"გახარიას საათი" პარლამენტში - ხმაურიანი დებატები და დეპუტატების "სასაცილო და სამარცხვინო ქმედებები"
2 მაისს შინაგან საქმეთა მინისტრ, გიორგი გახარიას პარლამენტში "მინისტრის საათის" ფორმატში მოუსმინეს. რამდენიმე საათიანი დებატების დროს, მინისტრს უმრავლესობისა და ოპოზიციის წევრებმა კითხვები ქვეყანაში განვითარებული საკითხებთან დაკავშირებით დაუსვეს.
ერთ-ერთი მთავარი საკითხი, რაზეც გახარიამ ისაუბრა და გარკვეული სახის კამათიც გამოიწვია მასსა და ოპოზიციას შორის, იყო პანკისის ხეობაში განვითარებული მოვლენები.
როგორც მინისტრმა აღნიშნა, შსს-სა და სუს-შორის, დღეის მდგომარეობით, ეფექტური თანამშრომლობა არსებობს და ვერავინ შეძლებს მათ უერთიერთობაში ბზარების გაჩენას იმით, რომ მათ პანკისში განვითარებულ მოვლენებთან დაკავშირებით, პასუხისმგებლობების ერთმანეთზე გადაბრალება მოუწიოთ.
"ისევე როგორც პანკისის ნაწილში, მე განვაცხადე და კიდევ ერთხელ ვიმეორებ, რომ როგორ ჩანს არასრული ანალიტიკა იყო გაკეთებული. როგორც ჩანს ჩვენს მიერაც, პირადად ჩემს მიერაც არასრულად იყო დასკვნები გაკეთებული იმ რისკების შეფასებისთვის რაც შეიძლება იქ ყოფილიყო. ეს არის ჩვენი პასუხისმგებლობა საერთო. ისევე როგორც, ყველა შესაბამის უწყებას თავისი კომპეტენცია ჰქონდა და ყველა თავის კომპეტენციის ფარგლებში ფარავდა იმ ზონალურ რისკებს, რომლებიც გააჩნია. ამიტომ, ჩვენ დღეს არავინ არ გადავანაწილებთ ამ პასუხისმგებლობას ერთმანეთზე. ვამბობთ რომ ეს იყო შეცდომა. არასაკმარისი ანალიტიკური მუშაობის შედეგად ყველა ჩვენი კომპეტენციის ფარგლებში და ეს შეცდომა არის გამოსასწორებელი, რასაც ახლა ვაკეთებთ,"- განაცხადა გიორგი გახარიამ.
მისივე თქმით, შსს თავისი უფლებამოსილების ფარგლებში ახორციელებს კონკრეტულ გეგმას, იმასთან დაკავშირებით, როგორ უნდა მოხდეს პანკისის ხეობაში მომხდარი ინციდენტის ეფექტური დაძლევა: "ამაში თუ დაგვეხმარებით მადლობას გეტყვით, იმის ნაცვლად რომ პროცენტები დაგვითვალოთ. შეგიძლიათ თქვენი უფლებამოსილების ფარგლებში სრული კონტროლის ქვეშ დააყენოთ პროცესი, ოღონდ პოზიტიური კონტროლის ქვეშ, ისე კი არა რომ ამ ტრიბუნიდან ჩიხში შეგვიყვანოთ და გვითხრათ - რას უზამთ ახლა დაიჭერთ 100 ადამიანს თუ არ დაიჭერთ?! მოვიქცევით ისე, როგორც ქვეყნისა და მოქალაქეების ინტერესებისთვის იქნება საჭირო".
შს მინისტრი პანკისთან დაკავშირებულ თემას, სამ პერიოდად ყოფს და აღნიშნავს, რომ მსგავსი სოციალური პროტესტი, ქვეყანის ნებისმიერ კუთხეში შეიძლება მომხდარიყო.
"ერთი რამე უნდა გვესმოდეს, რომ ქვეყნის უსაფრთხოების, მართლწესრიგის საკითხი არის ყველანაირ პარტიულ ინტერესზე უფრო მაღალი საკითხი და როდესაც ისეთ სათუთ თემებს, როგორიცაა მაგალითად, პანკისი, ვიყენებთ პოლიტიკური ტემპერატურის ან პოლიტიკური ქულების ან სხვადასხვა მიზეზების გამო, ჩვენი პოზიცია არის შემდეგი: როდესაც ჩვეულებრივი სოციალური პროტესტი, რომელიც შეიძლებოდა მომხდარიყო საქართველოს ნებისმიერ სხვა კუთხეში, იძენს ისეთ განმარტებებს, რომელიც შეიძინა აქ, ეს არის უბრალოდ სამწუხარო. რაც შეეხება კონკრეტულად თემას, ის უნდა დავყოთ რამდენიმე ნაწილად: რა თქმა უნდა, ყველაფერი, რაც ხდებოდა 21 აპრილამდე, თვითონ 21 აპრილი და რეაქცია და ის გეგმები, რომლებიც არის 21 აპრილის შემდეგ", - აღნიშნა მინისტრმა.
შს მინისტრს დეპუტატებმა რამდენჯერმე კითხეს დავით გარეჯის შესახებაც. გახარიას განცხადებით, ის დარწმუნებულია, რომ აზერბაიჯანთან სტრატეგიული ურთიერთობების ფარგლებში, მოხდება როგორც კულტურული მემკვიდრეობის ძეგლის, ისე საქართველოს ეკლესიის ინტერესების დაცვა.
"როდესაც ჩვენი ქვეყნის 20 პროცენტი ოკუპირებულია, საქართველოსთვის მეზობლებთან სტრატეგიული ურთიერთობა კრიტიკულად მნიშვნელოვანია. ამას თავი რომ დავანებოთ, ყველას კარგად უნდა გვესმოდეს, რომ ჩვენ გვაქვს სტრატეგიული ურთიერთობა აზერბაიჯანთან და ამ სტრატეგიული ურთიერთობის ფარგლებში, საზღვრის დელიმიტაცია-დემარკაციის პროცესში, ჩვენ შევძლებთ და დავიცავთ, როგორც ჩვენი კულტურული მემკვიდრეობის, ასევე ჩვენი ეკლესიის ინტერესებს...
დავით გარეჯის საკითხი საკმაოდ ფაქიზი, ფრთხილი საკითხია. ყველას მოგეხსენებათ, რომ ეს არის საკითხი, რომელიც მძიმედ დგას 1996 წლის შემდეგ, ეს არის პოსტსაბჭოთა მემკვიდრეობა. ერთმნიშვნელოვნად ყველას ძალიან კარგად გვესმის, რომ დელიმიტაცია- დემარკაციის საკითხი არის პრინციპული საკითხი ამ თემასთან დაკავშირებით. გარკვეული წლების განმავლობაში აქ იყო გაურკვეველი პაუზა, რომელიც სასწრაფოდ უნდა მოგვარდეს. შემიძლია გითხრათ, რომ უახლოეს პერიოდში, ალბათ, უახლოეს მთავრობაზე ახალი კომისია დემარკაციის იქნება დაკომპლექტებული და ეს სამუშაო დაიწყება ჩვენს მეზობელთან ერთად. კომისია სასწრაფოდ შეუდგება მუშაობას და შესაძლებელ ვადებში ჩვენ ყველამ უნდა ვეცადოთ, რომ ეს საკითხი ერთხელ და სამუდამოდ დაიხუროს. რამეთუ ეს არის პოსტსაბჭოთა მემკვიდრეობა, რომელიც გრძელდება ათწლეულებია. მაშინ, როდესაც ყველას კარგად გვესმის, რომ აზერბაიჯანი არის საქართველოს სტრატეგიული პარტნიორი, ეს არის ჩვენი მოძმე ერი, რა თქმა უნდა, დემარკაციის კომისიის მუშაობის ფარგლებში ერთად გადავწყვეტთ ყველა იმ პრობლემას, რომელიც ეხება როგორც კულტურული მემკვიდრეობის საკითხებს, ასევე შედის ჩვენი ეკლესიის ინტერესების სფეროში. აქ ორი აზრი არ არსებობს", - განაცხადა გახარიამ. 
გიორგი გახარიამ დამოუკიდებელი დეპუტატის ეკა ბესელიას კითხვას, არის თუ არა დაცული მოქალაქეთა პირადი ცხოვრების საიდუმლოება, ასე უპასუხა:
"ჩვენი მოქალაქეების და მათი საიდუმლოების კუთხით დაცულები ვართ თუ არა, - ეკა ბესელიას კითხვა იყო. შედარებითია ყველაფერი ქალბატონო ეკა. უპასუხისმგებლობა იქნება ახლა ჩემი მხრიდან იმ განცხადების გაკეთება, რომ სრულად დაცულები ვართ. არ შეესაბამება სიმართლეს ისიც, რომ ვთქვათ დაცულები არ ვართ. რა თქმა უნდა, ამ მიმართულებით სუსტად ვართ, ბევრი გვაქვს სამუშაო საერთაშორისო პარტნიორობის ნაწილშიც. მე სპეციალურად არ გავაკეთე ახლა კონკრეტული დაპირებები, თუმცა ის, რაც ჩვენ კონკრეტულ საქმესთან დაკავშირებით, რაც ყველაზე აქტუალური იყო, დაპირებები გავეცით, დარწმუნებული ვარ, უახლოეს პერიოდში ჩვენ ამ პირველწყაროს ვიპოვით. ამის გაცხადების აბსოლუტურად ობიექტური და ადეკვატური მიზეზები მაქვს, თუმცა ფორმალური მხარე არ მაძლევს იმის საშუალებას ამაზე უფრო დეტალურად ვისაუბრო",- განაცხადა გახარიამ.
ყურება, შენახვა, გავრცელება და კიდევ ბევრი რაღაც ერთმნიშვნელოვნად ერთი ზომის და ერთი რიგის დანაშაულია, - ასე უპასუხა ფარული ჩანაწერების გავრცელების საქმეზე უმრავლესობის დეპუტატის, ნინო წილოსანის კითხვას შს მინისტრმა გიორგი გახარიამ. მინისტრი აღნიშნავს, რომ ყურება შემთხვევითი საქციელი არააა, როგორც ეს თავად დეპუტატმა თქვა.
"ქალბატონო ნინო, თქვენ ბრძანეთ, რომ ვინც შემთხვევით უყურაო, ისინი ხომ არ გყავთ დაკავებულიო, თითქოს ეს ყურება შემთხვევითი საქციელი იყოს. ერთი რამ უნდა ვიცოდეთ - ყურება ეს არის ქმედება. ყურება, შენახვა, გავრცელება და კიდევ ბევრი რაღაც ერთმნიშვნელოვნად ერთი ზომის და ერთი რიგის დანაშაულია. როგორც კი ჩვენ ამას განვასხვავებთ, ამ საქმეში ვერანაირ პროგრესს ვერ მივაღწევთ", - აღნიშნა გახარიამ.
მანვე კომენტარი გააკეთა პრეზიდენტ სალომე ზურაბიშვილის განცხადებაზე. შეგახსენებთ, სალომე ზურაბიშვილმა "ამერიკის ხმასთან" ინტერვიუს დროს განაცხადა, რომ საქართველოში ამერიკული ბაზის აშენება რეკომენდებულად არ მიაჩნია. მისი თქმით, არაა საჭირო გადავდგათ ნაბიჯები, რომლებიც შეიძლება პროვოკაციად იქნას აღქმული.
"მე ვერ შევაფასებ პრეზიდენტის გამონათქვამს, მე გეტყვით, რომ ამერიკის შეერთებული შტატები არის საქართველოს სტრატეგიული პარტნიორი. რა თქმა უნდა, ამერიკის შეერთებულ შტატებთან ორმხრივი ურთიერთობა, როგორც უსაფრთხოების, ასევე თავდაცვის ნაწილში არის ამ ქვეყნის პრიორიტეტი", - განაცხადა გიორგი გახარიამ.
როგორც გახარიამ მედიასთან "მინისტრის საათის" დასრულების შემდგომ განაცხადა, დეპუტატთა ნაწილის მთავარი ამოცანა, პარლამენტში უბრალოდ გამოჩენაა და არა მოსმენა.
"აქ იყვნენ პატივცემული პარლამენტარები, რომლებიც მთელი დღის განმავლობაში დარბაზში არ იჯდნენ, ნახევარი საათით მოვიდნენ, რათა ხუთწუთიანი შეკითხვები დაესვათ. ეს უბრალიდ სასაცილო და სამარცხვინოა",- განაცხადა გიორგი გახარიამ.
"ინტერპრესნიუსის" მასალების მიხედვით
იხილეთ ვიდეო