"არ მჯერა, რომ გახარიამ გუნდთან შეუთანხმებლობის გამო, ემოციურად მიიღო გადაწყვეტილება" - "მიშას კარტი" აღარ უნდა გათამაშდეს!"
"არ მჯერა, რომ გახარიამ გუნდთან შეუთანხმებლობის გამო, ემოციურად მიიღო გადაწყვეტილება" - "მიშას კარტი" აღარ უნდა გათამაშდეს!"
გადაიდგა პოლიტიკური ნაბიჯები, რის შედეგადაც ქართული პოლიტიკური სპექტრი შეიცვლება - შეიცვლება მმართველი პარტია და შეიცვლება ოპოზიცია. ირაკლი ღარიბაშვილი მკვეთრ ხაზს გაავლებს ოპოზიციასა და ხელისუფლებას შორის და მოიმადლიერებს "ქართული ოცნების" იმ ელექტორატს, რომელიც ასეთი ზღვრის წაშლის გამო დღემდე უკმაყოფილო იყო. მართლაც, "ქართული ოცნება"" ზოგჯერ ლოიალურობას იჩენდა უსამართლობაში შემჩნეულ პირებთან. ვფიქრობ, ეს მიდგომა შეიცვლება. რაც შეეხება გახარიას, ვნახოთ, სად წავა ის, დატოვებს პოლიტიკას, გამოჩნდება რომელიმე პარტიაში თუ თავად შექმნის ახალ პოლიტიკურ ძალას",
- ამბობს ფსიქოლოგი და პოლიტიკის ექსპერტი რამაზ საყვარელიძე, რომელიც "კვირის პალიტრას" ბოლოდროინდელ მოვლენებზე ესაუბრა. კერძოდ, სად შეიძლება გამოჩნდეს გახარია, როგორ მიიღებს საზოგადოება ღარიბაშვილის მიერ გავლებულ მკვეთრ ხაზებს და როგორი იქნება შეცვლილი ოპოზიცია:

- მე არ მჯერა, რომ გახარიამ გუნდთან შეუთანხმებლობის გამო, ემოციურად მიიღო გადადგომის გადაწყვეტილება.
არც იმის მჯერა, რომ ნიკა მელიას აღმკვეთმა ღონისძიებამ გადაადგმევინა ეს ნაბიჯი. გახარია არ ჰგავს იმ ტიპის პოლიტიკოსს, რომელიც ასე მარტივად, სხვისი მართული პროცესების გამო იღებს გადაწყვეტილებებს. შეგახსენებთ, რა წარმატებით გაართვა თავი პრემიერის პოსტზე პირველ გამოწვევას, როცა ახალგაზრდებმა პარლამენტის წინ გამართეს აქცია - საპროტესტო შეძახილებით მივიდა მომიტინგეებთან და ტაშით გააცილეს. პანკისში მიზანმიმართულად გახვიეს პროვოკაციაში, მაგრამ გამოწვევას იმჯერადაც გაართვა თავი. შემდეგ იყო 20 ივნისი...

მისი ბრძანებით ისროლეს თუ არა, სისხლი დაიღვარა. თუმცა არ გადადგა და დავიჯერო ახლა, როცა ჯერ არაფერი იყო მომხდარი, ვაითუ რამე უბედურება მოხდესო და ამის გამო გადადგა?! არ ჰგავს ეს მის ხელწერას. ვნახოთ, რა მოხდება. შეიძლება სულაც არ იყო გუნდში კონფლიქტი, უნდოდა და გადადგა, ნიკა მელია კი საბაბად გამოიყენა. თუ მან ახალი პოლიტიკური პარტია შექმნა, მაშინ ქართულ რეალობაში ახალ პოლიტიკურ დღის წესრიგს მივიღებთ...

- თქვენი ვერსიით, როგორი შეიძლება იყოს ის?
- ჯერ დღევანდელი ვითარება უნდა გავაანალიზოთ. ნახეთ, რა მოხდა - როგორც კი დასავლელმა პარტნიორებმა "მამაო ჩვენოსავით" გაიმეორეს თავიანთი რეკომენდაციები და ხელისუფლებასა და ოპოზიციას, უფრო აქცენტირებულად კი ხელისუფლებას, პრობლემის მშვიდობიანი გზით მოგვარებისკენ მოუწოდეს, იმ დღესვე რუსთაველზე დემონსტრაციები დაიწყო, კარვების გაშლა სცადეს. ამ აურზაურის მომწყობი ოპოზიციონერი ლიდერები ნორმალურები არიან?! ამ რეალობის გათვალისწინებით არ გამიკვირდება, თუ ხელისუფლებაც ძალისმიერ პასუხს გასცემს ოპოზიციას.

რა თქმა უნდა, "ნაციონალური მოძრაობისგან" პროვოცირებული ღარიბაშვილი ხისტი იქნება.

- თქვენ როგორ ახსნით ოპოზიციის ასეთ ნაბიჯს?
- ოპოზიციის ამ საქციელს ლოგიკა არ გააჩნია. ერთადერთი, რაც შეიძლება ვიფიქროთ, ყველაფერს აკეთებენ დესტაბილიზაციისთვის.

- დესტაბილიზაცია ხელს აძლევს მიხეილ სააკაშვილს?
- დესტაბილიზაცია საქართველოში რუსეთს აძლევს ხელს. სააკაშვილი და დანარჩენი ოპოზიციაც, ნებსით თუ უნებლიეთ, დიახაც რუსეთის წისქვილზე ასხამენ წყალს. 20 ივნისსაც დესტრუქციულად მოქმედებდნენ "ნაციონალები" ნიკა მელიას მეთაურობით. როგორც აქამდე ამბობდნენ, ნიკა მელიას თუ დაიჭერთ, მოლაპარაკება აღარ შედგებაო. ასევე წარმატებით შეუძლიათ გვითხრან დღეს, კარავს თუ არ გაგვაშლევინებთ, მოლაპარაკება არ შედგებაო. ისე, "მიშას კარტი" აღარ უნდა გათამაშდეს, თორემ ეს ქვეყნისთვის ცუდად დამთავრდება.
ძველ ბერძნულ ამბავს მოვიყვან მაგალითად. სოკრატეს მიაჩნდა, რომ სასამართლომ არასწორი განაჩენი გამოუტანა - საწამლავით სიკვდილი მიუსაჯა. მისმა მოწაფეებმა უთხრეს, გადაგმალავ­თო, მაგრამ სოკრატემ იუარა და დალია საწამლავი, სამართალი უნდა აღსრულდესო. ჩვენ საქართველოში არა გვაქვს გაცნობიერებული, თუ რაოდენ მნიშვნელოვანია კანონის აღსრულება.

- ნიკა მელიას საქმე რომ სამართლებრივი სივრციდან იყო გასული და პოლიტიკურ ჭრილში განიხილებოდა, ეს ჯერ გახარიამ აღიარა, როცა თქვა, ნიკა მელიას საქმეზე გუნდთან შეუთანხმებლობა მქონდაო, შემდეგ მამუკა მდინარაძემაც დაადასტურა, როცა თქვა, ამ საკითხზე განსხვავებული აზრი გვქონდაო.
- დიახ, მართალია, ერთმა აღიარა და მეორემ დაადასტურა, მაგრამ ისინი საუბრობდნენ სასამართლოს განაჩენის აღსრულების ვადებზე. მავანი იმასაც ამბობს­, სასამართლომ უსამართლო განაჩენი გამოუტანა ნიკა მელიასო.

ტრამპს არ აპატიეს ამერიკელებმა მთავრობის დამხობისკენ მოწოდება და ნიკა მელია ვინ არის, მისთვის რომ ეპატიებინათ?!

- დავუბრუნდეთ იმ შესაძლო ახალ პოლიტიკურ დღის წესრიგს, რომელიც გახარიას პოლიტიკაში დაბრუნებით შეიძლება მივიღოთ.
- თუ გახარიამ გუნდში არსებულ კონფლიქტს ვერ გაუძლო და ამიტომ წავიდა, მისი სახელი ისტორიას ჩაჰბარდება, ხოლო, თუ გახარია ახალ პოლიტიკურ პარტიას შექმნის, მაშინ "ნაციონალური მოძრაობა" და დანარჩენი ოპოზიციაც რეიტინგების ქვედა ზღვარზე აღმოჩნდებიან. "ქართული ოცნება" და გახარიას ახალი პარტია ახალ პოლიტიკურ დღის წესრიგს შექმნიან ქართულ პოლიტიკაში.

ხათუნა ბახტურიძე
რეზო
01 მარტი 2021 04:31
სად არის გუნდი? გუნდი კი არა 3 უტვინო კაცი მართავს ქვეყანა, დანარჩენი ყველა გაქცევაზეა, ვინც ჭკვიანია დროზე გარბის, ვინც არა მერე ევროპაში მოხევს, არც ეგაა პრობლემა.
ჯართი კონსტიტუცია
28 თებერვალი 2021 11:22
ქოცები თვითონ არ ცემენ საკუთარ ამომრჩეველს პატივს და არც პარლამენტს და მერე უკვირთ სხვები რატო არ შედიან პარლამენტში. რა მოგება ნახეს ქოცებმა გახარიას წასვლით? ელექტორატი მოემატათ თუ მოაკლდათ? იქნებ ამომრჩეველმა ხმა გარკვეულწილად გახარიას გამო მიცა? ვინმე ოცნებაში რაიმეს აანალიზებს. მე მეეჭვება. სად არის ძალაუფლების ცენტრი საქართველოში? პოლიტსაბჭოში თუ პარლამენტში. გახარიამ ნდობის საკითხი პარლამენტშიც არ დააყენა იმიტომ რომ როგორც ჩანს მართლა პულტის დამჭერები არია. საქართველოს კონსტიტუცია არის არაფორმალური მმართველობის კონსტიტუცია. ეგ კონსტიტუცია ვერ ცემს პასუხს როცა არჩევნებიდან მალე პრემიერმინისტრი მიდის მოსახლეობას უნდა დაუსვა შეკითხვა გაძლევს თუ არა მანდატს ისევ
თამარი
24 თებერვალი 2021 21:14
გახარიას ეგ გეგმა ჯერ კიდევ შშს ნინისყეობის დროს ჰქონდა.მე თქვენ დაგასრულებთ,და თქვენ დაგასრულებთ ქართველი ხალხიო ,თქვენა ხართ ქუჩის ოპოზიცია და დარჩებით ქუჩაშიო.გახარია ჰაერზე არ ისვრის სიტყვებს ,უდიდესი რეიტინგი აქვს მთელს ქვეყანაში ზვიადს გაუტოლდა და მმართველობით მასზე რეიტინგული ,არც არავის არა?სჯერა რომ მიზეზი წასვლის მასხარა მელია იყო ჯობდა საერთოდ ეგ უკბილი ტყუილი არ მოემიზეზებინა.ახლა მთავარია როგორც მოულოდნელად წავიდა,ასევე მოულოდნელად ვნახოთ აქ ახალი პარტიის შექმნის ინფორმაცია გამოჩნდეს.საქართველო გაბრწყინდება და ამაში დიდი წვლილი ექნება ღარიბაშვიკსა და გახარიას 100%-ით ვარ დარწმუნებული

რუბრიკის სხვა სიახლეები
დღის კითხვადი სტატიები
თვის კითხვადი სტატიები