"რესპუბლიკელებმა გადავწყვიტეთ, "ოცნება" კედელთან მივაყენოთ"
"რესპუბლიკელებმა გადავწყვიტეთ, "ოცნება" კედელთან მივაყენოთ"
"მმართველმა გუნდმა არასერიოზულ შეფასებებს თავი დაანებოს, გაბედოს და დაარეგისტრიროს კანონპროექტები ნულოვანი ბარიერისა და სრულად პროპორციული სისტემის შესახებ. დანარჩენზე მერე ილაპარაკოს", - ამბობს რესპუბლიკური პარტიის ლიდერი ხათუნა სამნიძე. მისი თქმით, "ქართული ოცნება" ცდილობს ოპოზიცია მძევლად აიყვანოს და არასასურველ შედეგებზე პასუხისმგებლობა აჰკიდოს. "მმართველი გუნდი იტყვის, პროპორციული სისტემა არა გაქვს იმიტომ, რომ ჩვენი ხმები ამისთვის საკმარისი არ იყო, ოპოზიცია კი პარლამენტში არ შემოვიდაო. ამიტომ მმართველ გუნდს ვთავაზობთ, ნულოვანი ბარიერით პროპორციული საარჩევნო სისტემის შესახებ
კანონპროექტი დაარეგისტრიროს, რესპუბლიკური პარტია კი კენჭისყრაში მონაწილეობას მიიღებს და მხარს დაუჭერს კანონპროექტს", - რესპუბლიკელი ლიდერის ამ განცხადებას ოპოზიციონერი ლიდერების არაერთგვაროვანი შეფასება მოჰყვა. ზოგიერთმა რესპუბლიკელები ღალატშიც დაადანაშაულა. როგორ აპირებს რესპუბლიკური პარტია საკუთარი პოზიციის დაცვას და როგორია მისი სტრატეგია, ხათუნა სამნიძე გვესაუბრება:

- უპირველესად მინდა დავადასტურო, რომ
რესპუბლიკური პარტია გაერთიანებული ოპოზიციის მოთხოვნებს კვლავ იზიარებს. ჩვენ არ გვავიწყდება, რომ ვართ ბლოკის სუბიექტი და მანდატი "ნაციონალურ მოძრაობასთან" თანამშრომლობით მივიღეთ. ოპოზიციური ერთობის შეთანხმებიდან არ გავსულვართ, ჩვენი ინიციატივით არ ვემიჯნებით ოპოზიციურ მოთხოვნებს, მაგრამ ასეთ ვითარებაში საჭიროა "ქართულ ოცნებაზე" შეტევა. რესპუბლიკელებმა გადავწყვიტეთ, რომ ამ ფრონტზე გადავიდეთ შეტევაზე, კედელთან მივაყენოთ "ოცნება". თუ ამაზე წამსვლელია, წავიდეს. დაარეგისტრიროს უბარიერო პროპორციული სისტემის შესახებ კანონპროექტი და პირადად მე ვპირდები, რომ ჩემი ხმა ექნება. ეს არის ერთადერთი კანონპროექტი, რომლის მხარდაჭერასაც რესპუბლიკური პარტია აპირებს, სხვა მხრივ არ ვაპირებთ ამ პარლამენტთან ერთად მუშაობას.

- ნულოვანი ბარიერის შესახებ კანონპროექტის დამტკიცებას ხომ საკონსტიტუციო უმრავლესობა სჭირდება?
- დამტკიცებას კი, მაგრამ დარეგისტრირებას არა. ამიტომ ვეუბნებით, გაბედოს და დაარეგისტრიროს. მამუკა მდინარაძე გვეუბნება, შემოდით და დავარეგისტრირებთო. ჩვენ ვეუბნებით, რომ არ ვენდობით მის სიტყვებს.

დარწმუნებული ვარ, თუ შეგვიტყუეს, ამ კანონპროექტს აღარ დაარეგისტრირებენ. სურთ გამოწვევად ჩაგვითვალონ, სურთ სხვა რამედ, მთავარია, დაარეგისტრირონ ჩვენი ქვეყნისთვის სასიცოცხლოდ მნიშვნელოვანი კანონპროექტი და მერე ნახონ, ოპოზიცია პასუხისმგებლიანია თუ უპასუხისმგებლო.

რატომ არის სასიცოცხლოდ მნიშვნელოვანი? იმიტომ, რომ უამისოდ პარლამენტში მხოლოდ ორი დიდი პარტია - "ნაცმოძრაობა" და "ოცნება" შევა. 5%-იან ბარიერს მხოლოდ ჩვენ კი არა, "ნაცმოძრაობის" გარდა ვერც ერთი ოპოზიციური პარტია ვერ გადალახავს და საბოლოოდ მოგვიწევს უარის თქმა კოალიციურ მთავრობაზე. არადა, მთელი ორი წელი ამისთვის ვიბრძვით.

ნახეთ, როგორ გვეთამაშება მდინარაძე - იცის, რომ ოპოზიციური პარტიების გაერთიანება პირველად სწორედ უბარიერო პროპორციული სისტემის გამო შედგა. ახლა ამბობს, მზად ვართ დავარეგისტრიროთ კანონპროექტი, ამას კი 113 ხმა სჭირდება, ოპოზიცია კი არ არის მზად, რომ ქვეყანას დაუკანონოს უბარიერო სისტემაო. დარწმუნებული ვარ, თუ ოპოზიციური პარტიები დაინახავენ, რომ ეს კანონპროექტიც დარეგისტრირდა, ძალიან გაუჭირდებათ ქვეყნის მომავალზე უარის თქმა. მე თუ მაქვს შესაძლებლობა, რომ ხმა მივცე კანონპროექტს, რომელიც კანონად იქცევა და სასიცოცხლოდ სჭირდება ქვეყანას, თავს უფლებას არ მივცემ, რომ ასეთ კენჭისყრაში მონაწილეობა არ მივიღო.

- თუ კანონპროექტი კანონად არ იქცა, მაშინ პარლამენტში თქვენს ერთჯერადად შესვლას რა გამართლება ექნება?
- ის იქნება, რომ ჩვენი მოთხოვნების ერთგული ვრჩებით - ეს არის რიგგარეშე არჩევნები, პოლიტპატიმრების თემა და საარჩევნო ადმინისტრაციის ცვლილება. პარლამენტში კენჭისყრა არ უდრის საპარლამენტო საქმიანობის გაგრძელებას. ეს მომავლის კანონია.

- თქვენმა ინიციატივამ რატომ გამოიწვია დაბნეულობა ოპოზიციაში?
- ჩვენი ინიციატივა არასწორად გაიგეს. ჩვენ ვრჩებით საერთო ოპოზიციურ ფორმატში, მაგრამ ამასთან ყველა ჩვენგანს გვაქვს ჩვენი გზა, თუ როგორ შევუტიოთ ყოველდღიურად "ოცნებას" და ვამხილოთ სიცრუეში.

- "ოცნებამ" სისულელე უწოდა თქვენს ინიციატივას და თქვა, რომ განხილვადაც არ ღირს. როგორი იქნება თქვენი სტრატეგია?
- გავაგრძელებთ მუშაობას საერთაშორისო ფორმატში. თუ ხელისუფლება ამბობს, რომ მათი წითელი ხაზი რიგგარეშე არჩევნებია და არა პროპორციული ნულოვანი ბარიერით, მაშინ დაარეგისტრირონ კანონპროექტი, თუ არადა, პირდაპირ თქვან, რომ მზად არ არიან რეფორმებისთვის.

ხათუნა ბახტურიძე
ყველას
16 თებერვალი 2021 12:36
ამ პარტიაზე უფრო ურეიტინგო და უაზრო არ მეგულება დედამიწაზე, რატომ უნდათ ნულოვანი ბარიერი? იმიტომ რომ ნულები არიან, მაგრამ მაინც უნდათ ვიღაცის ბედი გადაწყვიტონ, ასეთი ადამიანები შორს სახელმწიფო მმართველობისგან.
უბრალო
15 თებერვალი 2021 21:33
ე ბიჯო დროზე, თვარა დეინგრა კედელი. ვაი თქვენს- არა ჩვენს პატრონს, შენისთანების იმედი რო აქვს კიდე ვინმეს.
ra giTxra
15 თებერვალი 2021 19:53
საყვარელი. . .

რუბრიკის სხვა სიახლეები
გაზეთის სტატია. მიიღეთ წვდომა
გაზეთის სტატია. მიიღეთ წვდომა
თვის კითხვადი სტატიები