ალექსეი ტოკარევი: "მე კრემლის პროპაგანდისტად მიგაჩნივართ თუ რბილი ძალა ვარ?" - კვირის პალიტრა

ალექსეი ტოკარევი: "მე კრემლის პროპაგანდისტად მიგაჩნივართ თუ რბილი ძალა ვარ?"

ინტერვიუ რუს ექსპერტთან, რომელიც საქართველოში არ შემოუშვეს

"მე რუსი ვარ და ეს უზარმაზარი ტრაგედიაა ჩემი ხალხისთვის, რომელიც მან დაანაკუწა"

თვის დამდეგს საზოგადოების განხილვის თემად იქცა თბილისში რუსეთის საპრეზიდენტო ფონდის დაფინანსებით გამართული ფორუმი - საზოგადოების დიდმა ნაწილმა ღონისძიება კრემლის პროპაგანდის იარაღად მიიჩნია. არანაკლები აჟიოტაჟი მოჰყვა სამი რუსი გამომსვლელის საქართველოში არშემოშვებასაც - როგორც შსს აცხადებს, "ოკუპირებული ტერიტორიების შესახებ" კანონის დარღვევის გამო. სამთაგან" ერთ-ერთი, რუსი პოლიტოლოგი და მოსკოვის საერთაშორისო მეცნიერებათა სახელმწიფო ინსტიტუტის მეცნიერი თანამშრომელი ალექსეი ტოკარევი, აცხადებდა, რომ საქართველოში მხოლოდ იმიტომ არ შემოუშვეს, რომ აერიათ ნტვ-ს ჟურნალისტში, რომელიც მისი სეხნია აღმოჩნდა. "კვირის პალიტრა" შეეცადა თავად ტოკარევთან გაერკვია სიმართლე.

- პირველ რიგში, იცოდით თუ არა, სად მოდიოდით? ეს ფორუმი დაფინანსდა რუსული ფულით, მეტიც, რუსეთის საპრეზიდენტო ფონდმა დააფინანსა და რუსი გამომსვლელების ნაწილი გამოირჩეოდა იმით, რომ კრემლის პოლიტიკას უჭერდნენ მხარს. ფორუმის ქართველი ორგანიზატორებიც არ აღიქმებიან საქართველოში ნეიტრალურ ექსპერტებად.

- რა თქმა უნდა, ვიცოდი, რომ ფორუმს რუსეთის საპრეზიდენტო ფონდი აფინანსებდა. მე ფონდთან არანაირი კავშირი არა მაქვს, მე მოსკოვის სახელმწიფო საერთაშორისო ურთიერთობების ინსტიტუტს, МГИМО-ს მეცნიერი თანამშრომელი ვარ. ფონდი არავის აიძულებს, კრემლის სასარგებლოდ ისაუბროს. ფონდის ფული იხარჯება ფრენებზე, სასტუმროსა და მსგავს ორგანიზაციულ საკითხებზე, მაგრამ არავის აძლევენ მითითებას, რა თქვას და რა არა. ამით იმის თქმა მინდა, რომ ფონდი ანტიქართულ პროპაგანდას არ ეწევა. მეორე საკითხი - დიახ, ჩემი კოლეგების ნაწილი იზიარებს კრემლის შეხედულებებს, მაგრამ, ჩემი აზრით, ჟურნალისტიკა - რაზეც ჩვენ საუბარს ვაპირებდით - იძლევა იმის საშუალებას, რომ განსხვავებულ აზრს მოვუსმინოთ. ვფიქრობდი, რომ მედიის ქართველ წარმომადგენლებთან სწორედ ამაზე გვექნებოდა დისკუსია. არ მიმაჩნია, რომ ეს ღონისძიება კრემლის პოლიტიკის რუპორად უნდა ქცეულიყო.

- ანუ იმედოვნებდით, რომ შედგებოდა დისკუსია, მაგრამ დისკუსია შეიძლება გაიმართოს ისეთ მხარეებს შორის, რომლებსაც საპირისპირო ან თუნდაც განსხვავებული პოზიციები აქვთ. ამ ფორუმზე კი იყვნენ ე.წ. ხისტი და რბილი პროპაგანდისტები, რომლებიც მაინც კრემლის პოლიტიკას ახმოვანებდნენ.

- შეიძლება კითხვა შემოგიბრუნოთ? თქვენ როგორ მიგაჩნიათ, მე კრემლის ე.წ. ხისტ პროპაგანდისტებს მივეკუთვნები თუ რბილი ძალა ვარ?

- ამის გარკვევა ადვილად შეიძლება. ბანალურ შეკითხვას დაგისვამთ - რას ფიქრობთ რუსეთის პოლიტიკაზე აფხაზეთსა და სამაჩაბლოში?

- სამაჩაბლო ანუ ცხინვალის რეგიონი, სამხრეთი ოსეთი ხომ?

- ჩვენ ამ რეგიონს ასე ვუწოდებთ.

- ძალიან ბევრი საკითხია, რაშიც კრემლს არ ვეთანხმები.

- მოდი, ამ საკითხებს მერე ჩავუღრმავდეთ, მანამდე კი პირდაპირ მიპასუხეთ...

- თუ ნებას მომცემთ, ისე გიპასუხებთ, როგორც საჭიროდ ჩავთვლი.

- უარყოფითად თუ დადებითად?

- თქვენ გინდათ პროკრუსტეს სარეცელზე გამჭიმოთ, მე კი მინდა ისე გიპასუხოთ, როგორც საჭიროდ მიმაჩნია. შეგიძლიათ ამისთვის ნახევარი წუთი მომცეთ, რომ აგიხსნათ?

ალექსეი ტოკარევი

- ბრძანეთ.

- არსებობს ბევრი საკითხი, რის გამოც ამ პოლიტიკას ვაკრიტიკებთ. მე, ისევე როგორც სხვა ექსპერტები, მაგალითად, სერგეი მარკედონოვი, ნიკოლაი სილაევი, ანდრეი სუშენცოვი - ჩვენ, ყველანი, ადეკვატური ხალხი ვართ და საქართველოს თემას ვიკვლევთ და ამ პოლიტიკას კრიტიკულად განვიხილავთ. იმის წარმოდგენა კი, რომ მე, МГИМО-ს მეცნიერი თანამშრომელი, მიტინგზე გამოვალ და დავიწყებ ყვირილს, რუსეთი პუტინის გარეშე, კრემლი გვატყუებს-მეთქი, სრული სისულელეა. ჩვენ ვაკრიტიკებთ იმას, რაც არ მოგვწონს ჩვენთვის მისაღები ფორმებით. მე ვერ გეტყვით, რომ სრულად ვუჭერ მხარს კრემლის პოლიტიკას ამ რეგიონებში, პირიქით, მაქვს კრიტიკული მოსაზრებები და რჩევები, როგორ ჯობია ეს პოლიტიკა გატარდეს.

- ქართველ ხალხს აინტერესებს მხოლოდ ერთი რამ - თქვენ პირადად მიგაჩნიათ, რომ რუსეთმა ოკუპაცია მოახდინა?

- ვფიქრობ, აქ საქმე გვაქვს რუსეთის მიერ ორი დამოუკიდებელი სახელმწიფოს აღიარებასთან და ეს მოხდა საომარი კონფლიქტებისა და მას შემდეგ, რაც 25 წლის განმავლობაში რუსეთი განუხრელად უჭერდა მხარს საქართველოს სუვერენიტეტს. ოკუპაციას ამას ვერ ვუწოდებ. თუ იმის გამო, რომ ტერმინ "ოკუპაციას" არ ვეთანხმები, და ხაზს ვუსვამ, რომ რუსეთმა აფხაზეთი აღიარა საქართველოს სუვერენიტეტის 25-წლიანი უშედეგო მხარდაჭერის შემდეგ, აფხაზეთის ბლოკადის შემდეგ, მხოლოდ მას შემდეგ, რაც ამას კიდევ ერთი საომარი კონფლიქტი მოჰყვა, თუ ეს ყველაფერი კრემლის პროპაგანდისტად მაქცევს, მაშინ თანახმა ვარ - წარმადგინეთ როგორც კრემლის პროპაგანდის გამავრცელებელი.

- ქართული სუვერენიტეტის 25-წლიანი მხარდაჭერა რუსეთისაგან? ამას სერიოზულად ამბობთ?

- რა თქმა უნდა. 1991-დან 2008 წლამდე რუსეთის ყველა ოფიციალური წარმომადგენელი პირი ადასტურებდა, რომ აღიარებდნენ საქართველოს სუვერენიტეტს ამ ტერიტორიებზე.

- და, ფიქრობთ, რომ რუსეთმა ყველაფერი გააკეთა ქართული სუვერენიტეტის შესანარჩუნებლად ამ რეგიონებში, არა? არ ფიქრობთ, რომ ის, რასაც რეალურად აკეთებდა რუსეთი, სწორედ ქართულ სუვერენიტეტს უთხრიდა ძირს?

- ჩვენთან პრეტენზიები არსებობს, მაგალითად, იმაზე, რომ პასპორტები დავარიგეთ, და ეს ნახსენებია ტალიავინის ანგარიშშიც, როგორც ერთ-ერთი ფაქტორი, რამაც კონფლიქტის გაღვივებას შეუწყო ხელი. მეორე მხრივ, დიახ, ჩვენ მხარს ვუჭერდით ქართულ სუვერენიტეტს - ამის მაგალითია აფხაზეთის ბლოკადა. ეს შავ ლაქად რჩება რუსულ-აფხაზურ ურთიერთობებში. ამას გარდა, რუსეთმა იტვირთა ჭეშმარიტი მშვიდობისმყოფლის ფუნქცია და იქ განთავსდნენ რუსი მშვიდობისდამცველი დანაყოფები. მახსოვს ფოტო, რომელზეც პრეზიდენტ ელცინს ხელი აქვს ჩაკიდებული როგორც პრეზიდენტ შევარდნაძისთვის, ასევე პრეზიდენტ არძინბასთვის და ვფიქრობ, ეს ძალიან სიმბოლური, ძლიერი დატვირთვის მქონე ფოტოა. ამას გარდა: რუსეთი იყო მოდერატორი ძალაუფლების გადაცემის პროცესში "ვარდების რევოლუციის" დროს, სწორედ იგორ ივანოვმა, რუსეთის საგარეო საქმეთა მინისტრმა, დასვა ერთ მაგიდასთან, ერთი მხრივ, სააკაშვილი, ჟვანია და ბურჯანაძე, მეორე მხრივ კი შევარდნაძე. ივანოვი ქართული სახელმწიფოებრიობისთვის იღვწოდა, როდესაც მასთან ერთად მოსკოვში გაფრინდა ასლან აბაშიძე - სწორედ რუსეთმა შეუწყო ხელი ქართული სუვერენიტეტის განმტკიცებას აჭარაში -იმ დროს აჭარა, ფაქტობრივად, არა რეგიონი, არამედ სათავადო იყო.

- უნდა შეგაწყვეტინოთ, თორემ მალე იმასაც განაცხადებთ, რომ "ვარდების რევოლუციაც" და აჭარიდან აბაშიძის გაძევებაც რუსეთის მიერ იყო ორკესტრირებული და ამისთვის დიდი მადლობა უნდა გითხრათ. იმდენ რამეში არ გეთანხმებით, რომ თუ თითოეულ თქვენს თეზისზე შევჩერდით, ამას რამდენიმე საგაზეთო წერილი დასჭირდება. მაგრამ ერთი და უმთავრესი: თქვენ აცხადებთ, რომ რუსეთი მშვიდობისმყოფელი და მოდერატორი იყო ამ საკითხებში - მინდა გითხრათ, რომ ნებისმიერი ადეკვატური ქართველი და მეტიც, მთელი განვითარებული მსოფლიო რუსეთს არა მოდერატორად, არამედ არქიტექტორად მიიჩნევს იმ ტრაგიკული პროცესებისა, რაც ამ რეგიონებში მოხდა... და ვფიქრობ, თუ ადამიანი რუსეთს ამ რეგიონში მშვიდობისმყოფლად მიიჩნევს, მაშინ მასთან დისკუსია არ ღირს, ამიტომ სხვა თემაზე გადავიდეთ. რას ფიქრობთ ფორუმის ერთ-ერთი მთავარი სპიკერის, ბატონი მალაშენკოს ფრაზაზე, სადაც მან თქვენი და თქვენი კოლეგების დეპორტაციის ინციდენტს საბჭოთა პროვინციალიზმი უწოდა?

- საქართველო სუვერენული ქვეყანაა და სრული უფლება აქვს, ვინც უნდა, ის შემოუშვას ქვეყანაში, ამ უფლებას ვერავინ წაგართმევთ. რაც შეეხება საბჭოთა კავშირს, არსებობს კარგი საბჭოთა კავშირი და ცუდი საბჭოთა კავშირი. ბრიყვული საბჭოთა პროვინციალიზმის მაგალითსაც გეტყვით - ერთმა ქართველმა ჟურნალისტმა, დამასმინა, შემდგომ კი "ფეისბუკზე" შემომივარდა, მაგინა და ჩემი ქვეყანა გალანძღა - აი, ეს ნამდვილად არის საბჭოთა პროვინციალიზმი.

alt

- ირონიულად არ გეჩვენებათ, რომ იმ ქვეყნის წარმომადგენლები, რომელსაც მთელი განვითარებული სამყარო საბჭოთა კავშირის იდეურ მემკვიდრედ მიიჩნევს, სხვას სდებთ ბრალს საბჭოთა მენტალობის ქონაში?

- ბატონ მალაშენკოს განცხადებებს ვერ განვსჯი. რაც შეეხება საბჭოთა კავშირის აღდგენას, აქ ყველაზე უპრიანი იქნება პრეზიდენტ პუტინის შეფასება მოვიხმო, ვისაც საბჭოთა კავშირის დაშლაზე გული არ სწყდება, მას გული არ აქვს, ხოლო ვისაც საბჭოთა კავშირის აღდგენის იმედი აქვს, მას ტვინიო. ეს ფრაზა სრულყოფილად გამოხატავს ჩემს პოზიციას. მე არ ვფიქრობ, რომ რუსეთს საბჭოთა კავშირის აღდგენა სურს, რადგან ეს შეუძლებელია.

- მაგრამ მაინც ოცნებობთ იმ ძველ დროზე... მიგაჩნიათ საბჭოთა კავშირის დაშლა ტრაგედიად?

- მე რუსი ვარ და ეს უზარმაზარი ტრაგედიაა ჩემი ხალხისთვის, რომელიც მან დაანაკუწა. საბჭოთა ისტორიაში იყო შავი ლაქებიც, როგორიცაა, მაგალითად, სტალინის რეპრესიები, მაგრამ იმავდროულად, ეს იყო ქვეყანა, რომელმაც ჯერ მსოფლიოს უმთავრესი ომი მოიგო, შემდეგ კი პირველმა გახსნა ფანჯარა კოსმოსში. ისტორია შავ-თეთრი ფურცლებისგან არ შედგება, ის მთლიანობაში უნდა აღიქვათ. მე ჩემი ქვეყნის ისტორიას ისეთს ვიღებ, როგორიც არის, აი, თქვენ, ქართველები კი ცდილობთ საბჭოთა წარსული საერთოდ ამოჭრათ. უფრო სწორად იქცევიან სომხები - მათ ჰქონდათ პირველი რესპუბლიკა, შემდეგ მეორე, საბჭოთა რესპუბლიკა, და ახლა აქვთ მესამე რესპუბლიკა. ისინი წარსულზე თვალს არ ხუჭავენ.

- ვერ დაგეთანხმებით იმაში, ჩვენთან საბჭოთა წარსულის ამოჭრას ან მასზე თვალის დახუჭვას ცდილობენ. პირიქით, მაქსიმალურად ვცდილობთ შევახსენოთ მომავალ თაობას, თუ რა ბოროტებას წარმოადგენდა საბჭოთა კავშირი, რომელზეც თქვენ ასე გწყდებათ გული. ჩვენ არ ვივიწყებთ საბჭოთა წარსულს - ჩვენს და თქვენ შორის განსხვავება ისაა, რომ ჩვენ ამ წარსულში კარგს ვერაფერს ვხედავთ.

- მე გითხარით, რომ შავი პერიოდი საბჭოთა წარსულსაც აქვს - როგორიცაა სტალინის რეპრესიები. ეს სიგიჟე და ტოტალიტარული რეჟიმი იყო და ამაში არაფერია კარგი, მაგრამ თვალს ხუჭავთ იმაზე, რომ შემდეგ ამ რეჟიმმა მოიგო კაცობრიობის მთავარი ომი და პირველმა გაგზავნა ადამიანი კოსმოსში. აი, ეს არის საბჭოთა კავშირის დიდება. რაც შეეხება იმას, რომ თქვენ ამ წარსულს არ უარყოფთ, მინდა შეგეკამათოთ - თქვენთან არის საბჭოთა ოკუპაციის მუზეუმი, სადაც გამოფენილია ფოტო, თუ როგორ ანგრევენ ბოლშევიკები საკათედრო ტაძარს ქუთაისში. მე ბოლშევიკების ამ ქმედებას გამართლებას ვერ ვუძებნი, მაგრამ ამავე მუზეუმში ადგილი არ მოიძებნა ფოტოსთვის, რომელზეც "ნაციონალები", ვგულისხმობ მიშა სააკაშვილის მთავრობას, 2006 წელს იმავე ქუთაისში საბჭოთა ჯარისკაცების ხსოვნისადმი მიძღვნილ მემორიალს აფეთქებენ. ამიტომ ვფიქრობ, რომ ეს პროპაგანდისტული მუზეუმია.

- თუ არასწორად მივხვდი, განმიმარტეთ - სად ვავლებთ პარალელს, ქუთაისის ტაძრის დანგრევასა და სააკაშვილის მიერ საბჭოთა ჯარისკაცების მემორიალის აფეთქებას შორის? ფიქრობთ, რომ ამ ორ ინციდენტს ერთნაირი დატვირთვა აქვს ქართველი ხალხისთვის?

- პარალელს ვავლებთ იქ, რომ ერთი მთავრობაც ცდილობს წარსულის განადგურებას და მეორეც.

- ვერც აქ დაგეთანხმებით, მაგრამ შემდეგ თემაზე გადავიდეთ, ამ ინტერვიუს მთავარ მიზეზზე - ვცადოთ გავარკვიოთ, თუ რატომ არ შემოგიშვეს საქართველოში.

- ჩემი წყაროებით ოპოზიციურმა პარტია "ევროპულმა საქართველომ" მოითხოვა, რომ საქართველოში შემოსვლის უფლება არ მიეცათ ალექსანდრ ტოკარევისთვის, ნტვ-ს ჟურნალისტისთვის. შემდეგ დაიწყო რაღაც სიგიჟე, არავინ არაფერი შეამოწმა და საბოლოოდ, ალექსანდრ ტოკარევის გაძევების ნაცვლად საქართველოში შემოსვლის უფლება არ მომცეს მე, ალექსეი ტოკარევს.

- ანუ სხვაში შეეშალეთ.

- დიახ, აურიეს.

- ნტვ-ს ჟურნალისტის დეპორტაციის მიზეზი არსებობდა?

- წარმოდგენა არ მაქვს. საერთოდ არ ვიცი, ვინ არის ეს ადამიანი.

- გასაგებია. მიზეზად რა დაგისახელეს?

- ქართველი პოლიციელები, რომლებმაც ჩვენი ფაქტობრივი დეპორტაცია მოახდინეს, ძალიან ზრდილობიანები იყვნენ, ბოდიშიც კი მოიხადეს ამ არასასიამოვნო ინციდენტისთვის. როდესაც ვკითხე, რატომ არ მიშვებთ-მეთქი, ვერაფერი მიპასუხეს. მრჩება შთაბეჭდილება, რომ ეს იყო ერთგვარი პოლიტიკური ჟესტი, მაგრამ ვერ ვხვდები, მე რა დავაშავე, რადგან პროპაგანდით არასდროს ვყოფილვარ დაკავებული. აქამდე ცხრაჯერ ვიყავი საქართველოში და უამრავ ადამიანს შევხვედრივარ.

- მედია ავრცელებს სამინისტროს განცხადებას, რომ მიზეზი იყო "ოკუპირებული ტერიტორიების შესახებ" კანონის დარღვევა. თქვენ დაარღვიეთ ეს კანონი თუ ალექსანდრ ტოკარევმა, სწორედ ამის გარკვევა გვსურს. დაარღვიეთ თუ არა?

- თქვენ, რა თქმა უნდა, გინდათ, რომ კი ან არა გიპასუხოთ, მაგრამ...

- დიახ, ძალიან მადლობელი დაგრჩებით...

- პირველ რიგში, არავითარი კანონი "ოკუპირებული ტერიტორიების" შესახებ არ არსებობს. თქვენ გაქვთ სამართლებრივი ნორმა, რომელსაც პოლიტიკური მიზნებით იყენებთ. როდესაც რომელიმე პარტიას სურს ქულების დაწერა, სწორედ მაშინ ირთვება ეს ბერკეტი და ხალხს ქვეყანაში არ უშვებენ. კანონი არის ის, რაც ყველასთვის სავალდებულოა და ყველას მიმართ გამოიყენება. ეს არ არის კანონი.

- სრულდება თუ არა, ან როგორ, ეს სხვა საკითხია, კითხვა შემდეგშია - ასეთი კანონის არსებობის შესახებ იცოდით თუ არა? საქართველო, როგორც თქვენვე აღნიშნეთ, სუვერენული ქვეყანაა. დაარღვიეთ თუ არა ამ სუვერენული ქვეყნის კანონი?

- მინდა ჯერ წინა კითხვაზე ბოლომდე გიპასუხოთ. თუ მიგაჩნიათ, რომ შეიძლება საქართველოს და ზოგადად, პოსტსაბჭოთა კონფლიქტებს იკვლევდე და არ ჩახვიდე აფხაზეთსა და სამხრეთ ოსეთში, და თან გსურთ კარგი მკვლევარი იყოთ და ორივე მხარის პოზიცია გესმოდეთ, მაშინ პირდაპირ გეტყვით, მაშინ არაფერი გესმით ამ საკითხის. იმისთვის, რომ კარგი მკვლევარი იყო, კონფლიქტის ორივე მხარეს უნდა ესტუმრო.

- ამაში აბსოლუტურად გეთანხმებით, მაგრამ რა გიშლიდათ ხელს თქვენ და თქვენს კოლეგებს, აფხაზეთში საქართველოს ტერიტორიიდან გადასულიყავით? არც უარს გეტყოდათ ვინმე და არც კანონის დარღვევა მოგიწევდათ.

- ამაში ახლა ხელს მიშლის ის, რომ საქართველოს ხელისუფლება ქვეყანაში არ მიშვებს. პირველად ხუთი წლის განმავლობაში არ შემიშვეს ქვეყანაში გამოგონებული მიზეზის გამო. და კიდევ ერთი რამ: ამ ინციდენტის შემდეგ ჩემს "ფეისბუკგვერდზე" შემოვარდა ქართველი ხალხის ის ნაწილი, რომელსაც მანამდე არ ვიცნობდი. ეს არის გაუზრდელი, არაკორექტული ბრბო, რომელიც მამცირებდა მე, ჩემს ქვეყანას და მის მთავრობას. სიხარულის ყიჟინას სცემდნენ იმის გამო, რომ ქვეყანაში არ შემომიშვეს, ცოტათი ფაშისტური შეხედულებებიც ჰქონდათ. სიბრიყვეა, როდესაც თავს ესხმი ადამიანს, რომელიც არ ავრცელებს პროპაგანდას, არასდროს უთქვამს, რომ საქართველო უნდა დავანაწევროთ, არსად გამოთქვამს თქვენს საწინააღმდეგო მოსაზრებებს, არავის მოუწოდებს, ჩავსხდეთ ტანკებში და თბილისამდე ჩავიდეთო. ვერც ერთ მსგავს განცხადებას ვერც თქვენ, ვერც ისინი, ვინც ყიჟინით მაგინებდნენ მე და ჩემს ქვეყანას, ჩემს ნაწერებში ვერ იპოვით.

- მთავარ შეკითხვას მაინც ნუ გავექცევით. ვრცელდება თქვენი "ფეისბუკიდან" ამოღებული სქრინშოტები, რომელიც ცხადყოფს, რომ იმ სოხუმში იყავით. იქ ამბობთ, რომ სოხუმში ხართ და მეგობრებს აფხაზურ შთაბეჭდილებებს უზიარებთ. ეს იგივე "ფეისბუკგვერდია", რომელზეც გულისწყრომას გამოთქვამდით დეპორტაციის გამო და სადაც, როგორც ამბობთ, ქართველები შემოგიცვივდნენ. რაში გინდათ დამარწმუნოთ, რომ "ფეისბუკი" გაგიტეხეს და ეს ყველაფერი სხვამ დაწერა?

- ვულოცავ ქართველ სოცმედიის მომხმარებლებს, თუ მათ მეტი საქმე არა აქვთ, რომ ჩემს "ფეისბუკზე" იქექონ. შეძრული ვარ თქვენი ასეთი ყურადღებით ჩემი ფეისბუკსტატუსის მიმართ. გინდათ იქექოთ ამ სისულელეებში? კი ბატონო, იქექეთ, მე ეს საკითხი უკვე აღარ მაინტერესებს. მე მაინტერესებს, როგორ შევინარჩუნო ურთიერთობა ქართველი ხალხის ადეკვატურ ნაწილთან, რომელიც ყოველ ჯერზე ხელგაშლილი მხვდებოდა.

- დასასრულ იმას გეტყვით, რომ თქვენ მიერ ბრბოდ მოხსენიებული ქართველების დიდი ნაწილიც ამ გადაწყვეტილების მიღმა პოლიტიკურ მოტივაციას ხედავს და ფიქრობს, რომ თქვენი დეპორტაცია სოხუმში ჩასვლის შემდეგ უნდა მომხდარიყო და არა მხოლოდ ახლა. ვფიქრობ, იმ ადეკვატურ ქართველებსაც, ალბათ, აინტერესებთ პასუხი კითხვაზე, ბოლოს და ბოლოს, კანონი დაარღვიეთ თუ არა?

- თქვენ, ქართული მედიაც და ქართველი პოლიტიკოსებიც ერთ დიდ სიცრუეს ხლართავთ - რუსეთთან ურთიერთობის და აფხაზეთ-ოსეთის აღიარების საკითხი ადარდებს მოსახლეობის მხოლოდ 12 პროცენტს, როგორც ეს ენდიაის კვლევებმა აჩვენა. მათი მთავარი საწუხარი სიღარიბე, უმუშევრობა და სუსტი ეკონომიკაა.

- აი, ამას ნამდვილად სწორად ამბობთ. ნამდვილი ტრაგედიაა, რომ ეს საკითხი მხოლოდ 12 პროცენტს აწუხებს, და დასანანია, რომ ადამიანი, რომელიც აცხადებს, რომ უყვარს საქართველო, რომ სურს, ორ ქვეყანას შორის ნორმალურ დიალოგს შეუწყოს ხელი, ვერ პასუხობს უმარტივეს კითხვაზე, დაარღვია თუ არა ამ ქვეყნის კანონი?

- მე არ ვთვლი ამას კანონად, რადგან როდესაც საქმე ტურიზმს ეხება, რუს ტურისტებს, მათ შორის მე... 9-ჯერ ზედიზედ შემომიშვეს ქვეყანაში და ეს არავის აღელვებდა. ის, რომ აკადემიურ მკვლევარს უსვამენ კითხვას, თუ სად იმყოფებოდა, რათა კონფლიქტი შეესწავლა, სრული იდიოტიზმია. გინდათ არსებული კავშირებიც გაწყვიტოთ? კი ბატონო, ტაქტიკური გადმოსახედიდან ეს ჩემთვისაა ცუდი და მე ძალიან ცუდად ვგრძნობ თავს ამის გამო, მაგრამ სტრატეგიული გადმოსახედიდან ეს ყველაფერი ისევ საქართველოსთვის იქნება წამგებიანი. ორ ქვეყანას შორის ურთიერთობას ამ ერთი ძაფის გაწყვეტაც კი უფრო გააუარესებს.

ვაჟა თავბერიძე