"ივანიშვილის თანხმობით პესკოვთან შეხვედრაზე გამაყოლეს მთავრობის წარმომადგენელი" - რატომ ჩაიშალა პუტინის გარემოცვაში პროქართული ლობის შექმნის გეგმა
"ივანიშვილის თანხმობით პესკოვთან შეხვედრაზე გამაყოლეს მთავრობის წარმომადგენელი" - რატომ ჩაიშალა პუტინის გარემოცვაში პროქართული ლობის შექმნის გეგმა
ფოტო:ვლადიმირ პუტინი
ბადრი ნაჭყებია: "ივანიშვილის თანხმობით პუტინის პრესმდივან პესკოვთან შეხვედრაზე გამაყოლეს მთავრობის წარმომადგენელი, თუმცა შეხვედრის შემდეგ დაიწყო ზეწოლა"

"ისევ იძაბება ურთიერთობა რუსეთთან. ანტიქართულ ლობისტურ ძალებს მოსკოვში ისევ ეხსნებათ ფართო ასპარეზი. შევჩენკოსა და ფელდენგაუერის გაფრთხილება­ ამ ძალების საშიშროებაზე ყურადსაღებია!" - დაწერა სოცქსელში პოლიტოლოგმა ბადრი ნაჭყებიამ, რომელიც საერთაშორისო ტელერადიოკომპანია "მირის" ქართულ ფილიალს წლების განმავლობაში ხელმძღვანელობდა. მისი ეს განცხადება გამოძახილია რუსი ექსპერტების მოსაზრებებისა, რომ რუსეთში დიდი ხანია საქართველოს წინააღმდეგ მუშაობენ ლობისტური ჯგუფები და მიზანმიმართულად ძალიან
ნეგატიურ როლს თამაშობენ საქართველო-რუსეთის ურთიერთობაში. "კვირის პალიტრა" ბადრი ნაჭყებიას ესაუბრა:

- რომ არა რუსი ექსპერტების ეს განცხადებები, რომელთაც, ფაქტობრივად, მტკიცებით ფორმაში ილაპარაკეს რუსეთში საქართველოს წინააღმდეგ მომუშავე ლობისტურ ჯგუფებზე, შესაძლოა ამაზე საჯაროდ არც მელაპარაკა. 2013 წლის გაზაფხულზე თბილისის სახელმწიფო უნივერსიტეტში გაიმართა კონფერენცია, რომელშიც მონაწილეობდნენ მოსკოვის საერთაშორისო
ურთიერთობათა ინსტიტუტის დოცენტები ნიკოლაი სილაევი და ანდრეი სუშენცოვი. სიტყვით გამოსვლისას ვახსენე რუსეთში არსებული ის ლობისტური ჯგუფები, რომლებიც საქართველოს წინააღმდეგ მუშაობენ. ამ ბატონებმა შეთქმულების თეორიის ტირაჟირებაში დამდეს ბრალი. ეს არც იყო გასაკვირი, რადგან ისინი წარმოადგენენ რუსეთის საგარეო საქმეთა სამინისტროს ინტერესებს, რომლის მინისტრი ლავროვი, მაქსიმ შევჩენკოს თქმით, სომხური ლობის მთავარ ფიგურად ითვლება...

17 წლის განმავლობაში ვიყავი "მირის" ქართული ფილიალის დირექტორი, დირექტორთა საბჭოს წევრი და ვაკვირდებოდი, როგორ მიდიოდა ჩვენს წინააღმდეგ ლობისტური მუშაობა რუსეთში. ეს განსაკუ­თრებით შესამჩნევი იყო მასმედიაში, სადაც­ ანტიქართული გამოხდომების უკან გავლენიანი ეთნიკური ლობისტური ჯგუფების წარმომადგენლები იდგნენ... 2012 წლის შემდგომ აქტიურად ჩავერთე დისკუსიებში და "მირის" საქართველოს ფილიალის გაძლიერება გადავწყვიტე... "მირი", რომლის დირექტორთა საბჭოს თავმჯდომარე, პუტინის მარჯვენა ხელი, მისი ადმინისტრაციის უფროსის მოადგილე და პრესსამსახურის უფროსი დმიტრი პესკოვია, იძლეოდა და იძლევა საშუალებას, რომ გარკვეული კავშირები დამყარდეს. სწორედ ამ კავშირების მოძიება ვცადე 2013 წლიდან. პესკოვთან წელიწადში ორჯერ შეხვედრა მიწევ­და, რაც შეიძლებოდა გამოგვეყენებინა, რადგან მე "მირში" სწორედ საქართველოს წარმომადგენელი გახლდით, საქართველოს მთავრობამ წარმადგინა ამ თანამდებობაზე, ჩვენი ქვეყანა კი ამ საერთაშორისო კომპანიის თანადამფუძნებელი და 10%-ის მფლობელია, რომლის ღირებულება 200 მილიონ რუბლად არის შეფასებული... მთავრობა ჩემს აქტიურობას დადებითად ხვდებოდა. მეტიც, ბიძინა ივანიშვილის პრემიერობისას, როგორც ვიცი, სწორედ მისი ნებართვით, მოსკოვში პესკოვთან შეხვედრაზე გამაყოლეს მთავრობის წარმომადგენელი, მის გვარ-სახელს ვერ გეტყვით, თუმცა მე მოვახერხე ამ შეხვედრის ორგანიზება. პესკოვმა ამ შეხვედრას ისტორიული უწოდა. უფრო გაცნობითი ხასიათის იყო, რასაც გარკვეული ნაბიჯები უნდა მოჰყოლოდა, მაგრამ...
დმიტრი პესკოვი და ბადრი ნაჭყებია
- მხოლოდ ერთი შეხვედრა გაიმართა?
- დიახ, და დაიწყო­ ზეწოლა... შენიშვნა მივიღე ტელერადიოკომპანიის მთავარი­ შტაბბინიდან­. ვითარება უფრო მას შემდ­ეგ გამწვავდა, რაც ჩვენმა მთავრობამ შეძლო "მირის" ქართული ფილიალის ირიბი დაფ­ინანსება­. ამაში ის იგულისხმება, რომ ჩვენ ტურიზმის სახელმწიფო რეკლამა მივიღეთ...
2008 წლამდე ჩვენს ფილიალს საქართველოს სახელმწიფო აფინანსებდა, შემდგომ კი სახსრებს კომპანიის კონსოლიდირებული­ ბიუჯეტიდან ვიღებდით. როდესაც საქართველო ამ კომპანიის თანადამფუძნებელი გახდა, საკმაოდ დიდი თანხა, თითქმის 3 მილიონ დოლარამდე შევიტანეთ. ქართული ფილიალის აღმავლობა ბევრს არ მოეწონა რუსე­თშიც და საქარ­თველოშიც. სოცქსელშიც შემექმნა პრობლემები. არის ასეთი "კავკასიური გეოპოლიტიკური კლუბი", რომელსაც ხელმძღვანელობს პუტინის ადმინისტრაციასთან დაახლოებული გავლენიანი პოლიტოლოგი იანა ამელინა, რომელიც ოსების ინტერესების დამცველია. მას და მისი ჯგუფის წარმომადგენლებს სოციალურ ქსელებში უსერიოზულესი დაპირისპირებები მოვუგეთ იმხანად.

რამდენიმე მიმართულებით დავიწყეთ აქტიურობა. ტელეკომპანია ცდილობდა, განევითარებინა ქართული რუსულენოვანი ჟურნალისტიკა, შეექმნა პროექტები, კრემლთან დაახლოებულ და საქართველოსადმი კეთილგანწყობილ პირებთან კავშირზე გასვლას ვცდილობდი, რაც ცენტრალურ ფილიალში არ მოსწონდათ. შენიშვნა მივიღე თავად ტელერადიოკომპანიის თავმჯდომარე ბატირშინისგან. პესკოვთან ზემოხსენებული შეხვედრის შემდგომ ჩრდილოკავკასიური მიმართულებითაც დავიწყე აქტიურობა, მაგრამ მომდიოდა ინფორმაცია, რომ ცდილობდნენ ჩემს ჩამოშორებას, მახსენებდნენ, რომ ეს ტელევიზია იყო და არა საზოგადოებრივი ორგანიზაცია. მუქარაზეც მიმანიშნეს. საბოლოოდ კი, 2015 წელს, დამირეკეს და მითხრეს, გადაწყვეტილია თქვენი ფილიალის დირექტორის პოსტიდან კომპანიის თავმჯდომარის მრჩევლად გადაყვანაო. მე საქართველოს მთავრობის დადგენილებით ვარ გამოგზავნილი ამ თანამდებობაზე და ეს შეთანხმებულია-მეთქი? პასუხი, რა თქმა უნდა, ვერ მივიღე...

მოგვიანებით გავიგე, რომ ჩემი გვერდის ავლით, მოსკოვის შტაბბინაში დაუბარებიათ ОРТ-ს წარმომადგენელი მიშა რობაქიძე და კიდევ ერთი ქალი, რომლის გვარ-სახელსაც არ გავამხელ, რადგან ამას დღემდე ნანობს. უთქვამთ, ნაჭყებია გადაგვყავს და თქვენ იქნებით საქართველოს ფილიალის კურატორები, სანამ ახალი ხელმძღვან­ელის საკითხი გადაწყდებაო. მოგვიანებით რობაქიძემ მითხრა, რომ ყველაფერი შეთანხმებული იყო საქართველოს მთავრობასთან მაკო ბიგვავას დონეზე, პრეზიდენტის ადმინისტრაციაში კი აბაშიშვილთან, თუმცა ეს ძალიან მაეჭვებს... მას მერე ამდენი დრო გავიდა და დღემდე არ არის გარკვეული იმ ორი თანამდებობის ბედი, რომელიც საქართველოს ეკუთვნის - ერთი ფილიალის დირექტორის, რომელიც ჩვენი მთავრობის წარდგენით ინიშნება, და მეორე - სრულუფლებიანი წარმომადგენლის, რომელიც უფრო მთავარია. წლების განმავლობაში ამ თანამდებობას იკავებდა ფინანსთა მინისტრის ყოფილი მოადგილე ვასილ გიგოლაშვილი, რომელიც 2012 წელს გარდაიცვალა, სწორედ ის მეთვალყურეობდა საქართველოს ქონებას ტელერადიოკომპანია "მირში". ვის ხელშია დღეს ეს ქონება, ვინ განკარგავს? სხვა საკითხია, რომ დაშალეს ქართული ფილიალი და, ფაქტობრივად, გაანადგურეს რუსულენოვანი ქართული ჟურნალისტიკა. წარმოგიდგენიათ, მოსკოვმა გაანადგურა რუსულენოვანი მაუწ­ყებლობა. რატომ, თუ აქედან რაიმე საფრთხე არ იგრძნო და თანაც ვიღაცას რაღაც ფინანსური ინტერესი თუ არ გაუჩნდა?!

საბოლოოდ კი ეს არის კიდევ ერთი მაგალითი იმისა, თუ როგორ იმარჯვებს უცხო ინტერესების ლობი არა მხოლოდ რუსეთში, არამედ საქართველოშიც.

- დავუბრუნდეთ რუსეთში ჩვენს წინააღმდეგ მომუშავე ლობისტურ ჯგუფებს...
- რუსეთში ძალიან ძლიერია სომხური ლობი, მარტო ელენე ბონერის, ზატულინ-მიგრანიანისა და საქართველოს წინააღმდეგ მათი შავბნელი გეგმების გახსენება რად ღირს, ეს ჯგუფები კი ლავროვს უკავშირდებიან. რუსეთის პრეზიდენტის ადმინისტრაციაში ჩვენს წინააღმდეგ აქტიურად მუშაობს სურკოვის ერთ-ერთი თანამშრომელი, ინალ არძინბა, რომელსაც, დიდი ალბათობით, აფხაზეთის პრეზიდენტობისთვის ამზადებენ. უკვე ვახსენე, ოსების ინტერესებს რა ხმალამოღებით იცავს იანა ამელინა.

- რა ინტერესი აქვს სომხურ ლობის?
- ეს ცალკე სტატიის თემაა, თუმცა მოკლედ ორ მიზეზს ვიტყვი - ამიერკავკასიაში რუსეთის ფორპოსტი სომხეთია. ამიტომაც შიშობენ, რომ თუ საქართველო-რუსეთის ურთიერთობა დათბა, სომხეთს ძალიან ბევრი ფუნქცია შეიძლება დაეკარგოს. მეორე და გაცილებით საშიში ჯავახეთის პრობლემაა, სადაც პერმანენტულად აღვივებენ სეპარატისტულ განწყობას. როგორც ჩანს, ფიქრობენ, რომ საქართველო-რუსეთის გამწვავებული ურთიერთობის ფონზე შეუძლიათ რუსეთის დახმარებით მიაღწიონ საქართველოს კონფედერაციას მაქსიმალური დეცენტრალიზაციით. ფაქტია, რომ მუშაობა მიდის და არსებობს სერიოზული სეპარატისტული გეგმები ჩვენს წინააღმდეგ.
მოკლედ, რაც მეტად ცუდი ურთიერთობა იქნება საქართველოსა და რუსეთს შორის, ამ ლობისტურ ჯგუფებს ხელს აძლევს. ჩვენ უნდა მოვაგვაროთ ურთიერთობა არა მხოლოდ რუსეთთან, არამედ ამ ძალებთანაც. როგორც ვიცი, ამის მცდელ­ობა ჰქონდა ირაკლი ღარიბაშვილს, თუმცა, იმის შიშით, რუსეთუმეობა არავინ დაგვწამოსო, გაგრძელება არ მოჰყოლია.
არჩილ სოხუმელი
22 ოქტომბერი 2018 19:33
ეს კომენტარი რამდენიმე სტატიას ეხება და ამიტომაც იმ საიტებზე გამოთქმულ მოსაზრებებს ვპასუხობ. რას ნიშნავს რუსეთთან ურთიერთობის მოგვარება და გაუმჯობესება? რა უნდა დათმოს საქართველომ, რომ რუსეთმა შეწყვიტოს საქართველოს განადგურება? რუსეთს სურს კავკასიაში ისეთი სიტუაციისა და მგომარეობის დამყარება, რომ არასოდეს არ დაემუქროს რუსეთის მთლიანობას და უშიშროებას საფრთხე. ჩრდილოეთ კავკასიის შესანარჩუნებლად სჭირდება, რომ ფლობდეს სამხრეთ კავკასიასაც. ამისთვის რაც არ უნდა მოიმოქმედოს საქართველომ რუსეთი ყოველთვის მიზანმიმართულად გამოიყენებს ყველაფერს საქართველოს გასანადგურებლად და დასაშლელად, ყველაფერს გააკეთეს თავისი მიზნების მისაღწევად. რუსეთის მიზანია, რომ საქართველოს ტერიტორია დაიშალოს და გადაიქცეს ერთმანეთის მიმართ მტრულად, უნდობლობითა და ზიზღით განწყობილ რეგიონებად. ორი რეგიონი უკვე აქვს და ამ ტერიტორიების საქართველოსთვის დასაბრუნებლად არაფერს არ გააკეთებს, პირიქით ყველაფერს გააკეთებს კიდევ უფრო დასაშორებლად. რუსებს აქვთ ნათქვამი - ქართველები ისეთ რეგიონში და ტერიტორიაზე ცხოვრობთ, რომ რუსეთისათვის სახიფათოა თუ ქართველები საქართველოში უმრავლესობა იქნებითო. დღეს თუ არა ხვალ თქვენ გაძლიერდებით და მთელ კავკასიას, როგორც სამხრეთს ასევე ჩრდილოეთს გაიყოლებთო.
ახლა რა მიზნებს ემსახურება შევჩენკოსა და ზოგიერთი რუსი პოლიტიკოსის, ანალიტიკოსის თუ ჟურნალისტის მსგავსი განცხადებები. რუსებს ამით რამდენიმე მიზნის განხორციელება სურთ:
1. რუსეთი ცდილობს ქართველებისა და სომხების, ქართველებისა და აზერბაიჯანელების გადამტერებას (დაელოდება ან სულაც არ დაჭირდება, როცა ქართველი პოლიტიკოსები და ჟურნალისტები დაიწყებენ ანტისომხურ ან ანტიაზერბაიჯანულ ისტერიას. ანტითურქული ხომ ისმის ზოგიერთი პოლიტიკოსებისაგან) . დღეისათვის რუსეთი სულ უფრო იახლოვებს აზერბაიჯანს. მიყავს ისეთი პოლიტიკა, რომ ცდილობს სომხეთისა და აზერბაიჯანის დაახლოებას (მოჩვენებით მაინც) საქართველოს ხარჯზე. რაღაცნაირად ყარაბაღის პრობლემის გადაჭრას (ორივე მხარეს წაიყვანს კომპრომისზე). ამ რესპუბლიკების - სომხეთისა და აზერბაიჯანის „შერიგების“ შემდეგ მთლიანად გადაერთვება ჯავახეთსა და ქვემო ქართლზე.
2. ამ განცხადებებით სურთ ზოგიერთ ქართველზე მოახდნინონ გავლენა. ჩვენ არაფერ შუაში ვართ, ყველაფერი სომხების, აზერბაიჯანელების, ოსების, აფხაზებისა და მათი ლობისტების ბრალია. ხოლო ქართველი პოლიტიკოსები სულ უფრო შორდებიან რუსეთს. არ ყავთ თავიანთი ლობისტები და ნატო-ზე და ევროკავშირზე ფიქრობენ, დაიწყონ რუსებთან დაახლოება, საერთო ენის გამონახვა და საქართველოს ეშველებაო. ოღონდ რაც უკვე მოხდა (აფხაზეთისა და ე.წ. „სამხრეთ ოსეთის დამოუკიდებლობა) დაივიწყეთ და თავი დაანებეთო.
3. ამ განცხადებებში არის ფარული მუქარაც - არ იქნებით რუსეთთან? გაგრძელდება თქვენი დაშლა და განადგურება. სომხები ჯავახეთს და კიდევ ზოგიერთ რეგიონს წაიღებენ, აზერბაიჯანელები - ქვემო ქართლს. ოსები - ეგრეთ წოდებულ აღმოსავლეთ ოსეთს (თრუსო, თრიალეთი, ...). დარჩებით განადგურებულებიო.
რუსეთს აქვს ეს - რასაც აპირებს ასე თუ ისე წინასწარ ამბობს, ან პირდაპირ ან მინიშნებით. სომხეთსა და აზერბაიჯანზე უკვე ვთქვი. ინგუშებისა და ჩეჩნების გადამტერება უფრო იმიტომ უნდა, რომ ინგუშებმა ვერ მოიცალონ თუ ეგრეთ წოდებული „აღმოსავლეთ ოსეთის“ ეგრეთ წოდებული „სამხრეთ ოსეთისათვის“ მიერთებას დაიწყებს და ამ ტერიტორიებს მიიერთებს. ინგუშებს საქართველოსთან დასაკავშირებელ გზებს უსპობს, რასაც ინგუშები ჩემი აზრით შეეწინააღმდეგებიან.
io
21 ოქტომბერი 2018 23:09
"საწყალი რუსეთი", ბონერ-ზატულინები არ აძლევენ საქართველოსთან ურთიერთობის გაუმჯობესების საშუალებას.
უკეთეს შემთხვევაში, გაუმჯობესება შესაძლოა მოხდეს მაშინ, როცა ჩვენი მეტსმეტი გაძლიერების გამო, წარუმატებლად ჩათვლიან თუნდაც სტატიაში ხსენებულ პროექტებს.
გიგა
21 ოქტომბერი 2018 19:44
სომხური ლობი ამერიკაშიცაა, მაგრამ ეს ამერიკასთან მეგობრობაზე არ მოქმედებს. რუსეთის მთავრობად თუ მოუნდა, ფეხევზე დაიკიდებენ ლობებს და ისე დაალაგებენ ჩვენთან საქმეს.

რუბრიკის სხვა სიახლეები
საერთო ჯამში როგორ შეაფასებთ გიორგი მარგველაშვილის საქმიანობას საქართველოს პრეზიდენტის პოსტზე?
თქვენი აზრი მნიშვნელოვანია!
საერთო ჯამში როგორ შეაფასებთ გიორგი მარგველაშვილის საქმიანობას საქართველოს პრეზიდენტის პოსტზე?
გაზეთის სტატია. მიიღეთ წვდომა
გაზეთის სტატია. მიიღეთ წვდომა
გაზეთის სტატია. მიიღეთ წვდომა