გია ვოლსკი: "ისეთ ბრალდებებს გვიყენებენ, თითქოს ამერიკული კომპანიები ჩვენთან დისკრიმინაციას განიცდიან, არადა, პირიქით არის..." - კვირის პალიტრა

გია ვოლსკი: "ისეთ ბრალდებებს გვიყენებენ, თითქოს ამერიკული კომპანიები ჩვენთან დისკრიმინაციას განიცდიან, არადა, პირიქით არის..."

"ოპოზიციას არჩევნებზე მეტად რევოლუციური პროცესები აინტერესებს"

ამერიკელმა კოლეგებმა ცეცხლი გაგვიხსნეს... ამას ჰქვია "მეგობრული ცეცხლი", როცა მეგობარი უნებლიეთ მეგობარს აზიანებს, - განაცხადა პარლამენტის პირველმა ვიცე-სპიკერმა გია ვოლსკიმ მას შემდეგ, რაც ამერიკელი კონგრესმენების კრიტიკულ წერილებს სენატორების ასევე კრიტიკული წერილები და განცხადებები მოჰყვა. მისი თქმით, ამერიკელი სენატორების წერილის შინაარსი პრინციპული და საქმიანია. "წერილის შინაარსი საკმაოდ საქმიანი, პრინციპული და ძალიან კრიტიკულია. არის საკითხები, რომლებზეც ჩვენ სიღრმისეული და ერთობლივი ანალიზი გვმართებს. ასევე, არის საკითხები, რომლებიც რაღაც ტერმინს მომაგონებს, რომელიც საომარი მოქმედებების დროს გამოიყენება - ამას ჰქვია "მეგობრული ცეცხლი", როცა მეგობარი უნებლიეთ მეგობარს აზიანებს.

ქართულ-ამერიკული პარტნიორული ურთიერთობა მხოლოდ ერთი მხარის ინტერესი არ არის, ეს არის რეგიონის ინტერესი, ჩვენი, ორივეს ინტერესია და არავითარ შემთხვევაში არ უნდა დავუშვათ ამ საკითხების უპასუხოდ დატოვება. ეს პასუხები უნდა იყოს საქმიანი და მხოლოდ ფაქტებზე დაყრდნობილი. როგორც წერილის ადრესატს, ასევე პოლიტიკოსებს მართებთ არა მარტო წერილობითი და დეკლარაციული პასუხების გაცემა, არამედ ფაქტებით აღჭურვილი დელეგაციების შეხვედრა ამერიკელ კოლეგებთან", - განაცხადა ვოლსკიმ.

როგორ აპირებს "ქართული ოცნება" ამერიკელი კოლეგების გულის მოგებას, რა არგუმენტები აქვთ საკუთარი სიმართლის დასამტკიცებლად, ამ და სხვა საინტერესო თემებზე ვიცე-სპიკერი გია ვოლსკი გვესაუბრება.

- მართლა ფიქრობთ, რომ ამერიკელ სენატორებსა და კონგრესმენებს საქართველოში მიმდინარე პოლიტიკური პროცესების შესახებ სწორი ინფორმაცია არა აქვთ?

- სამკითხაო რომ არ იყოს, საიდან და რის საფუძველზე აქვთ მცდარი ინფორმაცია, ჩვენი დელეგაცია უნდა ჩავიდეს ვაშინგტონში და ამერიკელ კოლეგებთან განიხილოს ის საკითხები, რომლებზეც წერილებშია საუბარი. ამ კრიტიკული წერილების გარდა, ამერიკელებისგან ბოლო დროს არაერთი პოზიტიური განცხადება და ანალიტიკური ანალიზიც მოვისმინეთ, რასაც მედია ყურადღებას არ აქცევს.

- რომელ განცხადებას გულისხმობთ? - აშშ-ის ელჩის განცხადებას, ანალიტიკურ გამოცემაში გაკეთებულ ანალიზს.

- თუ ჩვენს სტრატეგიულ პარტნიორებს ის ინფორმაცია აქვთ, რაც ოპოზიციის წისქვილზე ასხამს წყალს, ეს იმაზე ხომ არ მეტყველებს, რომ "ოცნება" ვერ მუშაობს კარგად, თუნდაც დიპლომატიური თვალსაზრისით? - ის, რომ აშშ-ის სენატორს ან კონგრესმენს შეიძლება ჰქონდეს კრიტიკული განწყობა და ამავე დროს ამბობდეს, თითქოს კომპანია "ფრონტერაზე" მიზანმიმართული შეტევაა, რათა "ოცნებამ" რუსეთს აამოს, წამგებიანია ქართულ-ამერიკული ურთიერთობისთვის. გულდასაწყვეტია, რომ ისეთ ბრალდებებს გვიყენებენ, თითქოს ამერიკული კომპანიები საქართველოში დისკრიმინაციას განიცდიან, არადა, პირიქით არის.

- პრეტენზიებს ანაკლიის პროექტის შესახებაც გვიყენებენ. - როგორც კი გამოცხადდება ახალი ტენდერი და გამოჩნდებიან ახალი კომპანიები, ყველა კითხვას გაეცემა პასუხი. სამწუხაროდ, ჟურნალისტები სულ სკანდალებზე არიან ორიენტირებული, არ აინტერესებთ უფრო მნიშვნელოვანი საკითხები, მაგალითად, არის თუ არა დანაშაული პარლამენტში შეჭრა.

- ალბათ, 21 ივნისის ღამეს გულისხმობთ. პოლიტოლოგებისა და ექსპერტების ნაწილის აზრით, ეს არ იყო პარლამენტის აღების ან გადატრიალების მცდელობა, იყო განსხვავებული მოსაზრებებიც და ეს მედიამ გააშუქა. - ჩანაწერი ხომ ყველამ ნახეთ, როგორ ძალადობდნენ პოლიციაზე? არც იმაზეა ლაპარაკი, აიღებდნენ თუ არა პარლამენტს იქ შევარდნით.

კანონი რომ დაირღვა, იმას ვჩივით, თორემ ვინ მისცემდა მაგათ პარლამენტის აღების საშუალებას?

კანონდარღვევაა, როდესაც წინასწარ დაგეგმილად აქციის მონაწილეთა ერთი ჯგუფი პარლამენტში შეჭრას ცდილობს, მეორე კი, დეპუტატების ჯგუფი, შიგნით ელოდება.

- არის საკითხები, რომლებიც სიღრმისეულ ანალიზს საჭიროებს და ეს ამერიკელ კოლეგებთან ერთად არის გასაკეთებელი. გარდა 21 ივნისის ღამის მოვლენებისა, კიდევ რა მიგაჩნიათ ასეთ საკითხად? - პროპორციული თუ შერეული სისტემით არჩევნების თემა. "ოცნებამ" საზოგადოებას საარჩევნო ცვლილება იმის გამო შესთავაზა, რომ პოლიტიკურ პარტიებს კონსტრუქციულად ემოქმედათ, მაგრამ მიტინგი არ დაშლილა და არც ლანძღვა-გინება შეწყვეტილა პარლამენტში თუ გარეთ. აქედან გამომდინარე, დაიხატა რეალური სურათი, რომ აუცილებლად მივიდოდით იმ კრიზისამდე, როდესაც კოალიციური პასუხისმგებლობის აღება შეუძლებელი იქნებოდა. პარტიებმა დაიწყეს ხელმოწერების შეგროვება, თუ ვისთან შექმნიდნენ კოალიციას. ლიდერებმა პრორუსულ პარტიებზე აიღეს ორიენტაცია. ამ გაერთიანებაში პარტიული ორგანიზაციები თუ ცალკეული პირები იმდენად ეკლექტიკური და განსხვავებულები იქნებოდნენ და ისეთი სიჭრელის ნიშნები გამოიკვეთა, რომ აშკარა გახდა, პროპორციული არჩევნების შედეგად მიღებული პოლიტიკური სპექტრი სტაბილურობას ვერ შექმნიდა. გარდა ამისა, ხელისუფლების მიერ შეთავაზებული სისტემა "ასი ორმოცდაათზეც" საკმაოდ სამართლიანია. ვისაც პროპორციული არჩევნების საშუალებით აქვს ხმების მოპოვების შესაძლებლობა, ამ სისტემითაც ექნება. თუ ამბობ, რომ პოპულარული ხარ და ხალხი მხარს გიჭერს, მაჟორიტარული სისტემის რატომ გეშინია? ცხადია, ოპოზიციას არჩევნებზე მეტად რევოლუციური პროცესები აინტერესებს. აი, ამ თემებზე გვაქვს სასაუბრო ამერიკელ კოლეგებთან.

- აპირებს თუ არა მმართველი გუნდი ევროსაბჭოს საპარლამენტო ასამბლეის რეზოლუციაში მითითებული რეკომენდაციის გათვალისწინებას, რომლის მიხედვითაც ორგანიზაცია მოგიწოდებთ, 2020 წლის არჩევნებამდე უზრუნველყოთ ისეთი სისტემა, რომელიც ყველა მხარის მხარდაჭერით ისარგებლებს? - რეზოლუციაში არ არის მითითებული, რომ არჩევნები პროპორციული წესით უნდა ჩატარდეს, შეთანხმების შესახებ მოწოდებას კი ნამდვილად ვიზიარებ.

- მოსამართლეების დანიშვნა არის საკითხი, რომელიც ბევრ კითხვას უჩენს როგორც ევროსაბჭოს, ასევე ამერიკელ კონგრესმენებს. - მათი აზრით, 14 მოსამართლის არჩევა მიზანშეწონილი არ იყო, თუმცა არ ითვალისწინებენ, რომ სასამართლოში 6000 განუხილავი საქმეა და ამან შესაძლოა მალე სასამართლო კრიზისი შექმნას. უმაღლეს სასამართლოში სულ 28 ადგილია. წესით, სასამართლოს ოთხივე პალატა უნდა იყოს დაკომპლექტებული, რათა უწყება სიცოცხლისუნარიანი იყოს.

- როგორია თქვენი პოზიცია პრეზიდენტის განცხადებაზე, რომ საქართველო მზადაა უმასპინძლოს რუსეთის დელეგაციას ევროსაბჭოს საპარლამენტო ასამბლეაზე, მიუხედავად იმისა, რომ დელეგაციის წევრებს დარღვეული აქვთ კანონი "ოკუპირებული ტერიტორიების შესახებ"? - არის კანონი "ოკუპაციის შესახებ", რომელიც უნდა შევასრულოთ, და ასევე არის საერთაშორისო ვალდებულებები. ასე რომ, ამ საკითხზე ჩვენს ევროპელ პარტნიორებთან ერთად უნდა ვიმსჯელოთ და მივიღოთ ისეთი გადაწყვეტილება, რომელიც ამ ორ ვალდებულებას შორის არჩევნის წინაშე არ დაგვაყენებს.

- თქვენი ოპონენტები, მაგალითად, გიორგი ვაშაძე ამბობს, რომ ვართ იმ რეალობაში, სადაც დასავლეთი გვაკრიტიკებს, რუსეთის დუმის წევრები კი ტაშს გვიკრავენ. არ გამორიცხავს, რომ "ოცნებას" რუსეთის ხელისუფლებასთან ფარული მოლაპარაკებები ჰქონდეს. - მე არ ვიცი, ვაშაძე რა ფარულ მოლაპარაკებებზე ლაპარაკობს, მაგრამ ერთი რამ ზუსტად ვიცი - მისი მოგვარე და უფროსი კოლეგა, გრიგოლ ვაშაძე, რუსულ პოლიტიკურ ისტებლიშმენტში მაღალი დონის ნომენკლატურა იყო. მე ისიც კარგად ვიცი, რომ სააკაშვილმა, ვაშაძემ და მთელმა მისმა პოლიტიკურმა გუნდმა გადაუხვიეს იმ მოთხოვნებს, რაც ევროკავშირსა და აშშ-ს ჰქონდათ აგვისტოს კონფლიქტის პრევენციის შესახებ. ფარული მოლაპარაკება მხოლოდ მას და "ნაციონალებს" შეიძლება ჰქონდეთ და ჰქონდათ კიდეც 2008 წლის დამდეგს, როდესაც ყველა ვხედავდით, რომ რუსეთი აპირებდა აგრესიას, ესენი კი უარყოფდნენ.

- არ შემიძლია არ გკითხოთ ნიკა გვარამიას ცემის შესახებ. თქვენ რატომ დაგდოთ ბრალი თავდასხმის ორგანიზებაში?

- გვარამიას მაგაზე დიდი უზნეობის ჩადენა შეუძლია, თანაც დახვეწილად.

- თუმცა, ფაქტია, რომ ბოლო დროს ოპოზიციონერებისა და მათი მხარდამჭერების ცემა ერთგვარ ტრენდად იქცა. - წამება, არაადამიანური მოპყრობის ფაქტები ძალიან ბევრი გვახსოვს, მათ შორის იმ პერიოდიდან, როდესაც სწორედ გვარამია იყო პროკურორი. ხალხი ამას ვერ ივიწყებს. Mმე ძალადობით ანგარიშსწორების წინააღმდეგი ვარ. თუმცა ასეთი ფაქტები კიდევ ერთი ნიშანია იმისა, თუ რა სახიფათოა კოალიციური მთავრობის შექმნა.

- მინისტრ ლევან იზორიას ძმის საქმე არის თუ არა ასევე სამწუხარო ფაქტი, რომელიც უსამართლობის განცდას ქმნის? - არ ვამართლებ მას, მაგრამ ისიც წარმოიდგინეთ, "ნაციონალების" მმართველობის დროს რომელიმე მაღალჩინოსნის ძმისთვის დაედოთ ხელბორკილი. მეტს არაფერს ვიტყვი.

ხათუნა ბახტურიძე