ფარცხალაძე ფარცხალაძეს დაიჭერს?..
თუ დავუშვებთ, რომ ყიფიანმა სიმართლე თქვა და ჩანაწერები მისი და ოქუაშვილის თამაშია, ეს სერიოზული დანაშაულია, რაც, შესაძლოა სიმძიმით არ ჩამოუვარდებოდეს ბიზნესის რეკეტს
"მოველოდი, რომ ეს სპექტაკლი და ეს სცენა გაცილებით ადრე გათამაშდებოდა", - ეს განცხადება უფლებადამცველმა ლია მუხაშავრიამ "კვირის პალიტრასთან""ლევან ყიფიანის განცხადების შეფასებისას გააკეთა. მისი აზრით, ხელისუფლება ამ საქმეს არ გამოიძიებს, რადგან ეს ივანიშვილს არ აძლევს ხელს და შიშობს, რომ ეს საქმე ქვეყანას ჭაობში საბოლოოდ ჩაითრევს. რატომ არა აქვს მას გამოძიების იმედი და დანაშაულის რა ნიშნებს ხედავს ყიფიანის დაგვიანებულ განცხადებაში, ამ საკითხებზე "კვირის პალიტრა" ლია მუხაშავრიას ესაუბრა:
- კვირის ბოლოს "ომეგას" საქმეზე ახალი ჩანაწერი გავრცელდა, რომელშიც, სავარაუდოდ, კვლავ ზაზა ოქუაშვილი და ლევან ყიფიანი საუბრობენ. ჩანაწერებში ისევახსენებენ ფულს, რომელსაც ოქუაშვილისგან ითხოვენ, ასევე ახსენებენ ბიძინას, რომელიც საქმის კურსშია და გახარიას, რომლის უშუალო ჩარევითაც, ჩანაწერების მიხედვით, გაიტანეს თიბისი ბანკიდან ფული...
- ოქუაშვილი ამ ჩანაწერებით ვაჭრობას ცდილობს, რათა ბიზნესი დაიბრუნოს. მას, როგორც ჩანს, საკმაოდ აქვს გადახდილი და ისეა გამწარებული, ყველაფერზე წავა, რათა ეს რეკეტი შეაჩეროს. მან გადაიხადა, მაგრამ ეს საკმარისი არ აღმოჩნდა, კიდევ სთხოვენ.
მე სულ ვეჭვობდი, რომ ყოველი ახალი ჩანაწერი წინაზე უფრო მწვავე იქნებოდა და მეტი და მეტი სკანდალია მოსალოდნელი, რადგან სანამ ოქუაშვილი თავის მიზანს არ მიაღწევს, გააგრძელებს ჩანაწერების გამოქვეყნებას და სულ უფრო ახალი სახეები გამოჩნდებიან, რაც მეტად დაგვარწმუნებს, რომ ეს სიმართლეა და არ არის დადგმული.
ჩანაწერები კი, როგორც ჩანს, კიდევ აქვს, თანაც რეალურია, რადგან ასეთ ავანტიურაზე ვერ წავიდოდა, რადგან მისი ოჯახის წევრები საქართველოში ცხოვრობენ. ამიტომ ვურჩევ ხელისუფლების სათავეში მყოფ პირებს, დროა, აღიარონ, რაც მოხდა, თუ არ უნდათ, ამ ჩანაწერებმაც იგივე როლი შეასრულოს, რაც 2012 წლის არჩევნების წინ ციხის კადრებმა.
- გახარიას გვარის გაჟღერება რაზე მიანიშნებს? - მრავლისმეტყველია. ეჭვიც არ მეპარება, რომ ძალოვანი უწყებების გარეშე ეს არ მოხდებოდა. ამიტომაც ვამბობთ, რომ
ეს არის სისტემური პრობლემა და სახელმწიფო რეკეტი. ეს არ არის მხოლოდ ერთი პირის სურვილი, ამაში მთელი სახელმწიფო მანქანაა ჩართული.
- ამ ჩანაწერის გამოქვეყნების შემდეგ ყიფიანის განცხადება რამდენად არის დამაჯერებელი? ან საერთოდ იმოქმედებს თუ არა ეს ჩანაწერი ყიფიანის განცხადებაზე? - იმდენი ხანია, პროკურატურა დუმს და ელოდება, რას მოიფიქრებენ ხელისუფლების მაღალ ეშელონებში და იქ, ეტყობა, იმდენად არ სცალიათ ამ საკითხზე დასაფიქრებლად, ახლაღა გაახსენდათ, რომ ლევან ყიფიანია დასატერორებელი, მან უნდა თქვას, რომ ეს ყველაფერი დადგმულია და ამიტომ თქვა ეს ასე გვიან. მოველოდი, რომ ეს სპექტაკლი გაცილებით ადრე გათამაშდებოდა. თუმცა ასეთ საკითხებზე მსხვერპლადქცეული ადამიანები კი არ უნდა გველაპარაკებოდნენ, ეს ტყუილიაო, პროკურატურა უნდა გვეუბნებოდეს მკაფიოდ, რომ ჩატარდა ექსპერტიზა, საგამოძიებო მოქმედებები და ეს არ დადასტურდა.
მაგრამ ის, რაც დღეს ხდება, მათ შორის ყიფიანის ინტერვიუ და ასე ვთქვათ, ფაქტების დეზავუირება, კიდევ უფრო გვარწმუნებს, რომ ის, რაც ოქუაშვილმა თქვა და რა ჩანაწერებიც გავრცელდა, სიმართლეა.
- ყიფიანს ეს განცხადება პირველ დღესვე რომ გაეკეთებინა, უფრო დამაჯერებელი იქნებოდა? დრომ შესძინა მის განცხადებას დაუჯერებლობის ეფექტი თუ კიდევ არის დეტალები, რაც საეჭვოს ხდის მის ნათქვამს? - ასეთ სკანდალებში დროის ფაქტორი გადამწყვეტია. ყიფიანი მაშინვე რომ გამოსულიყო და ეს ეთქვა, საზოგადოების განწყობა არ იქნებოდა ასეთი მტკიცე, რომ მისი განცხადება საგანგებოდ შეთითხნილია.
- მის განცხადებაში კიდევ რა არის საეჭვო და დაუჯერებელი? - პოლიტიკოსების და მაღალი თანამდებობის პირების ცინიკური დამოკიდებულება და ამ ამბის ანეკდოტთან შედარება ძალიან სახიფათო ნიშნებს შეიცავს.
მე არ მინდა ისეთ ადამიანებს ვანდოთ გადაწყვეტილების მიღება, რომლებიც ასეთ ფაქტებს"ანეკდოტებს უწოდებენ და როგორც თავად ამბობენ, სასაცილოდ არ ჰყოფნით. ეს არ არის ხელწამოსაკრავი თემა.
მხოლოდ ყიფიანის განცხადებაზე აქცენტის გაკეთება, ეს მე მოვიგონეო, ნდობას არ იწვევს. ამის დაჯერების შანსი ნულის ტოლია. არ შეიძლება ეს მხოლოდ ორი კაცის ჩანაფიქრი იყოს, ასეთი ავანტიურისთვის დიდი რესურსი, სერიოზული მომზადება და შემდგომში შესაბამისი ქმედებებია საჭირო.
- თუ დავუშვებთ, რომ ყიფიანმა სიმართლე თქვა და ჩანაწერები დადგმული სპექტაკლია, ეს შეიცავს დანაშაულის ნიშნებს? - თუ ასეთი ავანტიურა ვიღაცამ დაგეგმა და ჰგონია, რომ საერთაშორისო საზოგადოებრიობას მოატყუებს, ეს ავანტიურა ჯერ იმაზე მაინც უნდა ყოფილიყო გათვლილი, რომ ქვეყანაში მაინც მოტყუვდებოდა ვინმე. ეს მიზანი ჯერ ქვეყნის შიგნით არ არის მიღწეული, მაშინ რანაირად მოტყუვდებიან დასავლეთში, ოქუაშვილის ძალიან სერიოზული პარტნიორები როგორ დაიჯერებენ, რომ მან ეს მოიფიქრა და ლევან ყიფიანთან ერთად შეასრულა?
თუ დავუშვებთ, რომ ყიფიანმა სიმართლე თქვა და ჩანაწერები მისი და ოქუაშვილის თამაშია, ეს სერიოზული დანაშაულია, რაც, შესაძლოა სიმძიმით არ ჩამოუვარდებოდეს ბიზნესის რეკეტს...
ეს აფერა გულისხმობს ასევე ძალიან მძიმე თანამდებობრივი დანაშაულის დაბრალებას, რაც ცალკე დანაშაულია. ეს არის ძალიან სერიოზული დანაშაულის პროვოკაცია, სადაც გარეული არიან არა რიგითი, არამედ უმაღლესი პოლიტიკური თანამდებობის პირები. ამიტომ, თუ დავიჯერებთ, რომ ყიფიანი სიმართლეს ამბობს, თუნდაც ამ მიმართულებით უნდა ჩატარდეს გამოძიება და ყოველდღიურად გვამცნონ, რა დასკვნები გაკეთდა.
- მაშინ გამოდის, უფრო მძიმე დანაშაულს იგონებს, რათა დაფაროს ის დანაშაული, სადაც ივანიშვილთან დაახლოებული ადამიანები ფიგურირებენ? - ასე გამოდის. თუ ასეთი მძიმე დანაშაული იყო ჩადენილი და ეს არ იყო გადაფარვა, მაშინ რატომ დუმს პროკურატურა და რატომ არაფერი ხდება.
- თქვენ როგორ ფიქრობთ, რატომ არ იძიებს პროკურატურა? - იმიტომ, რომ არ უნდათ... ჩვენ ამ მოვლენების ფონზე შეიძლება გავაკეთოთ ძალიან ცუდი დასკვნა, რომ მთელი ეს კორუფციული სისტემა იმდენად ინსტიტუციურად არის ჩამოყალიბებული და იმდენად სისტემური ხასიათისაა, რომ მასში ყველა არის გარეული, პროკურატურის ჩათვლით. ამიტომ დუმს პროკურატურა, გამოძიება არ მიდის და ახლა ერთი-ორი კაცის დატერორების ხარჯზე უნდათ დაგვარწმუნონ, თითქოს ეს ყველაფერი მოგონილია.
- პროკურატურა, რომელსაც ფარცხალაძე აკონტროლებს, გამოიძიებს იმ საქმეებს, სადაც ფარცხალაძე ფიგურირებს? - არა, ცხადია. სწორედ ამის შედეგია, რომ გამოვიდა ყიფიანი და ისეთი რაღაცები ილაპარაკა, რომლისაც კაციშვილს არ სჯერა. საერთოდ, როდესაც არაფორმალური მმართველობის საფრთხეებზე ვლაპარაკობთ, სწორედ ეს იგულისხმება, რომ ფარცხალაძე, რომელიც არ არის ფაქტობრივი პროკურორი, ოფიციალური პირი და ის აღასრულებს ქვეყანაში"მართლმსაჯულებას - არის ჯალათიც, განმსჯელიც, არის სასჯელის შემფარდებელიც და მისი აღმასრულებელიც. ასეთ ვითარებაში, როდესაც მმართველობა არაფორმალურია, ქვეყანა ძალიან სწრაფად იძირება ჭაობში. უკვე ვხედავთ, როგორ ხრწნის ეს ქვეყანას, როგორც ინსტიტუტს, შიგნით ასეთი პროცესებია და ხელისუფლებას მისი შეჩერება აზრადაც არ მოსდის. ეს უპირველესად მას გადაიყოლებს...
მართლმსაჯულება პარალიზებულია - წარმოიდგინეთ, პროკურატურამ, რომელსაც აკონტროლებს ფარცხალაძე, უნდა გამოიძიოს საქმეები, რომლებშიც ფარცხალაძე ფიგურირებს...
- ეს საქმე ხელისუფლებისთვის გადამწყვეტი იქნება? - ის ლექსიკა, რომლითაც გველაპარაკებიან, მაგალითად, პარლამენტის თავმჯდომარე, პრემიერ-მინისტრი, საზოგადოებას თვალნათლივ უჩვენებს, რომ ჩვენ მივეცით უფლებამოსილება და მანდატი იმ პირებს, რომლებიც ამ თანამდებობისთვის სრულიად შეუფერებელი და არაადეკვატურები არიან. ამას ემატება ისიც, რომ ქვეყანაში არაფორმალური მმართველობა რეალურია, ძალიან დიდი და განუზომელი ძალაუფლების პრაქტიკულად გამტარებელია და ეს ძალიან საშიში ვითარებაა.
ვფიქრობ, საზოგადოება მალე გონს მოეგება. ხალხმა უნდა დაინახოს, რომ არჩევნების დღეს შინ ჯდომა არ შეიძლება და არა მარტო უნდა მივიდნენ არჩევნებზე, არამედ ყურადღებით შეაფასონ კანდიდატები და არჩევანი ისე გააკეთონ...
რაც შეეხება ხელისუფლებას - "თუ არ გამოფხიზლდა, ფარცხალაძე მათ ""პოლიტიკურ სარდაფში"" ჩაიყოლებს."
შალვა თადუმაძე ოთარ ფარცხალაძესთან დამარცხდა?!
ჩვენ ვწერდით, რომ მთავარ პროკურატურას ოთარ ფარცხალაძე აკონტროლებს მთავარი პროკურორის მოადგილის მამუკა ვასაძის მეშვეობით და შალვა თადუმაძე ფაქტობრივად ვერანაირ გადაწყვეტილებას ვერ იღებს. თადუმაძე შეეცადა, ფარცხალაძის გავლენები "ჩაეხსნა" პროკურატურიდან და დახმარებისთვის ბიძინა ივანიშვილს მიმართა. თუმცა ბოლო ინფორმაციით, მთავარ პროკურატურაში ძვრა არ არის და არც პირი უჩანს, რომ ეს უწყება რეალურად მთავარმა პროკურორმა მართოს და არა "რუხმა კარდინალმა" ფარცხალაძემ. შესაბამისად, დიდი ზარ-ზეიმით გამოცხადებული რეორგანიზაცია დიდი ალბათობით მხოლოდ ქაღალდზე დარჩა.
ლევან ყიფიანი: "არ ვიცი, ეს იყო ჩემი მიამიტობით ..."
"ომეგა ჯგუფის" საქმეზე გავრცელებულ სკანდალურ ჩანაწერებთან დაკავშირებით, სასამართლოში მიცემული ჩვენების შემდეგ ლევან ყიფიანმა მედიასთან ისაუბრა და ე.წ. სარდაფის ეპიზოდს, სადაც ჩანაწერების მიხედვით მას ფარცხალაძე ფიზიკურად გაუსწორდა, სიცრუე უწოდა.
(სტილი დაცულია) "ოთარ ფარცხალაძეს ვიცნობ, მაქვს ნორმალური ურთიერთობა. ეს არის ფარსი, ეს არის შეურაცხმყოფელი, ამ თემაზე რომ ვილაპარაკო. ასეთი რამე არ ყოფილა...
ამ ჩანაწერებთან დაკავშირებით, გეტყვით, რომ... ალბათ, ეს შეიძლება სასაცილოც კი იყოს. ამ ჩანაწერებში ჩვენ ერთობლივი გეგმა გაგვაჩნდა. ზაზა ოქუაშვილი მოვიდა ჩემთან ზაფხულში, მან მთხოვა ბოლო შეხვედრისას მივსულიყავი მასთან და დამიხატა ასეთი სურათი: რადგან ვიცი ბიზნესწნეხს განიცდის მისი უცხოელი პარტნიორებისგან, ამიტომ გადაწყვიტა დაეხატა ასეთი სცენარი - ჩვენ ჩაგვეწერა ერთობლივად მაკომპრომეტირებელი მასალა. მპირდებოდა, რომ ეს იყო მისი შიდა მოხმარებისთვის, ეს უნდა წასულიყო უცხოეთში, რათა დაერწმუნებინა, რომ საქართველოს ხელისუფლება წნეხს ახორციელებს მასზე და მოხდებოდა მისი დავალიანებების, რომელიც მას გააჩნდა ასევე უცხოელ პარტნიორებთან, გადავადება. შესაბამისად, ეს პრობლემები მოგვარდებოდა საქართველოში, ამის გამო ის მომელაპარაკა... ხაზგასმით აღნიშნავდა, რომ აღნიშნული მასალა წავიდოდა უცხოეთში, უცხოელების დასარწმუნებლად. ამის შემდგომ, მას თავზე ენგრევა მთელი ბიზნესი და ამან გამოიწვია ჩვენი შეთანხმება. არ ვიცი, ეს იყო ჩემი მიამიტობით, რომ დავხმარებოდი ამ კაცს... მივიღე თამაშის წესები, მივიღე გამოწვევა, განვახორციელეთ ერთობლივად, მაგრამ მთელი უბედურება ის არის, რომ ეს კაცი თურმე, ამ ჩანაწერებს აკეთებს დიდი ხნის განმავლობაში და ის ჩანაწერებიც კი, რომელიც ერთობლივად განვახორციელეთ, ის ჩანაწერებიც დამონტაჟებულია...
რაც შეეხება ინტერესს ბანკთან მიმართებაში, მე ბანკში ვიმყოფებოდი, თანხის გატანა მოხდა... სად წავიდა ეს ფული, ჩემთვის უცნობია... ძალიან ბევრ ადამიანთან მაქვს კავშირი. კიდევ ერთხელ გიდასტურებთ, რომ ეს იყო ისეთი შანტაჟი, რომელიც მან გამოიყენა თავისი ფინანსური ინტერესებიდან გამომდინარე. ფინანსური ინტერესებიდან ეს პოლიტიკურ ინტერესებში გადაზარდა..."
"საიდან მოვიტანო მე სამ მილიონ-ნახევარი ქეში?"
კვირის ბოლოს "ომეგას" საქმეზე სკანდალური ჩანაწერების მორიგი "სერია" გამოჩნდა.
(სტილი დაცულია) ლევან ყიფიანი: - ვიტყვი, რომ მე ამას ვიძახი ამას, რო... ეს არის კონტრიბუცია და...
ზაზა ოქუაშვილი: - სამ-ნახევარი, სამ-ნახევარი...
ლევან ყიფიანი: - ხო, ხო, კონტრიბუცია და ამას აღარ ვიძახი, რომ იქ შევა, ეს უკვე შენი სახელით ვიძახი, რომ იქ შევიდეს.
ზაზა ოქუაშვილი: - ამხელა თანხები არ ვიცი! ბიძინა, ბიძინამ გახსოვს მაშინ, როგორ გვითხრა დიდი თანხები! 4 მილიონი ბიძინამ მითხრა და ეხლა ვინ მეუბნება? ვინმე შემხვდება კიდევ?
ლევან ყიფიანი: - შეგახვედრებ რა.
ზაზა ოქუაშვილი: - ამაზე თუ ვიტყვი თანხმობას, ამუშავდება ფაბრიკა?!
ლევან ყიფიანი: - ხო, ხო.
ზაზა ოქუაშვილი: - წინასწარ უნდა მოვიტანო თანხა?
ლევან ყიფიანი: - ნუ ეხლა ვინ გენდობა. ეხლა თუ ჭკვიანი და ის არის ესეთ სიტუაციაში.
ზაზა ოქუაშვილი: - წინასწარ თანხა მაშინ ბიძინამ მაინც გვითხრა და ეხლა შენ მეუბნები და...
ლევან ყიფიანი: - რა მნიშვნელობა აქვს. ხომ დაინახავ ფაქტს, ფაქტს ხო დაინახავ. ტყუილად ხომ არ გავა ეს თანხა, ფაქტს რომ დაინახავ.
ზაზა ოქუაშვილი: - როგორ დავინახავ ფაქტს?
ლევან ყიფიანი: - როგორ და დაიწყება მუშაობა.
ზაზა ოქუაშვილი: - დღეს თანხა უნდა გავცე?!
ლევან ყიფიანი: - ხვალვე გავა ის, ისა და დაიწყება მუშაობა.
ზაზა ოქუაშვილი: - ამხელა კონტრიბუშენი და ბიუჯეტს არ აკლდება?
ლევან ყიფიანი: - როგორ არ აკლდება, როგორ არ აკლდება!
ზაზა ოქუაშვილი: - ოთხ-ნახევარი ხომ არ აკლდება, სამ-ნახევარი.
ლევან ყიფიანი: - სამ-ნახევარი არა!
ზაზა ოქუაშვილი: - საიდან? ქეშის პრობლემაა, ჯერ ეს ერთი, საიდან მოვიტანო მე სამ მილიონ-ნახევარი ქეში? ბანკიც არ გასცემს მაგას, გახსოვს მაშინ მთელი გახარია და ის ჩაერია! ამხელა ნაღდი, მაშინაც რომ გასცეს, თვალები ამივიდა შუბლზე.
ლევან ყიფიანი: - კიდევ ერთხელ გეუბნები, იმის ისა რა ქვია.
ზაზა ოქუაშვილი: - პრემიერთან შევალთ?
ლევან ყიფიანი: - შევიდეთ კი, მარა უნდა ვთქვათ, პირველი ბიუჯეტი...
ზაზა ოქუაშვილი: - მაშინ შევხვდეთ პრემიერს, ძალიან პატივს ვცემ ანზორსაც, ოთარსაც, მარა სიტყვაზე მაშინაც...
ლევან ყიფიანი: - ოთარის დედაც... მ...
ზაზა ოქუაშვილი: - ხო მარა, მახსოვს, ბიძინა იქნება საქმის კურსში თუ?!
ლევან ყიფიანი: - რა თქმა უნდა, ჩააყენებენ საქმის კურსში, ჩააყენებენ.
ზაზა ოქუაშვილი: - იმიტომ, რომ ამხელა თანხა ბიძინას გარეშე...
ლევან ყიფიანი: - ნუ, რა თქმა უნდა, რა თქმა უნდა...
ზაზა ოქუაშვილი: - რომ შევხვდეთ ბიძინას კიდევ...
ლევან ყიფიანი: - ნუ ეხლა თუ გამოიჩინა რაღაც ყურადღება, შეიძლება თვითონ გვითხრას და ავიდეთ, ვთქვათ...
ლევან ყიფიანი: - მაშინ იყო ჩართული, იმიტო, რომ ამ ოთარმა უთხრა, იმიტომ, რომ მაგი იყო ჩარეული და მაგან იმასქნა, მაგი იყო ის.
ზაზა ოქუაშვილი: - მაშინ თვითონ რომ გვითხრა, უკვე სხვა რაღაც იყო.
ლევან ყიფიანი: - მაშინ თვითონ რო გვითხრა, ოთარმაც გვითხრა, თვითონ კი არ დაესიზმრა. არც ციფრები იცოდა.
ზაზა ოქუაშვილი: - ხო, მარა თვითონ ხომ გვითხრა, 4 მილიონიო, თავისით.
ლევან ყიფიანი: - გაგვიმეორა.
ზაზა ოქუაშვილი: - ხო გაგვიმეორა.
ლევან ყიფიანი: - მერე გვითხრა, რო გვაწვებოდა, გახსოვს, რო ისა მე ვუთხრა... მეუბნება, 4 მილიონ დოლარს-მეთქი და არაო... რას გეუბნება, ეგ ერთია და რა ითქვა ისო. ხო გახსოვს?
ზაზა ოქუაშვილი: - კი მახსოვს, ოთარს მოვიყვან თუ გინდა აქაო?
ლევან ყიფიანი: - ხო, მარა, რომ გვაწვებოდა, გახსოვს ისა...
ზაზა ოქუაშვილი: - ოთარი.
ლევან ყიფიანი: - ხო, ისაო, ლარი კი არ გითხარით, დოლარი გითხარითო.
ზაზა ოქუაშვილი: - კვირიკაშვილზე რომ უთხრა, ჩემი ის ხო არ იყოვო, უფროსიო, ტიროდა აქაო, ხოდა, რო შევხვდეთ, რომ შევხვდეთ ბიძინას მაშინ?
ლევან ყიფიანი: - ვნახოთ, გვეტყვის რა ყველაფერს.
ზაზა ოქუაშვილი: - ყოველ შემთხვევაში, ბიძინას ეცოდინება, არ იქნება ბიძინასგან დამალული?!
ლევან ყიფიანი: - კი, კი, კი, კი, კი.
რუსა მაჩაიძე