"მოლოტოვის კოქტეილი"ქართულ პოლიტიკაში
"ქართული პარტია" რუსეთთან ურთიერთობის მოგვარებას გპირდებათ"
"როგორც ჩვენი ქვეყნის რიგით მოქალაქეს, აღარ შემეძლო ამეტანა ის, რაც საქართველოში ხდება... და ამიტომაც დავიწყე პოლიტიკური საქმიანობა", - ამბობს "ქართული პარტიის" ერთ-ერთი ლიდერი ეროსი კიწმარიშვილი.
- ჩვენს ქვეყანას აქვს უზარმაზარი რესურსი, რომ ძლიერი იყოს, ამის ნაცვლად კი ყველაზე ჩამორჩენილი სახელმწიფოა რეგიონში. მთლიანი შიდა პროდუქტი ერთ სულ მოსახლეზე 2.500 დოლარს შეადგენს, მაშინ როცა აზერბაიჯანში ეს მაჩვენებელი 5.000 დოლარს აჭარბებს, ყაზახეთში - 7.000-ს, თურქმენეთში - 3.500-ს, სომხეთში კი 2.615-ს. სააკაშვილი კი გვარწმუნებს, ქვეყანა ავაყვავეო. ჩვენი ცხოვრება კი დღითი დღე მოდელირებულ "ქრონიკას" ემსგავსება.
ამიტომაც არის საჭირო ახალი ძალა, რომელსაც რეჟიმის შეცვლის უნარი შესწევს. მე, როგორც ყოფილ ელჩს, ასეთად სწორედ "ქართული პარტია" მიმაჩნია. ვფიქრობ, ჩემი კავშირების გამოყენებით შეიძLლება რუსეთთან ურთიერთობის მოგვარება, რაც ეკონომიკური წინსვლის დაწყების გარანტია იქნება. ბაზარი გაგვეხსნება, მოვიზიდავთ ინვესტიციებს. დარწმუნებული ვარ, ეს არის ქართველი საზოგადოების მთავარი დაკვეთაც. რუსეთთან ურთიერთობის აღდგენა ქვეყნის უსაფრთხოების ხარისხსაც გაზრდის.
მიხეილ სააკაშვილმა გააცამტვერა "ვარდების რევოლუციის" რამდენიმე ძალიან მნიშვნელოვანი იდეა, რომელთაგან ერთ-ერთი პოლიტიკური წნეხისგან თავისუფალი, დამოუკიდებელი, ძლიერი მედია იყო. ამიტომ დავუთმე დრო "მაესტროს" ახალი მენეჯმენტის გამართვას, რისი წყალობითაც მაყურებელი დაბალანსებულ, მიუკერძოებელ ახალ ამბებს იგებს.
"ვარდების რევოლუციის" შემდეგ დავრწმუნდი, რომ ვერც ტელევიზია და თუნდაც ვერც რევოლუცია ქვეყანას წინ ვერ წაიყვანს, თუ არ შეიცვალა პოლიტიკური გარემო და განვითარების ვექტორი. ამ მიზნით პოლიტიკურმა ძალებმა ურთულესი მოლაპარაკებების შემდეგ გაერთიანება მოახერხეს. "ქართული პარტია" ძლიერი ლიდერებისგან დაკომპლექტდა.
გადაჭარბებული არ იქნება, თუ ვიტყვი, რომ ამჟამად "ქართული პარტიის" გარდა სხვა პოლიტიკურ ძალას ნაკლებად ჰყავს ასეთი მასშტაბის პოპულარული, გამოცდილების მქონე რამდენიმე ლიდერი. ხშირად გამიგონია, ოპოზიციურ ძალებს მხოლოდ სააკაშვილის რეჟიმის შეცვლის სურვილი აერთიანებთო. მე კი მიღებული გამოცდილებიდან გამომდინარე ვიტყვი, რომ რეჟიმის შეცვლა არის ინსტრუმენტი შემდეგი მიზნის მისაღწევად: უნდა შევინარჩუნოთ თვითმყოფადობა!
სააკაშვილივით არ უნდა ვიმოძრაოთ ქართველი ხალხის ისტორიული ხაზის საწინააღმდეგოდ. ქვეყნის უსაფრთხოება საქართველოს განვითარებისთვის ერთ-ერთი მთავარი ასპექტია, რისთვისაც საქართველო არა სუპერსახელმწიფოების კონფრონტაციის ზონად, არამედ რეგიონში მშვიდობის დამყარებისთვის სათანამშრომლო ცენტრად უნდა ვაქციოთ. საამისოდ უპირველესად რუსეთთან ურთიერთობის ნორმალიზებაა საჭირო. ჩვენ კი ამისთვის აუცილებელი გამოცდილებაც გვაქვს და სწორი ხედვაც.
მერწმუნეთ, ლევან გაჩეჩილაძე, ირაკლი ოქრუაშვილი, სოზარ სუბარი, კოკა გუნცაძე, ეროსი კიწმარიშვილი ერთგვარი "მოლოტოვის კოქტეილია" ქართულ პოლიტიკაში. ეს არის ძლიერი მუხტი, რომელიც ნებისმიერ პოლიტიკურ პროცესს დააჩქარებს და სასურველ შედეგამდეც მიიყვანს.
- რა მიზანს ისახავდა, თავის დროზე, ბიძინა გეგიძის აგარაკზე ოპოზიციის ლიდერების შეხვედრა?
- იმ ცნობილ შეხვედრას ესწრებოდნენ ზურაბ ნოღაიდელი, ლევან გაჩეჩილაძე, კახა კუკავა, კობა დავითაშვილი, ზვიად ძიძიგური, ირაკლი ალასანია და ა.შ. სხვათა შორის, ალასანიას იქ ყოფნის თაობაზე ინფორმაცია არ გახმაურებულა. სამაგიეროდ მედიასაშუალებებმა გაავრცელეს დეზინფორმაცია, თითქოს შეხვედრას ნინო ბურჯანაძეც ესწრებოდა. შეხვედრის განხილვის საგანი პრაიმერის იდეისთვის მხარდაჭერა იყო, მაგრამ საერთო ენის გამონახვა ვერ მოხერხდა.
- რა მიზნით მართავდით ეტაპობრივად ბურჯანაძესთან კონსულტაციებს?
- ნინო ბურჯანაძესთან დიდი ხნის მეგობრობა მაკავშირებს. სხვათა შორის, მას "ქართული პარტიის" ერთ-ერთ ლიდერადაც მოვიაზრებდით. ბოლო 5 თვის განმავლობაში ამის თაობაზე ვმართავდით კონსულტაციებს. სამწუხაროდ, ნინომ ვერ გადალახა პოლიტიკური ამბიციები. მიუხედავად ამისა, ახლაც არ ვიტყვი, რომ ოპოზიციის სხვადასხვა ფლანგზე ვართ. დარწმუნებული ვარ, ქვეყანას კრიზისიდან ერთიანი ძალით გამოვიყვანთ.
- მაგრამ "კვირის პალიტრასთან" საუბრისას ოქრუაშვილმა 25 ნოემბრის აქციას (რომელსაც "სახალხო კრება" ატარებს) ნინო ბურჯანაძის პარტიული ღონისძიება უწოდა.
- ირაკლიმ გააკეთა განცხადება იმის თაობაზე, რომ საზოგადოებისთვის გადაჭარბებული მოლოდინის შექმნა კარგ შედეგს არ მოიტანს.
- როგორც ცნობილია, "სახალხო კრების" აქციას "ეროვნული ფორუმიც" უერთდება. როგორ აფასებთ ამ ფაქტს?
- სხვისი გადაწყვეტილებების შეფასებას არ დავიწყებ. "ქართულ პარტიას" მიაჩნია, რომ მისი ადგილი ქართველი ხალხის გვერდით არის და იქნება. ღმერთმა ნუ ქნას, საზოგადოებას საფრთხე დაემუქროს, ადეკვატურ პასუხს გავცემთ მოძალადეებს და ხალხის ინტერესებს დავიცავთ.
- თქვენც ხომ არ აპირებთ 25 ნოემბერს აქციაზე მისვლას?
- ცოტა არ იყოს, არაკორექტული კითხვაა... ჯერ 24 ნოემბერს პარტიის დამფუძნებელ ყრილობას ჩავატარებთ. საღამოს, როცა ყრილობა დამთავრდება, ამ საკითხზე ჩვენი აზრის გაგების საშუალებაც გექნებათ.
- რას ეტყვით საზოგადოების იმ ნაწილს, რომელსაც მიაჩნია, რომ ოპოზიციურად განწყობილი მოსახლეობა ორ ნაწილად დაიყო, რომელთაგან ერთი ყრილობაზე მივა, მეორე - "სახალხო კრების" აქციაზე?
- ჩემი აზრით, ეს ორი ღონისძიება ერთმანეთს ხელს არ უშლის. მოგეხსენებათ, ყრილობის მომზადებას დიდი მუშაობა სჭირდება, თანაც ვჩქარობთ კიდეც და ჩვენი დღის წესრიგიდან გამომდინარე, ყრილობის დანიშვნის თარიღი 24 ნოემბერს დაემთხვა, რითაც, მე მგონი, პრობლემა არ იქმნება.
- რამდენად ხელსაყრელია ეს პერიოდი ოპოზიციის აქტიურობისთვის, მაშინ როცა ლისაბონში სააკაშვილსა და ობამას შორის შეხვედრა გაიმართა?
- ჩვენ ვლაპარაკობთ ქვეყნის შიდაპოლიტიკურ კრიზისზე და ამ შემთხვევაში უმნიშვნელოა, რა დღის წესრიგი აქვს ხელისუფლებას საქართველოს ფარგლებს გარეთ. ისე, თვითონ ნატოს სულ სხვა პრობლემები აქვს გადასაწყვეტი: საბიუჯეტო დეფიციტი, რომელიც 500 მილიონ ევროს შეადგენს; სამხედრო კრიზისი ავღანეთში; რუსეთთან ურთიერთობა... აქედან გამომდინარე, საქართველო მის დღის წესრიგში არც დგას.
- მაგრამ ობამასა და სააკაშვილის შეხვედრა საქართველოს პრეზიდენტისთვის მხარდაჭერადაც აღიქმება.
- ამგვარ მოსაზრებას კატეგორიულად არ ვეთანხმები. შეგახსენებთ, "ვარდების რევოლუციამდე" აშშ-ის ადმინისტრაცია პრეზიდენტ შევარდანაძესაც უჭერდა მხარს.
თუკი ჩვენ მოვალთ ხელისუფლებაში, ძალიან კარგი დამოკიდებულება გვექნება ყველა პარტნიორ ქვეყანასთან, რასაც არა ოპონენტებთან საბრძოლველად, არამედ საქართველოს საკეთილდღეოდ გამოვიყენებთ. სააკაშვილი ათეულობით მილიონს ხარჯავს საგარეო პიარზე, რითაც ძალაუფლების შენარჩუნებას ცდილობს.
შეკვეთილი სტატიებითა და სხვა პიარტექნოლოგიებით სურს ავტორიტარიზმი დემოკრატიის ყალბ მანტიაში გაახვიოს. დიდ ფულს უხდის უცხოურ ლობისტურ კომპანიებს იმისთვის, რომ ობამასთან შეხვედრა მოახერხოს. პარალელურად, რუსეთის პოლიტელიტასთანაც ცდილობს კავშირის დამყარებას და ამისთვისაც არ იშურებს ფულს.
შუამავლად კი იყენებს რუსეთში მოღვაწე ქართველების ჯგუფს, გავლენიან რუს ჟურნალისტებს, ზოგჯერ მერაბიშვილსაც კი, მაგრამ ჯერჯერობით არაფერი გამოსდის. რა თქმა უნდა, ერთ მშვენიერ დღეს ნათელს მოვფენთ, რა თანხები იხარჯება ხალხის ჯიბიდან ყოველივე ამისთვის.
- მახსოვს, თავის დროზე შეცდომად ჩათვალეთ, როცა ოქრუაშვილმა ერთ-ერთი სიმაღლე აიღო ცხინვალში (2004 წელს) და ამის გამოსწორება ჟვანიას დამსახურებად მიიჩნიეთ. ამ თემაზე თუ გისაუბრიათ თავდაცვის ექსმინისტრთან?
- ძალიან ბევრ თემაზე გვისაუბრია და მერწმუნეთ, ამა თუ იმ ფაქტის კარგი და ცუდი მხარეც გაანალიზებული გვაქვს. მაგრამ ის, რაც მან იმ მომენტში გააკეთა (ცხინვალში ერთ-ერთი სიმაღლის გაკონტროლება იგულისხმება), არ გახლდათ მისი იმპროვიზაცია ან ინიციატივა. მაშინ საქართველოს პრეზიდენტი რუსეთთან ურთიერთობის დესტაბილიზაციას გეგმავდა. ასეთი იყო მისი პოლიტიკური დაკვეთა. ყველა ამ ტიპის სამხედრო-პოლიტიკური გადაწყვეტილება პირადად სააკაშვილის კისერზეა, ისევე როგორც 2008 წლის ომი რუსეთთან.