დავით ბაქრაძე: "ამ ეტაპზე ჩვენ გვაქვს სრული თანხმობა"
"პირველად ხდება, რომ ოპოზიციური ერთობა ერთიანი მაჟორიტარი კანდიდატებით გამოდის არჩევნებზე"
"ოპოზიცია რაღაცებით ვაჭრობს, მათ შორის პიარულად... ოპოზიცია ვერ შეძლებს იმ შეთანხმებიდან გასვლას, რასაც ხელი მოაწერა. მოგონილი თემებით შეთანხმების პირობების ეჭვქვეშ დაყენება უპასუხისმგებლობაა, რასაც ქართველი საზოგადოება არავის აპატიებს", - განაცხადა საპარლამენტო უმრავლესობის ლიდერმა მამუკა მდინარაძემ. როგორი იქნება ოპოზიციის საპასუხო ნაბიჯი, თუ ხელისუფლება მის მთავარ მოთხოვნას პოლიტპატიმრების გათავისუფლების შესახებ არ შეასრულებს, "ევროპული საქართველოს" ლიდერი დავით ბაქრაძე გვესაუბრება.
- სანამ 8 მარტის შეთანხმება არ შესრულდება, საპარლამენტო მუშაობაში სრულფასოვნად არ ჩავერთვებით, მაგრამ აუცილებლად შევასრულებთ ჩვენს ვალდებულებას - კენჭისყრის დროს შევალთ დარბაზში და მხარს დავუჭერთ კომისიის შექმნას. უბრალოდ, მუშაობაში აღარ მივიღებთ მონაწილეობას, სანამ ხელისუფლება 8 მარტის შეთანხმების პირობას არ შეასრულებს და პოლიტპატიმრებს არ გაათავისუფლებს.
- როდესაც გიგი უგულავამ და გიორგი რურუამ ციხიდან გააკეთეს განცხადება, რომ არ სურდათ მათ პატიმრობას ხელისუფლებისა და ოპოზიციის შეთანხმებისთვის ხელი შეეშალა, თქვენ აღნიშნეთ, რომ მათ ჩიხში შესული მოლაპარაკების განახლების შესაძლებლობა მოგცეს. ახლა რატომ დადგა მათი საკითხი ისევ დღის წესრიგში? - მათ გადადგეს ძალიან ღირსეული ნაბიჯი და გვითხრეს, თუ ხელისუფლება ქვეყნისთვის მისაღებ სისტემას შემოგთავაზებთ, ჩვენ გამო ამ შანსს ხელიდან ნუ გაუშვებთო. ეს პოლიტპატიმრების თემის მოხსნას კი არა, მოლაპარაკების გაგრძელების შესაძლებლობას ნიშნავდა. ხომ გახსოვთ, უგულავას დაპატიმრების შემდეგ ყველა ოპოზიციურმა ძალამ მიიჩნია, რომ ამ ნაბიჯით ხელისუფლებამ დაამთავრა მოლაპარაკება და დახურა სივრცე პოლიტიკური დიალოგისთვის. უგულავასა და რურუას წერილები ამ სივრცის გახსნას გულისხმობდა.
თუ ხელისუფლება საარჩევნო სისტემასთან დაკავშირებულ პირობასაც შეასრულებს და პოლიტპატიმრებსაც გაათავისუფლებს, ვიტყვით, რომ ქვეყანაში პოლიტიკური კლიმატი ნორმალურია.
შესაბამისად, ჩვენც მოგვეცემა შესაძლებლობა საარჩევნო პროგრამაზე, ეკონომიკასა და სამუშაო ადგილების შექმნაზე ვილაპარაკოთ.
- თქვენი მოთხოვნის საფუძველზე უგულავასა და თქვენ მიერ დასახელებული სხვა პირების გათავისუფლება თავისთავად ნიშნავს, რომ "ქართული ოცნება" პოლიტპატიმრების არსებობას აღიარებს, ეს კი ხელისუფლებისთვის პრინციპულად მიუღებელია. ამ ულტიმატუმით მმართველი გუნდის ჩიხში შეყვანას ხომ არ ცდილობთ? - "ქართულმა ოცნებამ" საკუთარი თავი ჩიხში მაშინ შეიყვანა, როდესაც შუა მოლაპარაკების პროცესში დაიჭირა გიგი უგულავა. რაც შეეხება გამოსავალს, გამოსავალია იმ ხელშეკრულების შესრულება, რომელსაც ხელი მოეწერა 8 მარტს. ჩვენ "ქართული ოცნებისგან" არ ველოდებით იმის აღიარებას, რომ ქვეყანაში პოლიტპატიმრები არიან. ჩვენი ამოცანა არც ის არის, შეთანხმებული რიტორიკა გვქონდეს და ერთნაირად ვაფასებდეთ მოვლენებს, ჩვენი ამოცანაა შედეგის მიღება. ამიტომ წერია იმ დოკუმენტში, რომ მხარეები ვერ თანხმდებიან იმაზე, თუ რა ხდება, მაგრამ თანხმდებიან, რომ ეს უნდა დამთავრდეს.
"ქართული ოცნებისთვის" გიგი უგულავა არ არის პოლიტიკური პატიმარი, ჩვენთვის არის. ამაზე ვერ ვთანხმდებით და არც არის საჭირო. ჩვენი მიზანია, დასრულდეს ეს შხამიანი თემა, ანუ პოლიტიკური დევნა, და ნორმალურ პირობებში გავაგრძელოთ პოლიტიკური ცხოვრება.
- როგორც ჩანს, თქვენი გუნდის წარმომადგენელთა ნაწილისთვის არც 8 მარტის შეთანხმების საფუძველზე მიღებული საარჩევნო მოდელია მისაღები და 40%-იანი ბარიერის შესახებ ბუნდოვან ფორმულირებებზე ლაპარაკობენ. - დიახ, მართლაც იყო ბუნდოვანება. ჩანაწერში ისე ჩანდა, რომ ე.წ. ჩამკეტი მექანიზმი შეეხებოდა ყველა პარტიას, სინამდვილეში კი უნდა შეეხოს მხოლოდ იმ პარტიას, რომელიც უმრავლესობას ქმნის, და უმრავლესობა ვერ უნდა შექმნას 40%-ზე ნაკლები ხმით. მე არ მინდა იმის თქმა, რომ "ქართულ ოცნებას" ოპოზიციისთვის ხმების დაკლება ჰქონდა განზრახული, უბრალოდ, მგონია, რომ ეს იყო მოუხეშავი ფორმულირება. ახლახან მქონდა კონსულტაცია "ქართული ოცნების" წარმომადგენელთან და შევთანხმდით, რომ ჩამკეტი მექანიზმი შეეხება მხოლოდ იმ პარტიას, რომელიც უმრავლესობას ქმნის.
- ხომ არ ფიქრობთ, რომ 1%-იანი ბარიერი ოპოზიციურ ერთობაში დისონანსს შეიტანს? დარწმუნებული ხართ, რომ მმართველი გუნდი ამას მცირერიცხოვანი პარტიების საცდურად, გადასაბირებლად არ გამოიყენებს? - თავდაპირველად, მეც ასეთივე განწყობა მქონდა. ვფიქრობდი, რომ "ქართული ოცნება" 1%-იანი ბარიერის შემოთავაზებით მცირერიცხოვან პარტიებს ოპოზიციური ერთობიდან გასვლის მოტივაციას აძლევდა. თუმცა, როგორიც უნდა ყოფილიყო ეს ამოცანა, დღეს ყველა ხედავს, რომ ოპოზიციური ერთობა შენარჩუნებულია. ამ ეტაპზე ჩვენ გვაქვს სრული თანხმობა და იმედია, ამ პატარა მახის მიუხედავად, ჩვენი ერთობა გაგრძელდება.
- ოპოზიციური ერთობისთვის კიდევ ერთ, შეიძლება უფრო დიდ საფრთხედაც იქცეს მაჟორიტარ კანდიდატებზე შეთანხმება?
- ამ მხრივ საფრთხის წინაშე არ ვდგავართ. პირველად ხდება, რომ ოპოზიციური ერთობა ერთიანი მაჟორიტარი კანდიდატებით გამოდის არჩევნებზე. ეს მართლაც გარდამტეხი მომენტია არჩევნების მოსაგებად. აქამდე ყველა ხელისუფლებისთვის მაჟორიტარები წარმატების ფორმულა იყო, რადგან ამ საკითხში ოპოზიციური ხმები ყოველთვის იყოფოდა. ადვილი ნამდვილად არ არის ამხელა ოპოზიციურ გაერთიანებაში მაჟორიტარებზე შეთანხმება, მაგრამ პროცესი კარგად მიდის, მონახაზი უკვე არსებობს და დაახლოებით ერთ თვეში წარვადგენთ შეთანხმებულ კანდიდატებს.
- თაკო ჩარკვიანის განცხადებები მინდა შეგახსენოთ, რომელიც ნინო ბუჯანაძის მაჟორიტარ კანდიდატად წარდგენას აპროტესტებდა და ირწმუნებოდა, რომ "ძალა ერთობაშია" ცალკე გააგრძელებდა ბრძოლას. - დაბრკოლებები შეიძლება იყოს. ეს კომფორტული ფორმატი ნამდვილად არ არის, მაგრამ ყველას ესმის, თუ რაოდენ მნიშვნელოვანია ერთიანობა, სწორედ ეს არის გარდამტეხი ამ ბრძოლაში.
- კორონავირუსმა შეცვალა თუ არა თქვენი პოლიტიკური დღის წესრიგი?
- რა თქმა უნდა, თანაც ძალიან მნიშვნელოვნად. ხშირად დავდიოდით რეგიონებში, მაგრამ ახლა ყველა შეხვედრა გავაუქმეთ. ნამდვილად არ გვინდა ჩვენი მოქალაქეების ჯანმრთელობის საფრთხეში ჩაგდება. ასევე გავაუქმეთ 4 აპრილისთვის დაგეგმილი საპროტესტო აქცია. სხვათა შორის, ამას ორი მიზეზი ჰქონდა: პირველი გახლდათ კორონავირუსის საფრთხე, მეორე კი მოლოდინის რეჟიმში ყოფნა. ჩვენ ვაცდით ხელისუფლებას დაპირების შესრულებას, რომ შეწყვეტს პოლიტიკურ დევნას. თუ ისევ მოატყუებს ხალხს, მერე პოლიტიკურ კრიზისზე პასუხისმგებელი თავად იქნება, პოლიტიკური კრიზისი კი რაც არის, ყველას ნანახი გვაქვს.