სავარძლის შენარჩუნების "კომბინაცია" - ანუ აშანტაჟებს თუ არა წულუკიანი "ოცნების" ლიდერებს - კვირის პალიტრა

სავარძლის შენარჩუნების "კომბინაცია" - ანუ აშანტაჟებს თუ არა წულუკიანი "ოცნების" ლიდერებს

ანა დოლიძე: "მისი ხელმძღვანელობით დაწერილმა უამრავმა კანონმა შექმნა ის ვითარება, რომელიც დღეს გვაქვს, ვგულისხმობ ჩინჩალაძისა და მურუსიძის კონსოლიდირებას. დიდი ხანია, ვაყენებ მისი გადაყენების საკითხს, მაგრამ..."

წულუკიანი პოსტს კიდევ ერთხელ ინარჩუნებს. კულუარული ინფორმაციით, "ოცნების" მთავრობის უცვლელი მინისტრის კაბინეტიდან გასტუმრება კიდევ ერთხელ სცადეს პარტიის "ბოსებმა", მაგრამ ამაოდ... ცოტა ხნის წინ ისეთი განცხადება გააკეთა, თითქოს გადადგომას საკუთარი სურვილით აპირებდა, თუმცა მის განცხადებაში აშკარად ჩანდა უკმაყოფილება და შეფარული მუქარა... მაგრამ მთავრობის წევრებთან შეხვედრის შემდეგ ითქვა, რომ მან წასვლა გადაიფიქრა. "პოზიციები შეჯერებულია და თემა ამოწურულია, შესაბამისად, ჩვენ ვაგრძელებთ ერთიანი გუნდის და ერთიანი პოზიციის პირობებში მუშაობას", - განაცხადა თეა წულუკიანმა.

თანამდებობის დატოვების თაობაზე განცხადებამდე წულუკიანი აღიარებდა, რომ გუნდის წევრებსა და მას შორის იყო აზრთა სხვადასხვაობა, თუმცა კონკრეტულად მხოლოდ ის თქვა, რომ ამაზე შეიძლება სიბერეში ილაპარაკოს.

საინტერესოა, როგორ ახერხებს წულუკიანი, ბოლო შვიდი წლის მანძილზე შეუცვლელი იყოს, მაშინ, როცა დაშვებული შეცდომების გამო მის მიმართ საზოგადოების დიდ ნაწილსა და არასამთავრობო სექტორში პროტესტის ტალღა აგორდა.

იუსტიციის მინისტრით უკმაყოფილება "ოცნების" შიგნითაც გაჩნდა, თუმცა...

როგორ ინარჩუნებს თეა წულუკიანი თანამდებობას და აშანტაჟებს თუ არა იგი ქვეყნის პირველ პირებს? "კვირის პალიტრა" იურისტ ლია მუხაშავრიას ესაუბრა.

"ეს ადამიანი ახერხებს სკამის შენარჩუნებას მაშინ, როცა მეოთხე პრემიერ-მინისტრს ვიცვლით. მართლა არ ვიცი, ამას როგორ ახერხებს"

- წულუკიანმა ამჯერად რა თამაში ითამაშა, არ ვიცი, მაგრამ ერთი რამ ცხადია - ეს ადამიანი ახერხებს სკამის შენარჩუნებას მაშინ, როცა მეოთხე პრემიერ-მინისტრს ვიცვლით. მართლა არ ვიცი, ამას როგორ ახერხებს. ყოფილ მინისტრებს უნდა ჰკითხოთ, იქნებ ისინი მაინც მიხვდნენ, რა განსაკუთრებულ ხელოვნებას ფლობს თეა წულუკიანი.

- ამბობენ, რომ ის ბევრ და მნიშვნელოვან ინფორმაციას ფლობს ქვეყნის პირველ პირებზე... - მარტო ინფორმაცია არ კმარა. მე მგონი, აქ სხვა რაღაცებიც მუშაობს. ეტყობა, ინტრიგებში ძალიან დახელოვნებულია.

- იმასაც ამბობენ, რომ იგი აშანტაჟებს "ოცნების" ლიდერებს... - ეტყობა, კომპლექსურად ყველაფერს იყენებს. აშკარაა, რომ სკამი ყველაზე დიდხანს მან შეინარჩუნა. სხვა არაფერი შემიძლია ვივარაუდო.

- კულუარული ინფორმაციით, თანამდებობიდან ჯერ კიდევ 2018 წელს უპირებდნენ გაშვებას, თუმცა ლამის აეროპორტიდან მოაბრუნეს იუსტიციის მინისტრის სავარძელში, რადგან თან დოკუმენტები მიჰქონდა, რომელიც "ოცნებას", რბილად რომ ვთქვათ, არასასურველი სახით წარმოაჩენდა. - საჯარო მოხელეს ევალება, როცა სამსახურიდან წავა, ყველა დოკუმენტი ადგილზე დატოვოს, მაგრამ ეს ქალი მართლაც კომპლექსურად ყველა ღონისძიებას იყენებს და ამით ახერხებს, იტივტივოს ზედაპირზე.

- რა გახსენდებათ პირველ შეცდომად, რაზეც წულუკიანს, წესით, პოლიტიკური პასუხისმგებლობა უნდა აეღო? - მას პოლიტიკური პასუხისმგებლობა უნდა აეღო წლების წინ ჩაფლავებულ სასამართლო რეფორმაზე. ეს სისტემა საკანონმდებლო წესით სწორედ მან შექმნა. მისი იდეებით დაიწყო მეორე, მესამე ტალღა... რაც მივიღეთ, ეს ხომ უპირველესად საკანონმდებლო რეგულირებით არის განპირობებული! ამაზე პასუხისმგებლობა თეა წულუკიანს უნდა დაჰკისრებოდა, მაგრამ როგორც ხედავთ, ის შეთანხმებული იყო ივანიშვილთან, ამიტომ მის სკამს არაფერი ემუქრება.

- შეიძლება წულუკიანს ჰქონდეს ინფორმაცია "ოცნებისა" და მურუსიძე-ჩინჩალაძის კლანის გარიგებაზე? - ინტრიგებისა და შანტაჟების მოწყობაში უვიცი ვარ, ამიტომ ვერ ვხვდები მის ხრიკებსა და მეთოდებს.

- თუ მართალია ვერსია იმის შესახებ, რომ წულუკიანი "ოცნების" ლიდერებს აშანტაჟებს და ისინიც ექვემდებარებიან შანტაჟს, ეს ქვეყნისთვის სახიფათო არ არის? - მარტო ეს არის სახიფათო? მთელ პარლამენტს მოსამართლეთა კლანი ატერორებს, სასამართლო ხელისუფლება ურჩხულად გადაიქცა და თეა წულუკიანი ამაზე სახიფათო ნამდვილად არ არის. უბრალოდ, ის თავისთვის ცდილობს, რაც შეუძლია და გამოსდის კიდეც.

- თქვენი აზრით, ამით შეძლებს თუ არა 2020 წლამდე თანამდებობის შენარჩუნებას?

- როგორც ჩანს, სკამს ბოლომდე შეინარჩუნებს. მერე რა მოხდება, აღარ ვიცი. მართლა ვერ ვხვდები, ყველა ეტაპზე წყლიდან მშრალი როგორ ამოდის. ეს მისი პერსონალური თვისებაა, რომელიც ძალიან კარგად შეითვისა ევროპაში და ახლა დიდი წარმატებით იყენებს საქართველოში.

"იმაზე, რაც სასამართლოში ხდება, წულუკიანმა ბევრი რამ იცის"

ანა დოლიძე, იუსტიციის უმაღლესი საბჭოს არამოსამართლე წევრი.

- წულუკიანის ქმედება იყო შანტაჟი. როგორც ჩანს, ის აწარმოებდა რაღაც მოლაპარაკებებს, მერე გამოვიდა გარეთ, ამ განცხადებით დააშანტაჟა ბიძინა ივანიშვილი და მიიღო, რაც უნდოდა. ეს აღარ არის იდეებზე დაფუძნებული პოლიტიკა, ეს არის შანტაჟით მიღწეული პატარ-პატარა გამარჯვებები. თეა წულუკიანის ხელმძღვანელობით დაწერილმა უამრავმა კანონმა შექმნა ის ვითარება, რომელიც დღეს გვაქვს, ვგულისხმობ ჩინჩალაძისა და მურუსიძის კონსოლიდირებას. დიდი ხანია, ვაყენებ მისი გადაყენების საკითხს, მაგრამ...

- წულუკიანი შვიდი წელია, ინარჩუნებს თანამდებობას. აქამდე შანტაჟით მოვიდა?

- არ ვიცი, მაგრამ განცხადება, რომ თუ ამას არ გამიკეთებენ, გადავდგები, შანტაჟია. ან იზიარებ გუნდის შეხედულებებს და იღებ შედეგს, ან არ იზიარებ მათ ხედვას - ეს არის პოლიტიკა. მაგრამ: "ამას თუ არ გამიკეთებენ, გადავდგები და თუ გამიკეთებენ, დავრჩები" - არის ვაჭრობა, რაც ქვეყნის მართვას არ შეესაბამება.

იმაზე, რაც სასამართლოში ხდება, ალბათ, წულუკიანმა ბევრი რამ იცის. მაგალითად, როგორ დარჩნენ ეს მოსამართლეები ადგილზე? არადა, აპირებდნენ, მიეღოთ კანონპროექტი, რომლის მიხედვით, ყველა თავმჯდომარე გათავისუფლდებოდა, მერე კი უცებ გადაიფიქრეს. ამ ყველაფრის ერთ-ერთი რგოლი იყო თეა წულუკიანი. მან ყველაფერი იცის და იმედია, პასუხისმგებლობასაც იზიარებს.

მიმდინარეობს ვაჭრობა, მაგალითად, როგორც ბანკებში ხდება - თუ მომიმატებ ხელფასს, დავრჩები, თუ არადა წავალ. ეს ვაჭრობის სტილი პირდაპირ დაკავშირებულია იმასთან, თუ როგორ იმართება ქვეყანა და იმართება, როგორც ერთი დიდი კორპორაცია. რამდენიმე წელია, გამოიკვეთა სურათი, თუ რა ხდება სასამართლო სისტემაში. წულუკიანს ბოლო ორი წლის განმავლობაში მაინც უნდა ეთქვა, ვერ მოვახერხე ამ რეფორმის წარმატებით განხორციელება და კარგად ბრძანდებოდეთო.

- სასამართლოს მიუკერძოებლობაში ჩარევის ნიშნები აშშ-ის სახელმწიფო დეპარტამენტის ანგარიშშიც მოხვდა. - ეს ანგარიში რეალურად ასახავს ყველაფერს, რასაც აქამდე ვამბობდი. ამ კლანის გამო ჩვენს ქვეყანას რეპუტაცია ელახება. ეს შეუქმნის პრობლემებს ინვესტორებსაც. ადამიანს, რომელიც საქართველოში ფულის დაბანდებას გადაწყვეტს, უნდა ჰქონდეს იმედი, რომ თუ პრობლემები შეექმნება, სასამართლო დაიცავს. თუ ჩვენს ხელისუფლებას უნდა, აქ მხოლოდ ისეთი ინვესტორები შემოვიდნენ, რომელთაც არ ადარდებთ არც დემოკრატია, არც - ადამიანის უფლებები და სასამართლო, ეს სხვა საქმეა. თუ ასე გავაგრძელეთ, მხოლოდ ასეთი ინვესტიციები დაგვრჩება.