"ისევ ის "ნაციონალები", ნარჩენები არიან დარჩენილი საპყრობილეებში და ისინი აკეთებენ ჩანაწერებს, შეგვეშვით, დამთავრდა" - კვირის პალიტრა

"ისევ ის "ნაციონალები", ნარჩენები არიან დარჩენილი საპყრობილეებში და ისინი აკეთებენ ჩანაწერებს, შეგვეშვით, დამთავრდა"

დეპუტატ ვიქტორ ჯაფარიძის თქმით, სასჯელაღსრულების დაწესებულებებში "ერთიანი ნაციონალური მოძრაობის" "ნარჩენები" არიან და "ჩანაწერებს ისევ ისინი აკეთებენ".

დეპუტატის თქმით, მას აქვს კონსტიტუციური უფლება, შევიდეს პატიმართან და არ არის ვალდებული, ეს ინფორმაცია სხვას გაანდოს.

"ესენი გვამებს არიან მიჩვეული, გვამს ელოდებიან კიდევ, ამას ელოდებიან. მე მაქვს უფლება შევიდე პატიმართან, ის არის ჩემი ამომრჩეველი. მეორეც, მე არ ვარ ვალდებული, გავანდო ეს ინფორმაცია სხვას - გაკმაყოფილებთ პასუხი? კონსტიტუცია მაძლევს ამის უფლებას და ამათ ხომ ჩაწერეს, თვითონ წაიღონ პროკურატურაში, საგამოძიებო ორგანოებში და თვითონ გამოიძიონ, გამოიკვლიონ.

მე ვთვლი, რომ არასერიოზული, სტრესის ქვეშ მყოფი, აგონიაში მყოფი ადამიანის სიტყვები იყო ეგ და ჩავთვალე არასერიოზულად. ახლა მეუბნებიან, იყო თუ არა ეს ტყუილი, არასერიოზული და ტყუილი ერთიდაიგივე არ არის?", - მიმართა ჯაფარიძემ ჟურნალისტებს.

შეკითხვაზე, რატომ იყო პროკურატურის ყოფილ მაღალჩინოსან მირზა სუბელიანთან ციხეში ასევე მისული ლტოლვილთა სამინისტროს თანამშრომელი დათო ცუხიშვილი, ვიქტორ ჯაფარიძემ უპასუხა, რომ ამის შესახებ არ იცის და როცა ის მირზა სუბელიანს ხვდებოდა, დათო ცუხიშვილი მათთან სწორედ მაშინ შევიდა.

"არ ვიცი, მე ჩემს თავზე გაძლევთ პასუხს, მამამისი და ცუხიშვილი შემოვიდნენ, როცა მე იქ ვიყავი. დავინტერესდი მისი მდგომარეობით და ახლაც დაინტერესებული ვარ, დღესაც მაინტერესებს მისი მდგომარეობა", - აღნიშნა ვიქტორ ჯაფარიძემ.

ჟურნალისტების შეკითხვაზე, როგორია დეპუტატის მოსაზრება ნიკა გვარამიას განცხადებასთან დაკავშირებით, რომ პროკურატურის მიერ გამოქვეყნებული აუდიოჩანაწერები ფაბრიკაციაა, ვიქტორ ჯაფარიძემ უპასუხა, რომ სწორედ ნიკა გვარამიამ გააკეთა ფაბრიკაციები პატარკაციშვილის საქმეზე.

"გვარამიამ ფაბრიკაციები აკეთა ბადრი პატარკაციშვილის საქმეზე. ხომ არ დაგავიწყდათ გვარამია, რომელიც გენერალური პროკურორის მოადგილე იყო, რომელმაც საზიზღრობა აკეთა ჩვენს ქვეყანაში. დაგავიწყდათ? მე არ დამვიწყებია! ცოცხებიც, "დუბინკებიც" როგორი იყო, ხომ არ დაგავიწყდათ?! გვარამიამ რომ თქვა, აპრიორში სიმართლეა? გვარამიამ რომ თქვა, არ არის ჩემთვის სიმართლე, პასუხი ეს არის," - აღნიშნა ვიქტორ ჯაფარიძემ.

ამასთან, ვიქტორ ჯაფარიძემ ჟურნალისტებს მიმართა, რომ ისინი კითხვებს უნდა სვამდნენ იმის შესახებ, როგორ მოხდა, რომ პარლამენტის წევრი საპყრობილეში პატიმართან შევიდა და ამის აუდიოჩანაწერი გაკეთდა.

"მაგრამ თქვენ ეძებთ სენსაციას. ეგ უნდა იყოს სენსაცია, რომ ვინ ჩაწერა პარლამენტის წევრის საუბარი პატიმართან. ეგ არის ჩვენი უბედურება, რომ ისევ ის "ნაციონალები", ისევ ამათი მეპატრონეები, ნარჩენები არიან დარჩენილი საპყრობილეებში და ისინი აკეთებენ და უნდათ, რომ რეჟიმში გვაცხოვრონ, მაგრამ არა, ქართველმა ხალხმა ერთხელ და სამუდამოდ უარი თქვა ჩანაწერებზე, ბინძურ მეთოდებზე და დარწმუნებული ვარ, 28 რიცხვი არის არამარტო სვანეთის, არამედ მთელი საქართველოსთვის. არა, შეგვეშვით, დამთავრდა!,- განაცხადა ვიქტორ ჯაფარიძემ.

"ინტერპრესნიუსი"