რას აპირებს მთავრობა კორონავირუსის გავრცელებით გამოწვეული ნეგატიური გავლენის შესარბილებლად? - კვირის პალიტრა

რას აპირებს მთავრობა კორონავირუსის გავრცელებით გამოწვეული ნეგატიური გავლენის შესარბილებლად?

13 მარტს მთავრობის ადმინისტრაციაში გამართულ ბრიფინგზე საქართველოს პრემიერ-მინისტრმა გიორგი გახარიამ ეკონომიკურ გუნდთან ერთად ეკონომიკის სტიმულირების ღონისძიებების კონკრეტული გეგმა წარადგინა. გეგმა გულისხმობს კონკრეტული ღონისძიებების გატარებას, რომლის შედეგად, პრემიერის თქმით, ქვეყნის ეკონომიკაში დამატებით ჯამურად 1 მილიარდ ლარზე მეტი ფინანსური რესურსი გაჩნდება.

კერძოდ, მთავრობის ეკონომიკური სტიმულირების გეგმა შედეგია:

1. ბიზნესს, რომელსაც შეექმნება სესხის გადახდის პრობლემა ბანკები ინდივიდუალურად გაუკეთებენ სესხის რესტრუქტურიზაციას. აღნიშნული პროცესის შედეგად მხოლოდ სასტუმრო ინდუსტრიაში დაახლოებით გამოთავისუფლდება 100 მლნ. ლარის ფინანსური რესურსი.

2. მოქალაქეებს, რომლებსაც აქვთ სურვილი გადაავადონ სესხის გადახდა, მომდევნო სამი თვის განმავლობაში ბანკი მათ მისცემს შენატანის გადავადების საშუალებას.

3. იმ კომპანიებს, რომლებიც ახორციელებენ ტურიზმთან დაკავშირებულ საქმიანობებს; სასტუმროები და რესტორნები, ტურისტული სააგენტოები, სატრანსპორტო კომპანიები, საექსკურსიო საქმიანობა, კულტურული და სპორტული ღონისძიებების ორგანიზატორები და სხვ. საქართველოს მთავრობა გადაუვადებს მომდევნო 4 თვის განმავლობაში გადასახდელ ქონების და საშემოსავლო გადასახადებს (1 ნოემბრამდე). შედეგად, შეღავათი შეეხება 18 000 გადასახადის გადამხდელს და 50,000 ზე მეტ დასაქმებულ პირს, რაც ნიშნავს, რომ 100 მლნ. ლარზე მეტი დარჩება ეკონომიკის ამ სექტორში.

4. კომპანიებისთვის ფინანსური რესურსის მიწოდების მიზნით, მთავრობა გააორმაგებს დღგ-ს დაბრუნებებს და წლის ბოლომდე დაგეგმილი 600 მლნ ლარის ნაცვლად ფინანსთა სამინისტრო, კომპანიებს დააბრუნებს 1,200 მლნ ლარს (600 მლნ ლარით მეტს).

5. გაკეთდება სპეციალური სახელმწიფო პროგრამა, რომლის საშულებითაც 4-დან 50 ნომრამდე სიდიდის სასტუმროები მთელი საქართველოს მასშტაბით მიიღებენ საბანკო სესხის 6 თვის პროცენტის თანადაფინანსებას. ეს პროექტი შეეხება ქვეყნის მასშტაბით დაახლოებით 2 000 სასტუმროს, რომელმაც პანდემიის შედეგად შეიძლება მიიღოს მნიშვნელოვანი ფინანსური ზიანი.

6. სახელმწიფოს მხრიდან ეკონომიკის დამატებით სტიმულირებისთვის გაიზრდება ქვეყანაში კაპიტალური პროექტების მხარდაჭერა. შესაბამისად, 2020 წლის ბიუჯეტით გათვალისწინებული კაპიტალური ხარჯები დამატებით გაიზრდება 300 მლნ. ლარით. ასევე, უკვე დაწყებულია მოლაპარაკებები საერთაშორისო საფინანსო ინსტიტუტებთან, მათ მიერ სპეციალურად გამოყოფილი ფონდებიდან რესურსების გამოყენებასთან დაკავშირებით.

გიორგი გახარია განცხადებით, მთავრობა გააგრძელებს მუშაობას, რომ თუ საჭირო გახდება, ეკონომიკის კიდევ უფრო მეტი მასტიმულირებელი ინსტრუმენტები იქნას გამოყენებული.

"აქტიურად ვმუშაობთ ჩვენს საერთაშორისო პარტნიორებთან. კარგად გვესმის, რომ საერთაშორისო საფინანსო ორგანიზაციების მიერ გამოხატული მზარდაჭერის მზაობა, სახელმწიფოების, მაქსიმალურად უნდა გამოვიყენოთ ჩვენი ქვეყნის ინტერესებიდან გამომდინარე. ჩვენ იმედი გვაქვს, რომ უახლოეს პერიოდში ჩვენ ასეთ შედეგს მივაღწევთ.

მინდა კიდევ ერთხელ ხაზგასმით აღვნიშნო კერძო სექტორის და განსაკუთრებით საბანკო სექტორის მხრიდან გამოჩენილი მხარდაჭერის სურვილი და მათ ამისთვის მადლობა გადავუხადო. მინდა განსაკუთრებით ხაზგასმით მადლობა გადავუხადო ინიციატივას, რომელიც "ქართუ ფონდმა" გამოხატა. ჩვენ ყველანი ახლა უნდა ვიყოთ ერთად. "ქართუ ფონდის" მიერ გამოხატული ინიციატივა არის საუკეთესო დადასტურება და მაგალითი იმის, რომ მსგავსი გამოწვევების პირობებში როგორ უნდა შევინარჩუნოთ ერთიანობა და როგორ უნდა ვუპასუხოთ მსგავს გლობალურ გამოწვევებს", - განაცხადა გახარიამ.

ეკონომიკის მინისტრის, ნათია თურნავას განცხადებით, კორონავირუსის სწრაფი გავრცელების შედეგად შექმნილ პრობლემებზე მსჯელობის მიზნით, ცალკეულ ჯგუფებთან შეხვედრები გაგრძელდება.

"ჩვენი ამოცანაა, ბიზნესთან პარტნიორობით შევამციროთ კორონავირუსის გავრცელების რისკი და გავაკეთოთ მაქსიმალური პრევენცია. ეს პირველ რიგში, ეხება ისეთ ბიზნესებს, სადაც მათი საქმიანობის სპეციფიკიდან გამომდინარე, ხშირია კონტაქტი მოსახლეობასთან, დღის განმავლობაში ჰყავთ ბევრი მომხმარებელი. საუბარია სავაჭრო ობიექტებზე, საზოგადოებრივი კვების ობიექტებზე, სილამაზის სალონებზე. ყველამ უნდა ვიზრუნოთ, რომ მაქსიმალურად დისტანციურ მომსახურებაზე გადავიდეთ ყველგან, სადაც ეს შესაძლებელია, ვიმსჯელოთ სამუშაო რეჟიმსა და საათებზე. ყველაფერი უნდა გავაკეთოთ, რომ პირველ რიგში ჩვენი მოქალაქეები იყვნენ დაცული და დიდი იმედი მაქვს, სხვადასხვა ინდუსტრია გვერდში დაგვიდგება ისევე, როგორც სხვა ყველა შემთხვევაში ხდება", - აღნიშნა ნათია თურნავამ.