"რუსული საფრთხეები არც ერთი ხელისუფლების პირობებში არ გაქრება, სულ პრორუსული მთავრობა რომც მოვიდეს ხელისუფლებაში"
"რუსული საფრთხეები არც ერთი ხელისუფლების პირობებში არ გაქრება, სულ პრორუსული მთავრობა რომც მოვიდეს ხელისუფლებაში"
"რუსული საინფორმაციო პროპაგანდის გზავნილია ის, რომ თითქოს ნატოში ინტეგრაცია ტერიტორიების დაკარგვად დაგვიჯდება"

ამ ცოტა ხნის წინ თბილისის საერთაშორისო კონფერენციაზე ნატოს ყოფილი გენერალური მდივნის ანდერს ფოგ რასმუსენის განცხადებას, რომ ოკუპირებული ტერიტორიები საქართველოს ნატოში ინტეგრაციის შემაფერხებლად არ უნდა იქცეს და საქართველომ უნდა განიხილოს ჩრდილოატლანტიკურ ალიანსში გაწევრება ოკუპირებულ აფხაზეთსა და ე.წ. სამხრეთ ოსეთზე ნატოს წესდების მე-5 მუხლის გავრცელების გარეშე, დიდი რეზონანსი მოჰყვა. შეიძლება ითქვას, ზოგიერთმა პოლიტიკურმა ძალამ თუ საზოგადოებრივმა ჯგუფმა მიზანმიმართულად
სცადა ეს
ისე წარმოედგინა, რომ რასმუსენი საქართველოს აფხაზეთსა და ე.წ. სამხრეთ ოსეთზე უარის თქმას სთავაზობდა. არადა, ეს მოსაზრება არაერთხელ მოგვისმენია საერთაშორისო პოლიტიკის ექსპერტებისგან, რომლის თანახმადაც, ნატოში საქართველო შესაძლებელია გაწევრდეს საერთაშორისო სამართლით აღიარებულ საზღვრებში, ანუ ოკუპირებული ტერიტორიებით, მაგრამ სანამ მათ არ დავიბრუნებთ, მათზე არ გავრცელდება ნატოს წესდების მე-5
მუხლი.

საერთაშორისო ურთიერთობების ექსპერტი გიორგი გობრონიძე შექმნილ ვითარებას აფასებს და ამბობს, რომ 2008 წელს ბუქარესტის სამიტზე საქართველომ ვერ მიიღო ნატოში გაწევრების სამოქმედო გეგმა, თუმცა ნატომ აიღო ვალდებულება, რომ ჩვენი ქვეყანა გახდება ნატოს წევრი. მაგრამ საკითხი დგას ასე: ეს როდის და რა ფორმით მოხდება?

გიორგი გობრონიძე:
- ოკუპირებულ ტერიტორიებზე მე-5 მუხლის გავრცელების გარეშე ნატოში გაწევრება ჯერჯერობით ჰიპოთეზაა, რომელსაც აქვს არსებობის უფლება. ეს საკითხი განსჯის თემად შეიძლება იქცეს მაშინ, როდესაც რეალურად დაიწყება საქართველოს ნატოში გაწევრებაზე მოლაპარაკებები. დღევანდელი ვითარებიდან გამომდინარე, არც ჩვენ ვართ ამ პასუხისმგებლობის ასაღებად მზად და არც ნატო ჩვენთან უფრო მჭიდროდ თანამშრომლობისთვის. ამას დრო სჭირდება.

რატომ არ არის საქართველო მზად ნატოსთვის?


- ჩვენთან არ არსებობს გადაწყვეტილების მიღების ინსტიტუციურად გამართული მექანიზმები. ხშირად ერთი პირი და მასთან დაახლოებული წრე იღებენ ქვეყნისთვის სტრატეგიული მნიშვნელობის გადაწყვეტილებებს. არ არსებობს გადაწყვეტილების მომზადების, შემოწმების, აღსრულების, მონიტორინგისა და ინპლემენტაციის მექანიზმები, რაც აქვს ყველა კონსოლიდირებულ დემოკრატიას. გარდა ამისა, ჩვენი ეკონომიკური პოტენციალი ძალიან სუსტია, ბევრი პარამეტრით წავედით უკან. გავიხსენოთ თუნდაც პირდაპირი უცხოური ინვესტიციების განახევრება.
გიორგი გობრონიძე
უაღრესად მნიშვნელოვანია ამ საკითხების მოგვარება და ამაში გვეხმარება ევროკავშირთან თანამშრომლობა, უნდა დაგვეხმაროს ნატოც. დასავლური ინტეგრაცია არ არის ჩვენთვის თვითმიზანი, ის უმნიშვნელოვანესი ინსტრუმენტია ჩვენი განვითარებისთვის.

რას უნდა ველოდოთ დეკემბრის ნატოს სამიტისგან?

- საქართველომ მართლაც პირნათლად შეასრულა ნაკისრი საერთაშორისო ვალდებულებები და ლოგიკურია, რომ გადავიდეთ თანამშრომლობის ახალ ეტაპზე, მაგრამ ეს არ ნიშნავს ნატოში საქართველოს დაჩქარებული წესით გაწევრებას. კრემლიდან კი გვესმის განცხადებები, თურმე საქართველო შეიძლება დაჩქარებული წესით გაწევრდეს ნატოშიო, მაგრამ ეს ამ ქვეყნის ხელისუფლების ფობიის ბრალია, რომელიც საქართველოს საკუთარი ექსკლუზიური გავლენის ზონად მიიჩნევს. ვფიქრობ, მოსკოვში აცნობიერებენ იმასაც, რომ ხელახალი სამხედრო აგრესია საქართველოში გაცილებით წამგებიანი იქნება რუსეთისთვის, ვიდრე 2008 წელს იყო. თუმცა ძალიან დიდ ფულს ჩადებენ იმაში, რომ საქართველოში ნატოში გაწევრების იდეა დაამცრონ, რომ საფრთხე დაგვანახონ, ნაცვლად უსაფრთხოებისა.

ამასთან, რუსეთი შეეცდება საქართველო იყოს პოლიტიკურად და ეკონომიკურად არასტაბილური და სუსტი სახელმწიფო, რადგან ასეთი ქვეყანა ძნელად გაწევრდება ნატოში.

საქართველოს ხელისუფლება და რუსეთი - ბრალდებები და რეალური პოლიტიკა

- ძალიან უპასუხისმგებლო მგონია, განსაკუთრებით პოლიტიკური ელიტისგან, იმის თქმა, რომ ეს ხელისუფლება რუსეთის ინტერესებისთვის მუშაობს, რომ თურმე ახალი პრემიერი გახარია რუსეთის კაცია.

შესაძლოა რუსეთთან კომუნიკაციის თაობაზე ხელისუფლებისა და ოპოზიციის შეხედულებები განსხვავებულია, მაგრამ ვერ ვიტყვი, რომ საქართველოს ხელისუფლება ოკუპანტის ინტერესების გამტარებელია. 2015 წელს საქართველოში გაიხსნა ნატოს სასწავლო ცენტრი, ავამოქმედეთ ევროპასთან ასოცირების ხელშეკრულება, მივიღეთ შენგენის ქვეყნებში უვიზოდ მიმოსვლის უფლება, გაიმართა არაერთი მულტინაციონალური სამხედრო სწავლება. მოკლედ, ბევრი ისეთი რამ გაკეთდა, რაც გვაძლევს იმის თქმის საფუძველს, რომ სახელმწიფო დასავლელი პარტნიორების წინაშე აღებული ვალდებულებების ერთგულია.

მეორე საკითხია ის, თუ როგორ ხედავს პოლიტიკური ელიტა რუსეთთან კომუნიკაციის გზებს.
სამწუხაროდ, ამ მიმართულებით არც მთავრობაში და არც ოპოზიციაში არ არიან ჩამოყალიბებული. საჭიროა რუსეთთან ურთიერთობა და მოლაპარაკება, რაზეც ჩვენი დასავლელი პარტნიორებიც მიგვანიშნებენ, მაგრამ ამ მოლაპარაკებებში საქართველო ერთიერთზე არ უნდა დარჩეს რუსეთთან, რომელიც ცდილობს ქართველები, აფხაზები, ოსები და რუსები ერთად დასხას, ვითომ ოთხმხრივ ფორმატში, მაგრამ ეს იქნება რეალურად სამი ერთის წინააღმდეგ ფორმატი.
გავიხსენოთ აბაშიძე-კარასინის ფორმატი, ამ ფორმატის საშუალებით ბევრი ტყვე გამოიხსნეს, მაგრამ, იმავდროულად, ჰუმანიტარულის გარდა, ოკუპანტი სახელმწიფო, პრაქტიკულად, წარმოგვიდგა როგორც ერთ-ერთი წამყვანი ეკონომიკური პარტნიორი. რაში სჭირდება რუსეთს ეს? - იმისთვის, რომ ჰქონდეს ჩვენზე ზეწოლის ბერკეტი, რომელიც 2008 წლის აგვისტოს ომის შემდეგ ჩვენი ტერიტორიების აღიარებით ხელიდან გამოეცალა.

უახლოეს მომავალში ეს იქნება ჩვენთვის ძალიან დიდი გამოწვევა, თუ სწრაფად არ მოვახდენთ ეკონომიკის დივერსიფიცირებას და რუსეთზე დამოკიდებულებას არ შევამცირებთ. აქ მნიშვნელოვანია, ჩვენი საგარეო პოლიტიკა მიდიოდეს ისეთი გზით, რომ ქართულმა ეკონომიკამ თვითონ შეძლოს გასვლა სხვადასხვა ეკონომიკურ ბაზარზე, ხოლო შიდაეკონომიკური პოლიტიკა დაიგეგმოს იმგვარად, რომ ქართულმა ეკონომიკამ, სულ მცირე, შიდა ბაზრები მაინც დააკმაყოფილოს. უნდა გავითვალისწინოთ, რომ რუსული საფრთხეები არც ერთი ხელისუფლების მმართველობისას არ გაქრება, სულ პრორუსული მთავრობა რომც მოვიდეს ხელისუფლებაში. 1994-1999 წლებში არავინ ლაპარაკობდა ნატოსა და ევროკავშირზე, ვიყავით დსთ-ის წევრები და ვაკეთებდით ყველაფერს, რასაც რუსეთი გვეუბნებოდა და რამე დაგვითმო რუსეთმა ამის პასუხად? - არაფერი. რუსეთის ფედერაცია როცა ვერ გრძნობს ძალას, არაფერს თმობს, თუ ერთიერთზე დავრჩებით მასთან, ჩვენგან ძალას ვერ იგრძნობს.…

როგორ შეიძლება ჩაერიოს რუსეთი ქართულ არჩევნებში?

- რუსეთს მაინცდამაინც დიდი შრომა არ სჭირდება, რადგან მის გასაკეთებელს ხშირად ჩვენვე ვაკეთებთ. პოლიტიკური აქტორები რუსეთის გარეშეც კარგად ახერხებენ საზოგადოების პოლარიზაციას, რაზეც მუშაობენ რუსული სპეცსამსახურებიც, ჩვენი პოლიტიკური ელიტა კი მათ საქმეს აშკარად უმსუბუქებს.

უნდა ველოდოთ, რომ გაიზრდება რეაქციული, რადიკალური და ექსტრემისტული ჯგუფების ხელშეწყობა, მათ შორის ფინანსურიც. გააქტიურდებიან ე.წ. კონსერვატიული პარტფორმები, რომელთაც რეალურ კონსერვატიზმთან საერთო არაფერი აქვთ. ესენი არიან პლებეური, ულტრამემარჯვენე პოპულისტური ჯგუფები, რომლებიც კონსერვატორების სახელს ირქმევენ. საინფორმაციო ველი გაჯერდება ანტიდასავლური ინფორმაციით. იქნება მცდელობა, რომ გაიზარდოს პარლამენტში რუსული პოლიტიკური დღის წესრიგისადმი ლოიალურად განწყობილი პოლიტიკური ძალების რიცხვი.

ველი, რომ შეიცვლება რუსული საინფორმაციო გზავნილები კონსპირაციულიდან ექსპერტულისკენ და უფრო მეტად არგუმენტირებული გახდება. შესაბამისად, ჩვენ მოვისმენთ არა აშკარად პრორუსულ გზავნილებს, არამედ ე.წ. პრაგმატულ გზავნილებს - რომ უნდა ვიპოვოთ ბალანსი, ვითანამშრომლოთ ნატოსთან რუსეთთან კომუნიკაციით, გვინდა გაწევრება ნატოში, მაგრამ თან რუსეთს უნდა დავეკითხოთ, რომ მან ჩვენში საფრთხე არ დაინახოს. გახშირდება ლაპარაკი, რომ საქართველო მარტო დასავლეთზე არ უნდა იყოს მიბმული და უნდა ვიპოვოთ ახალი საგარეო-პოლიტიკური როლი, გავხდეთ ხიდი და ა.შ. რა თქმა უნდა, ეს გარკვეულწილად შეფარული ნეიტრალიტეტის იდეაა, რაც გულისხმობს რუსეთის პერიფერიულ და ბუფერულ სახელმწიფოდ ჩამოყალიბებისკენ მოწოდებას.

თუ დავრჩებით დასავლური მხარდაჭერის გარეშე, რუსეთთან პირისპირ, როგორ ფიქრობთ, რას გააკეთებს რუსეთი - ერთ დღეში დაგვიბრუნებს ტერიტორიებს? ის შეეცდება ისე სამაგალითოდ დაგვსაჯოს, რომ სხვა ქვეყნებმა აღარასდროს იფიქრონ რუსული ორბიტიდან გასვლაზე.

საქართველოში ამ ყველაფრის საწინააღმდეგოდ პროდასავლური ძალები უნდა შეთანხმდნენ საქართველოს საგარეოპოლიტიკურ პრინციპებზე. უნდა აუხსნან მოსახლეობას, რომ შეიძლება შიდა პოლიტიკურ საკითხებში ვერ თანხმდებიან, მაგრამ არსებობს საკითხები, რომლებზეც დავა არ შეიძლება. ჩვენთან კი ყველაფერი პირიქით ხდება, მიუყრიან რაღაც რიცხვებს მოსახლეობას, მაგალითად, პენსიონერებს დაჰპირდებიან პენსიის გაზრდას ამდენი და ამდენი ლარით და ეს არის ჩვენი მთელი საარჩევნო პროცესი. ეს ყველაფერი იმაზე მიუთითებს, რომ ქვეყანაში პოლიტიკური კლასი ჯერ კიდევ არ ჩამოყალიბებულა.

ერთი სიტყვით.....
17 ოქტომბერი 2019 13:22
ჩვენ არაფერში გვჭირდება ორგული დასავლელი მეგობრები, რომლებიც ყოველთვის უწევენ ანგარიშს პუტინის პოლიტიკას მითუმეტეს საქართველოსთან მიმართებაში!
გლახუნა
17 ოქტომბერი 2019 13:19
საღი აზრი- მსჯელობა , მაგრამ ბოლომდე პირდაპირი და ობიექტური უნდა იყო იყოთ - არსებული ხელისუფლება არის რუსეთის- კრემლის მძევალი, მით კრემლის ინტერესებების განმახორციელებელი ... თორემ ნამდვილად არ გვექნებოდა დღეს - ,,საუკეთესო,, მე-7-ე წელს დასავლური პასუხისმგებლობის მქონე ინვესტიციები 50 %-ტით შემცირებული, ანუ ისევ აღორძინებული კორუფცია, კრიმინალი, ნეპოტიზმი, მით დაკნინებული სახელმწიფო ინსტიტუტები, უკიდურესად დაკნინებული სახელმწიფო უსაფრთხოება, თითქმის ჩამოშლილი ეკონომიკა ( რუსეთზე-ც კი დამოკიდებული ?!!) , შეწყვწტილი სტრატეგიული მნიშვნელობის ეკონომიკური პროექტები და მით გაუფასურებული ლარის კურსი , ანუ სრული ეკონომიკური - სოციალური უპერსპექტივობა, ანუ არსებული სიღატაკე ... ეს გ ა ნ ხ ო რ ც ი ლ დ ა 2012 წლიდან ეტაპობრივად და მიზანმიმართულად, სწორად დასავლურ პროგრესულ სამყაროსთან ეტაპობრივი ჩამოცილებისათვის ... ასე რთული გასაგები ა რ არის და არც ისე შეუმჩნეველი, რომ მას ვერ ხ ე დ ა ვ დ ე ს ნებისმიერი მოაზროვნე მოქალაქე (!) და ის რაზეც ხელის მოაწერა ივან-ა-შვილებმა , ანუ ასოცირებას თუ უვიზო მიმოსვლას, ან ნატო-ს ცენტრის შექმნას - ეს ინერციული პროცესი იყო დაწყებული ჯერ კიდევ 2004-07 წლებიდან წარმატებული რეფორმების შედეგად და მასზე ა შ კ ა რ ა დ უარის თქმა სერიოზულ პრობლემებს შეუქმნიდათ - 2016 წლის არჩევნებზეც, ყველა არჩევნებზე, ამიტომ ... - კიდევ უფრო დავაკონკრეტებ - რუსულ -აზიური ავტორიტარულ + ოლიგარქიულ კრიმინალ კლანური მმართველობის პოლიტიკური სისტემით ვერც თანამედროვე სახელწიფო ინტიტუტებს შექმნი, მით ვერც უსაფრთხოებას უზრუნველყოფ, მით ვერც ეკონომიკას ვ ე რ ა ს ო დ ე ს განავითარებ და ვერც ,,ევროკავშირსა,, და ვერც ნატო-სა ვერასოდეს შევალთ , მხოლოდ არსებული ხელისუფლებისაგან ისევ დ ე მ ა გ ო გ ი ა - პროპგანდა ამ მიმართულებებით (!) ასე რომ -არსებული ხელისუფლების მიმართ მსუბუქი კრიტიკა - არაფრის მომცემი და უეფექტო დარჩება!
მედეა
17 ოქტომბერი 2019 12:28
შესანიშნავი ანალიზია, ყოჩაღ! უნდა გახშირდეს ასეთი სახის სტატიები, თორემ "პატრიოტთა ალიანსი" რ ე ვ ო ლ უ ც ი ი თ გვემუქრება, თითქოს აღფრთოვანებას იწვევდეს რევოლუცია ჩვენში, ნეტავი რა რევოლუციებიც ვნახეთ--არ გვენახა! სამხედრო მ ი უ მ ხ რ ო ბ ლ ო ბ ი ს პროპაგანდით---დიდ დანაშაულს ჩადის ი რ მ ა ინაშვილი და თარხან მოურავი! უკრაინამ თავისი ბირთვული პოტენციალი რუსეთისა და ა. შ. შ-ს . თ ა ვ დ ე ბ ო ბ ი თ ნებაყოფლობით დათმო-სამხედრო მიუმხრობლობის ე გ ი დ ი თ--და რაც მ ო ი გ ო ხომ კარგად ჩანს. ამის შემხედვარე---მსგავს ს ი ს უ ლ ე ლ ე ე ბ ს თუ ჩავიდენთ--ახი იქნება ჩვენზე. ხალხმრავალ აქციებს რომ მშვიდობიანად ატარებს ეს პოლიტიკური ძალა---ვინ ჰყავთ ფულის გადამხდელი?, რატომ ა ფ ი ნ ა ნ ს ე ბ ე ნ ნეიტრალიტეტის მქადაგებელ ძალებს--დაავიწყდათ ჟ ო რ დ ა ნ ი ა ს ფიასკო? გააძლიერეთ პ რ ო პ ა გ ა ნ დ ა ნატოში გაწევრიანების ა უ ც ი ლ ე ბ ლ ო ბ ა ზ ე. სხვა საშველი არ გ ვ ა ქ ვ ს!

div>
რუბრიკის სხვა სიახლეები
როგორ შეაფასებთ  იმ მაჟორიტარების პოზიციას, რომლებიც მხარს არ უჭერენ პროპორციულ საარჩევნო სისტემაზე გადასვლის კანონპროექტს?
თქვენი აზრი მნიშვნელოვანია!
როგორ შეაფასებთ იმ მაჟორიტარების პოზიციას, რომლებიც მხარს არ უჭერენ პროპორციულ საარჩევნო სისტემაზე გადასვლის კანონპროექტს?
გაზეთის სტატია. მიიღეთ წვდომა
გაზეთის სტატია. მიიღეთ წვდომა
გაზეთის სტატია. მიიღეთ წვდომა