"მიშაც ცდება ხანდახან" - რას წერს დავით ბერძენიშვილი სოციალურ ქსელში? - კვირის პალიტრა

ყველაზე დიდი ოპოზიციური პარტიის მხრიდან საკუთარ წინადადებაზე უარის თქმა დააზარალებს საერთო საქმეს, ოპოზიციას და საკუთრივ ენმ-ს, - ამის შესახებ "რესპუბლიკური" პარტიის ლიდერი დავით ბერძენიშვილი სოციალურ ქსელში წერს.

როგორც ის აღნიშნავს, პლებისციტის უკან წაღების ინიციატივა ოპოზიციას მკვეთრად დააზარალებს.

ბერძენიშვილის თქმით, ნიკა მელიას, გიორგი რურუას დახსნა დასავლეთის ძალისხმევის გარეშე შეუძლებელია. ბერძენიშვილი დასძენს,რომ სწორედ ევროპული საბჭოს პრეზიდენტის "უპრეცედენტო წარმატებული სტარტი გასაძლერებელია და არა უნებურად ჩასაწიხლი".

როგორც ის აღნიშნავს, მიშაც ცდება ხანდახან და ახლა შეცდა.

"პლებისციტის იდეა ლელოს ფორმატში(მანდატიანი პარტიები) საფუძვლიანად განიხილებოდა. რესპუბლიკელები უფრო ზომიერ სკეპტიკოსთა ფრთას მივეკუთვნებოდით, როგორც არაერთი სხვა ჯგუფი.

ყველაზე მაღალი ლეგიტიმაცია პლებისციტს ენმ-მ მისცა - პარტიის უმაღლესი მმართველი ორგანოს, პოლიტსაბჭოს ერთსულოვანი გადაწყვეტილებით. როგორც მახსოვს, ინიციატორი მანდატების რაოდენობით და ხმებით მეორე საარჩევნო სუბიექტი - ევროპული საქართველო იყო.

პარტიები შევთანხმდით, რომ ჩვენი ერთობა ურთიერთკომპრომისებს მოითხოვდა და მოლაპარაკების მაგიდაზე ოპოზიციის სახელით დაიდო ერთიანი დოკუმენტი, სადაც ეწერა პლებისციტი 2021 წელს.

ყველამ მშვენივრად ვიცოდით, რომ პლებისციტის მოგების შანსი ოპოზიციას შემოდგომაზე თვითმმართველობის არჩევნებთან ერთად თუ ექნებოდა, რადგან მანამდე პლებისციტის არც დანიშვნა ჩავთვალეთ მაღალალბათურად და, რაც უფრო არსებითია, ცალკე პლებისციტში ამომრჩეველთა ნახევარზე მეტი ვერ მიიღებდა მონაწილეობას.

ოფიციალურად დაახლოებით სამმილიონახევარი ამომრჩეველია. ცხადია, 1.8 მილიონი ამომრჩეველი ოპოზიციას არ ჰყავს და პლებისციტში უმრავლესობას ვერ დავაფიქსირებდით. მეტიც, ოპოზიციის მომხრე მილიონი ამომრჩეველი არჩევნების გარეშე დანიშნულ პლებისციტზე(ვთქვათ, გაზაფხულზე) არ მოვიდოდა.

შესაბამისად, არა მარტო ამომრჩეველთა საერთო რაოდენობის, არამედ ბოლო არჩევნებში მონაწილეთა( 2 მილიონი) ნახევარზე მეტი ხმაც ვერ ექნებოდა ვადამდელ არჩევნებს საერთონაციონალური არჩევნების გარეშე. ძალიან რომ გაჭირვებოდა ხელისუფლებას,

იგი უპირატეს მდგომარეობაში აღმოჩნდებოდა. მოგეხსენებათ, პლებისციტი სარეკომენდაციო ხასიათის ღონისძიებაა და ხელისუფლება მყარი არგუმენტით ჩათვლიდა, რომ ამომრჩეველთა მე დღიდან რეკომენდირებული არაა ვადამდელი არჩევნები.

ამასთანავე, ხელისუფლებას არ აწყობს არაპირდაპირ აღიაროს, რომ არჩევნების შედეგი საეჭვოა. არც მოითხოვდა მისგან დასავლეთი სასწრაფოდ ხელახალი თუ ვადამდელი არჩევნების დანიშვნას. ამიტომ ხელისუფლება 2021-ში არც კი უშვებდა საპარლამენტო არჩევნების შესაძლებლობას.

2022 წ. საპარლამენტო არჩევნების ჩატარების შესაძლებლობაც განიხილებოდა მანდატიანი პარტიების ლელოს დახურულ ფორმატში. ანდრიუს კუბილიუსის საჯარო შემოთავაზებას ერთმნიშვნელოვნად პოზიტიურად გამოეხმაურა ლელო, რესპუბლიკური პარტია...სადისკუსიო საკითხი გახდა სხვადასხვა პარტიას და საზოგადოებაში.

ასეთია საკითხის ისტორია.

ახლა პლებისციტის უკან წაღების ინიციატივა ოპოზიციას მკვეთრად დააზარალებს. მით უმეტეს, რომ ძალიან უხერხულ მდგომარეობაში ჩააგდებს ენმ-ს, რომელმაც ყველაზე მაღალი ლეგიტიმაცია მისცა ამ საერთოოპოზიციურ ინიციატივას.

პოლიტპატიმრების -ნიკა მელიას, გიორგი რურუას და საციხოდ გამზადებული ბევრი სხვა ადამიანის დახსნა დასავლეთის ძალისხმევის გარეშე შეუძლებელია. და სწორედ ევროპული საბჭოს პრეზიდენტის უპრეცედენტო წარმატებული სტარტი გასაძლერებელია და არა უნებურად ჩასაწიხლი.

ვადამდელი არჩევნების პოტენციური თარიღი 2022 წელია. პლებისციტის გარეშე თუ არ თანხმდება ამას ხელისუფლება, უნდა ვეცადოთ, მოვიგოთ პლებისციტი. მოგება კი მხოლოდ ადგილობრივ არჩევნებთან ერთადაა შესაძლებელი.

ან ის რა რთული მისახვედრია, რომ ხელისუფლება თუ იტყვის უარს" პოტენციური ვადამდელისთვის" პლებისციტზე და არც რაიმე სხვა ფორმით დაეთანხმება ვადამდელ არჩევნებს, სწორედ ის გამტყუნდება ბრიუსელის, ვაშინგტონის და სხვა დედაქალაქების თვალში.

ყველაზე დიდი ოპოზიციური პარტიის მხრიდან საკუთარ წინადადებაზე უარის თქმა დააზარალებს საერთო საქმეს, ოპოზიციას და საკუთრივ ენმ-ს.

გადაწყვეტილებას პარტიაში იღებს პარტიის ოფიციალური ხელმძღვანელობა. მაქვს ამის მოლოდინი, იმედიც და ვგულშემატკივრობ ნიკა მელიას. ასევე, სრულიად განსაკუთრებულია საერთაშორისო ასპარეზზე საერთოოპოზიციური მთავარი საჯარო ფიგურის - სალომე სამადაშვილის ძალისხმევაც.

მიშაც ცდება ხანდახან. სწორი იყო, ენმ- ს პოლიტსაბჭოზე მხარი რომ დაუჭირა. ახლა პლებისციტზე ასეთი დარტყმით შეცდა. დარწმუნებული ვარ ამაში. და ამის დანახვა აუცილებელია. ამით მიხეილ სააკაშვილის პოლიტიკურ წონას არაფერი დააკლდება და ენმ, ოპოზიცია მთლიანად და ქართული საზოგადოება მოიგებს.

დასავლეთი - ხელისუფლება - ოპოზიცია

ამ ტრიადაში ის ორი იგებს, რომლებიც ერთმანეთთან უფრო ახლოს არიან. პოსტსაბჭოთა საქართველოს მთელი პოლიტიკური ისტორია ამას ადასტურებს!", - წერს ბერძენიშვილი.