტატურა დაეტაკნენ ერთმანეთს და არა ცივილურს უცივილიზაციო,სამართლიანს უსამართლო ,ანუ ომის ეს ეპიზოდი წინასწარ წააგე შენი უგუნური და თავკერძა უპრინციპო სულსწრაფი უმწიფარი ქმედებებით 1996-2008 წლებში ,კანონირების უკანონობით "აღდგენით",ერის გახლეჩვით ნაცმოდ და დანარჩენებად,ასე ომებს ვერ იგებენ,იმიტომ წაგვაგებინე ეს ეპიზოდი ,ამ მრავაალასწლოვან ომში კი ჯერჯერობით მატერიალურად კი ვაგებთ ,მაგრამ მოვიგებთ,როგორც ადრე და ყოველთვის მოგვიგია ,ეს მიწა ღმერთმა ჩვენ მოგვცა და არავის დავუთმობთ,შლეგებს აღარ ვამართინებთ ,გმირებს კი !

რედაქტორის რჩევით
რუბრიკის სხვა სიახლეები