"ცხინვალი ასლან ბჟანიას მიერ გაკეთებული განცხადებებით შეშფოთებულია" - კვირის პალიტრა

"ცხინვალი ასლან ბჟანიას მიერ გაკეთებული განცხადებებით შეშფოთებულია"

ოკუპირებული ცხინვალის ე.წ. პარლამენტის საგარეო პოლიტიკისა და საპარლამენტთაშორისო ურთიერთობების კომიტეტის ხელმძღვანელის ზაზა დრიაევის თქით, ცხინვალი შეშფოთებულია "აფხაზეთის ოპოზიციის ლიდერის, ალსან ბჟანიას მიერ გაკეთებული განცხადებებით, საქართველოსა და აფხაზეთს შორის ეკონომიკურ სფეროში დიალოგის დამყარების შესახებ". მისი თქმით, ამისთვის მხარეებმა თავდაპირველად ნდობა უნდა აღადგინონ.

"ჩვენ, რა თქმა უნდა, ცოტა შეშფოთებულნი ვართ ამ ქმედებებით. მაგრამ, ვისთან და როგორ წარმართონ დიალოგი, ეს აფხაზეთის საშინაო საქმეებია და აფხაზი ხალხის არჩევანია. ჩვენ ყურადღებით ვაკვირდებით მოძმე რესპუბლიკაში განვითარებულ მოვლენებს", - განაცხადა დრიაევმა.

მისივე თქმით, "სამხრეთ ოსეთი" არ აპირებს საქართველოსთან დიალოგი აწარმოოს მანამ, ვიდრე თბილისი არ ცნობს რესპუბლიკის დამოუკიდებლობას და მხარეები ხელს არ მოაწერენ მემორანდუმს ძალის გამოუყენებლობის შესახებ.

შეგახსენებთ, რომ ოკუპირებული აფხაზეთის ოპოზიციის ლიდერმა, ასლან ბჟანიამ "ინტერპრესნიუსთან" ინტერვიუში განაცხადა, რომ თბილისსა და სოხუმს შორის "დიალოგი უნდა იყოს, როგორ ფორმატში, რა ფორმით, მნიშვნელობა არ აქვს".

იხილეთ ასევე: "დიალოგი უნდა იყოს, როგორ ფორმატში, რა ფორმით, მნიშვნელობა არ აქვს" - რას ამბობს ასლან ბჟანია ქართულ-აფხაზური ურთიერთობების პერსპექტივაზე?

"ინტერპრესნიუსი"