გია ხუხაშვილი: "მგონია, რომ ვიღაცები უჩა მამაცაშვილის სახელს იყენებენ"
"ვერ ვხედავ "ქართულ ოცნებაში" ვერავის, ვინც ლიდერის ფუნქცია შეიძინა. პირიქით, სრული დეგრადაციაა"
"გამოვრიცხავ, რომ ლევან ყიფიანს უჩა მამაცაშვილთან ამ თემაზე თუნდაც ირიბად ოდესმე ელაპარაკა. უფრო მეტიც, მგონია, რომ ვიღაც ან ვიღაცები იყენებენ მის სახელს პირადი გამორჩენის და მათ შორის, პოლიტიკური მიზნითაც"
ვინ არიან გავლენიანი დაჯგუფებები მმართველ პარტიაში და რა გადაწყვეტილებები თუ ფაქტები უკავშირდება ამ ჯგუფებს, ამ საკითხებზე "კვირის პალიტრა" გია ხუხაშვილს ესაუბრა, რომელთანაც პირველი კითხვა "ქართული ოცნების" მხარდაჭერილი პრეზიდენტობის კანდიდატის მორიგ განცხადებას ეხება, რამაც საზოგადოების ხმაურიანი პროტესტი გამოიწვია:
- ეს არ იყო ამ მიმართულებით გაკეთებული პირველი განცხადება. მასში შეიძლება რაღაც გაიზიარო, თუნდაც ის, რომ მაშინდელი ხელისუფლება პროვოკაციას წამოეგო და ა.შ., მაგრამ პრობლემა ის არის, რომ როდესაც სახელმწიფო მოღვაწე საუბრობს ასეთ თემებზე, თან ამ დროს სასამართლო პროცესები მიმდინარეობს საერთაშორისო სასამართლოებში, მისი ნათქვამი შესაძლებელია სახელმწიფოს მოწინააღმდეგე მხარემ თავის სასარგებლოდ გამოიყენოს. ეს უკვე, ფაქტობრივად, საბოტაჟის ტოლფასია. სამწუხაროდ, ჰააგაში იქნება თუ სტრასბურგში, სალომე ზურაბიშვილის განცხადებებს რუსეთი აუცილებლად ჩასჭიდებს ხელს. მით უმეტეს, თუკი ის პრეზიდენტი გახდება, ეს სერიოზულ სახელმწიფოებრივ უხერხულობას შექმნის, მნიშვნელობა არა აქვს, ის სიმართლეს ამბობს თუ არა. უმარტივესი პრინციპია - ისეთი რამ არ უნდა თქვა, რაც შენს სახელმწიფოს დააზარალებს საერთაშორისო არენაზე.
- სწორედ ამის გამო საზოგადოების ნაწილის აზრით, ის ამ განცხადებებს მიზანმიმართულად რუსეთის სასარგებლოდ აკეთებს, კრემლის დავალებას ასრულებს. თქვენ როგორ ფიქრობთ? - მის ამ საქციელს მე უფრო სიბრიყვეს დავარქმევდი და ძალიან მდარე გაგებას იმისა, სად მთავრდება ვიწროპოლიტიკური ინტერესი, სად იწყება სახელმწიფოებრივი და რა არის პრიორიტეტი. შესაძლოა პოლიტიკურად ის თვლის, რომ ეს განცხადებები თუ ანტიმიშისტური ნარატივი მისთვის სასარგებლოა, სხვა საკითხია, მართალია თუ არა, მაგრამ ეს ნარატივი უნდა მთავრდებოდეს იქ, სადაც იწყება სახელმწიფო ინტერესი. ფაქტობრივად, მან საკუთარი პოლიტიკური გემოვნების საკითხი დააყენა სახელმწიფო ინტერესზე მაღლა, რითაც აჩვენა, რომ ის არა სახელმწიფო მოღვაწე, არამედ პოლიტიკური მანიპულატორია, ცუდი თუ კარგი, დასკვნა საზოგადოებას მივანდოთ.
- როგორ ფიქრობთ, ზურაბიშვილის მხარდაჭერას ხელისუფლებაში დაჯგუფებების არსებობამ რამდენად შეუწყო ხელი? - რაც უნდა გასაკვირი იყოს, ამან გარკვეულწილად გავლენა ნამდვილად იქონია. ერთ-ერთი არგუმენტი, რის გამოც მასზე შეაჩერეს არჩევანი, ის არის, რომ "ქართული ოცნების" სხვადასხვა ჯგუფს ჰყავდა თავისი ფავორიტები, რომელთაც ლობირებდნენ, და რომელიმე მათგანზე აქცენტის გაკეთება ბალანსის დარღვევა იქნებოდა. აქედან გამომდინარე, "გარე" კანდიდატი ამ პრობლემას ხსნიდა.
ჯერ ერთი, რატომ წარადგინა "ქართული ოცნების" გენერალურმა მდივანმა დამოუკიდებელი კანდიდატი, ცოტა არ იყოს, გაუგებარია, მაგრამ ამის გარდა, სწორედ ამ წარდგენაზე ზურაბიშვილმა თქვა, მოდის იმიტომ, რომ "ქაჯები დაითხოვოს". არსებულ ინსტიტუტებს დღეს "ქართული ოცნება" აკონტროლებს და ვის დათხოვნას გულისხმობდა? ეს მეტყველებს იმაზე, რომ მას ეს ფრაზა ძალიან მოსწონს, ამით პოლიტიკური კეკლუცობა უნდა, მაგრამ აბსოლუტურად უადგილოდ იყენებს და ეს მის არცთუ მაღალ ინტელექტზე მეტყველებს. სხვა საკითხია, ხომ არ იყო ეს ქვეცნობიერი გამოძახილი, რომ "ქართული ოცნების" შემადგენლობას მართლაც როგორც ქაჯებს, ისე უყურებს და მათ დათხოვნას გულისხმობს. დამრჩა შთაბეჭდილება, რომ მას ქვეცნობიერმა ათქმევინა ის, რასაც მალავს.
სასაცილო კი ის არის, რომ ახლა ეს ქაჯები, როგორც მათ ზურაბიშვილი მოიხსენიებს, უნდა დადგნენ და მისი კამპანია ატარონ და პრეზიდენტად დასვან.
- დაჯგუფებები ვახსენეთ და ამ კვირის განმავლობაში ეს დაჯგუფებები ძალიან ბევრ კონტექსტში გამოჩნდა, იმავე ტელეკომპანია "იბერიის" საქმეზე, მარიხუანის ექსპორტის საკითხზე და ა.შ. რეალურად რა დაჯგუფებებია ივანიშვილის გარშემო თუ ხელისუფლებაში და ვინ რომელ სფეროს აკონტროლებს?
- "ქართული ოცნება" არ არის პარტია. პარტია დგას ერთიან იდეოლოგიაზე, ერთიან ფასეულობაზე, განვითარების ერთიან სისტემაზე, "ოცნება" კი აბსოლუტურად ეკლექტურია, ერთმანეთი ეზიზღებათ და აერთიანებთ მხოლოდ ერთი რამ - ბიძინა ივანიშვილის რესურსებზე პარაზიტირება. ივანიშვილი რომ გამოეცალოთ, ერთმანეთს დაჭამენ და ეს უკვე ვნახეთ. რატომ გახდა ივანიშვილი იძულებული, დაბრუნებულიყო პარტიის თავმჯდომარედ? იმიტომ, რომ დაინახა, პარტია ხუხულასავით იშლებოდა.
- ეს დაჯგუფებები ივანიშვილს როგორ უკავშირდებიან? ყველას თავისი ლობისტი ჰყავს? - ივანიშვილთან პირდაპირი კავშირი პრაქტიკულად არ არსებობს. ივანიშვილი სადღაც არსებობს, ისევე როგორც ეკლესიაში ხალხი რომ დადის და ნიშანს ელოდება. ასე არიან ესენიც. მათთვის ივანიშვილის რესურსებზე პარაზიტირება გარკვეულწილად რელიგიად იქცა.
- გადაწყვეტილების მიმღები ჯგუფი რომელია? - გადაწყვეტილების მიღების პროცესი "ქართულ ოცნებაში" მთლიანად დარღვეულია, არ არის ფორმალიზებული, ამის ალგორითმი არ არსებობს. სალომე ზურაბიშვილის კანდიდატურისთვის მხარდაჭერაც ზუსტად ამაზე მეტყველებს - ეს იყო აბსოლუტურად სპონტანური, გაუაზრებელი, გაუთვლელი გადაწყვეტილება, რომელმაც გაფუჭებული ტელეფონის პრინციპით იმუშავა.
- მარიხუანის ექსპორტის შესახებ ხელისუფლების ინიციატივის უკან რომელიმე დაჯგუფება დგას? - არ ვიცი, მაგრამ ფაქტია, რომ აშკარად ლობირებული თემაა. როდესაც ეკონომიკაში ვერ ხერხდება რეალური სექტორის განვითარება, იძულებული ხარ, ყველაფერს მოეპოტინო, რასაც შემოგთავაზებენ, და ოქროს კოშკებს აგიგებენ. ერთ-ერთი ასეთი ოქროს კოშკია ეს ბიზნესიც. ფაქტია, რომ სწორედ ეკონომიკურ ეფექტზე ლაპარაკობენ და ეს ხსნის სწორედ იმას, რაც მკითხეთ.
- უჩა მამაცაშვილის სახელმა გაიჟღერა "ომეგა ჯგუფისა" და "იბერიის" სკანდალში. თქვენ რა ინფორმაცია გაქვთ, ეს ადამიანია, ვინც ყველა თემას "აგვარებს"? - ივანიშვილის მასშტაბი უნდა ვიცოდეთ. ეს იმდენად წვრილმანია, რომ არ შეიძლება მისთვის ეს ბიზნესი საინტერესო იყოს. თუმცა რაღაც ჯგუფი რომ არსებობს, რომელიც ამას ლობირებს, მეც მაქვს ეჭვი. მამაცაშვილსაც გამოვრიცხავ, რადგან ის ამის ლობირებას ივანიშვილის გარეშე ვერ გაბედავდა. აქედან გამომდინარე, არის ვიღაც მესამე, ვინც ნამდვილად არ ვიცი, ვინ არის, მაგრამ ფაქტია, არის.
- მამაცაშვილის როლი "იბერიასთან" დაკავშირებით? - ვფიქრობ, მამაცაშვილი ამ თაღლითური ტექნოლოგიების მსხვერპლია. მე მას კარგად ვიცნობ და მისგან მაფიოზის დახატვა, რბილად რომ ვთქვათ, გადაჭარბებულია.
ის ძალიან წესიერი და ფრთხილი ადამიანია. რაც შეეხება "იბერიასთან" დაკავშირებულ ჩანაწერს, ვფიქრობ, ეს წმინდა წყლის თაღლითობაა, რადგან გამოვრიცხავ, რომ ლევან ყიფიანს უჩა მამაცაშვილთან ამ თემაზე თუნდაც ირიბად ოდესმე ელაპარაკა. უფრო მეტიც, მგონია, რომ ვიღაც ან ვიღაცები იყენებენ მის სახელს პირადი გამორჩენის და მათ შორის, პოლიტიკური მიზნითაც.
- მისი როლი გადაწყვეტილების მიღებისას ივანიშვილის გვერდით როგორია? - ის მისი ოჯახის წევრია, ერთად არიან გაზრდილები და ივანიშვილი ძალიან ენდობა. უჩა მამაცაშვილი არის აბსოლუტურად აპოლიტიკური ადამიანი, მაგრამ ფაქტია, რომ მას იყენებენ ისინი, რომლებიც თვლიან, რომ დიდი დამსახურება აქვთ "ქართული ოცნების" წინაშე, ფული ვერ იშოვეს, ამის გამო დაჩაგრული არიან, თანაც მათი ავტორიტეტი არ არის ისეთი მაღალი, რომ რამეში გამოადგეთ, ამიტომ იყენებენ ვიღაცის სახელს საკუთარი მიზნებისთვის.
არიან ჯგუფები, რომლებსაც აქვს მოკლე და გრძელვადიანი ამოცანები. არიან ისეთი ჯგუფებიც, რომლებიც უკვე პოსტივანიშვილის პერიოდისთვის ემზადებიან, მაგრამ ვერ ვიტყვი, რომ ეს გამოსდით. ვერ ვხედავ "ქართულ ოცნებაში" ვერავის, ვინც ლიდერის ფუნქცია შეიძინა. პირიქით, სრული დეგრადაციაა. ერთადერთი, ვინც ამას აქტიურად ცდილობდა, დღესაც ცდილობს და ჩემი აზრით, ძალიან ცუდად გამოსდის, კახა კალაძე და მისი ჯგუფი არიან. თუმცა ყველაზე სერიოზული ჩანს მაინც კალაძის ჯგუფი, მაგრამ, ჩემი აზრით, მას არა აქვს განვითარების პოტენციალი, კრიზისულ მომენტში ეფექტიანად სამოქმედო რესურსი არ გააჩნია და ეს გამოჩნდა უკვე თუნდაც ზურაბიშვილის კანდიდატურის მხარდაჭერით.
- როგორ ფიქრობთ, მიზანმიმართულად ხომ არ წარადგენინეს სალომე ზურაბიშვილი სწორედ კალაძეს? - შესაძლებელია.
- ივანიშვილმა? - ალბათ.
რუსა მაჩაიძე