"დღეს "ფეისბუქზე" რომ შევედი, თავისუფლად ამოვისუნთქე, რადგან ადრე "ტროლები" და "ბოტები" იყვნენ შემოვარდნილი"
დღეს დილით, როცა "ფეისბუქზე" შევედი, ძლივს ამოვისუნთქე თავისუფლად, რადგან ადრე "ტროლები" და "ბოტები" იყვნენ ხოლმე შემოვარდნილი და ყოველდღიურად უამრავ კომენტარს აკეთებდნენ, - ამის შესახებ "ახალი საქართველოს“ ლიდერმა გიორგი ვაშაძემ ჟურნალისტებს განუცხადა.
მისივე შეფასებით, ძალიან დიდი და მნიშვნელოვანი ნაბიჯი გადადგა "ფეისბუქმა", კომპანიამ, რომელმაც უზარმაზარი "შავი ხვრელი“ აღმოაჩინა ქართულ "ფეისბუქ“ სივრცეში.
"ძალიან სერიოზულად შემცირდა "ფეისბუქიუზერების" საერთო რაოდენობა, რადგან ასობით ათას "ტროლზეა" საუბარი, რომელიც "ქართულ ოცნებას" ჰქონდა გაკეთებული. ეს არის მწყობრი ნაბიჯი, რასაც ჩვენი მეგობარი ქვეყნები, პატნიორები ამ მიმართულებით დგამენ და ამ მწყობრი ნაბიჯებით აუცილებლად, დანაშაულებრივი სისტემა,რომელიც "ქართულმა ოცნებამ" ჩამოაყალიბა, დამარცხდება", - განაცხადა ვაშაძემ.
შეგახსენებთ, რომ "ფეისბუქმა“ საქართველოს ხელისუფლებასთან დაკავშირებული ასობით გვერდი, ანგარიში და ჯგუფი წაშალა.
"წავშალეთ 39 ქართული "ფეისბუქ“ ანგარიში, 344 გვერდი, 13 ჯგუფი და 22 "ინსტაგრამ“ ანგარიში, რომლებიც ჩართულები იყვნენ კოორდინირებულ არაავთენტურ ქცევაში“,- ამის შესახებ კომპანია "ფეიბუქის“ მიერ გავრცელებულ განცხადებაშია ნათქვამი.
"ინტერპრესნიუსი"