"რევოლუციონერები ყოველთვის უკონტროლო სიტუაციით მოდიან"
"არ დაბადებულა ადამიანი, რომელიც სისხლზე წავა და შემდეგ დემოკრატიულ არჩევნებს მოინდომებს"
"საერთაშორისო საზოგადოებრიობის ჰიპერაქტიურობას უშედეგოდ არ ჩაუვლია"
"ძმებო, თქვენ უკვე თქვენი საქმე შეასრულეთ, ეს რეჟიმი გააშიშვლეთ და ვისაც გინდათ ცვლილებები, ლეღვის ფოთლად ნუ დაუდგებით ამ შიშველ რეჟიმს. მეფე შიშველია, მეფე უნდა წავიდეს და ქართველი ხალხი ამას გააკეთებს", - მიმართა "ქართული პარტიის" პოლიტიკურმა მდივანმა ეროსი კიწმარიშვილმა "რვიანში" შემავალ პარტიებს, რომლებიც ხელისუფლებასთან საარჩევნო გარემოზე აწარმოებენ დიალოგს. ამის პარალელურად ოპოზიციური "რვიანი" რეგიონებში დადის.
რისთვის გადაინაცვლა ოპოზიციურმა "რვიანმა" რეგიონებში, რას ელის ხელისუფლებასთან მოლაპარაკებით, ამის შესახებ "ახალი მემარჯვენეების" ერთ-ერთ ლიდერს, მამუკა კაციტაძეს ვკითხეთ.
- რეგიონებში გასვლა აუცილებელი იყო იმისათვის, რათა ხალხამდე ჩვენი პოზიცია მიგვეტანა. ოპოზიციის ერთი ნაწილი ნიჰილისტურად უყურებს საარჩევნო გარემოზე ლაპარაკს, შეუძლებლად მიაჩნია ხელისუფლების არჩევნებით შეცვლა და პროცესების მეტად ესკალაციაზე აქვს აქცენტი, ამიტომაც საზოგადოებისთვის უნდა დაგვენახვებინა ხელისუფლების არჩევნების გზით შეცვლის პრიორიტეტულობა.
აქამდე არ მინახავს საერთაშორისო საზოგადოებრიობის ისეთი აქტივობა, რაც შეწყვეტილ მოლაპარაკებას მოჰყვა. ვგულისხმობ აშშ-ის სახელმწიფო დეპარტამენტის ყოველწლიურ ანგარიშს, ჰილარი კლინტონის სპეციალურ განცხადებას, ნატოს გენმდივნის სპეციალური წარმომადგენლის, ჯეიმს აპატურაის სპეციალურ განცხადებას, ევროსაბჭოს საპარლამენტთაშორისო ასამბლეის დასკვნით დოკუმენტს, ნატოს გენერალური ასამბლეის სპეციალურ დოკუმენტს და საქართველოში აკრედიტებული საელჩოების განცხადებებს.
ყველა ერთხმად ამბობს, რომ ოპოზიციისა და ხელისუფლების მოლაპარაკება აუცილებლად უნდა გაგრძელდეს და დასრულდეს შედეგით, რამაც უნდა უზრუნველყოს არჩევნების ობიექტურ და დემოკრატიულ გარემოში ჩატარება. ყველა მაღალი რანგის ვიზიტორი ხვდება ოპოზიციური "რვიანის" წარმომადგენლებს. მოლაპარაკების ჩიხში შესვლის გამო საერთაშორისო საზოგადოებრიობის ჰიპერაქტიურობას უშედეგოდ არ ჩაუვლია. საერთაშორისო წნეხის შედეგი იყო განცხადებები, რომ ხელისუფლება მზად არის ახლო მომავალში განაახლოს მოლაპარაკება და კონკრეტული წინადადებები წარმოადგინოს ჩვენს შეთავაზებებზე.
ჩვენ დავსვით ორი კონკრეტული საკითხი: ამომრჩეველთა სიების ობიექტური ფორმირება და ობიექტური საარჩევნო სისტემა. დღეს ძალიან ბევრი ჩვენი თანამოქალაქეა გასული საზღვარგარეთ, მათ შორის - ბევრი არალეგალურად. საქართველოდან მილიონზე მეტი კაცია გასული, არჩევნების დღეს კი საქართველოში უცხოეთიდან მხოლოდ 40 ათასამდე ხმა შემოდის. ცხადია, არალეგალურად გასული საქართველოს მოქალაქეები უცხოეთში ხმას ვერ მისცემენ. სახელმწიფომ იცის, ვინც არის არალეგალურად გასული და არჩევნების დღეს მათი ხმებით მანიპულირებს.
ეს რომ არ მოხდეს, ამიტომ გვინდა ჩატარდეს მოსახლეობის ბიომეტრიული აღწერა (თითის ანაბეჭდები, ელექტრონული ხელმოწერა და ბიომეტრიული სურათი) და ვინც ფიზიკურად საქართველოშია, ის შევიდეს სიაში, ვინც საზღვარგარეთ არის ოფიციალურად დარეგისტრირებული, ის ადგილზე გაივლის რეგისტრაციას. ეს სისტემა უზრუნველყოფს, რომ ერთ ამომრჩეველს ერთი ხმა ჰქონდეს და გამორიცხავს კარუსელს.
- როგორ ფიქრობთ, დათანხმდება ამას ხელისუფლება? როგორც ვიცი, პრობლემად მიაჩნიათ ბიომეტრიული რეგისტრაცია.
- იმედია, ხელისუფლება გადადგამს ნაბიჯებს საარჩევნო გარემოს შესაცვლელად, რაც ობიექტური არჩევნების ჩატარების პირობას შექმნის, თუ არა და, გადავადგმევინებთ. თუ როგორ, ამის სხვადასხვა ფორმა და მეთოდი არსებობს. ოპოზიციურ "რვიანს" აქვს სამი რესურსი: პირველი - "რვიანის" ერთობა კონკრეტულ საკითხზე, მეორე - ქართველი საზოგადოების ერთი ნაწილის მხარდაჭერა და მესამე - საერთაშორისო საზოგადოებრიობის მხარდაჭერა მოლაპარაკების შედეგიანად დასრულებაში. სწორედ ყველაფერი ეს მაფიქრებინებს, რომ შედეგს მივიღებთ, მაგრამ თუ ხელისუფლება არ გამოიჩენს პოლიტიკურ ნებას, ვეცდებით, ჩვენ შევუქმნათ.
- რა ხერხით?
- ყველა იმ ხერხით, რაც არ არის კონსტიტუციის მიღმა გასული.
- ე.ი. მაინც აქციებამდე მიდიხართ?
- დიახ, აქციაც პოლიტიკური ბრძოლის ფორმაა. ამერიკა და ევროპა გამოდის ქუჩაში და რატომ ჰგონია ვიღაცას, რომ ეს არქაული ან ჯუნგლის კანონით მოქმედებაა.
- ე.წ. რევოლუციურ პარტიებთან ერთად დადგებით ქუჩაში?
- თუ ქუჩაში ერთად აღმოვჩნდებით კონკრეტული პრობლემის გადასაჭრელად, ამაში ცუდი არაფერია, მაგრამ "ახალი მემარჯვენეების" სახელით ვიტყვი, რევოლუციით, ანუ ხელისუფლების ძალისმიერი გზით გადაგდება და ძალაუფლების ხელში აღება ჩვენთვის მიუღებელია. ასევე ვფიქრობდით "ახალი მემარჯვენეები" 2003 წელსაც. ჩვენ მაშინ ვთქვით, "არა რევოლუციას" და რამდენიმე თვეში მთელი საქართველო ლაპარაკობდა, რატომ ფეხი არ გამიხმა, ქუჩაში რომ გავედი და მერე სააკაშვილს მივეცი ხმაო.
- მაინც რატომ არის თქვენი პოზიცია "არა რევოლუციას"?
- არ ვიცი რევოლუცია, რომელსაც სახელმწიფოსთვის კარგი მოუტანია. რევოლუციით იმარჯვებს კონკრეტული პოლიტიკური კლასი, ვინც ახდენს რევოლუციას, სახელმწიფო და ხალხი კი ზარალდება, რადგან რევოლუციონერები ყოველთვის უკონტროლო სიტუაციით მოდიან.
- მაგრამ ე.წ. რევოლუციური პარტიები ამბობენ, მოვახდინოთ რევოლუცია, გავუშვათ სააკაშვილი და მერე ჩავატაროთ დემოკრატიული არჩევნებიო.
- მე და თქვენ რომ რევოლუცია მოვახდინოთ, გავაგდოთ ეს ხელისუფლება და მერე ვიღაც მესამემ გვითხრას, ახლა დემოკრატიული არჩევნები ჩავატაროთო, რას ვეტყვით? არ დაბადებულა ადამიანი, რომელიც სისხლზე წავა და შემდეგ დემოკრატიულ არჩევნებს მოინდომებს. რევოლუციით ერთ მოძალადეს მეორე ცვლის და ეს სახელმწიფოს მხოლოდ აზარალებს. ჩვენ არჩევნებით შევცვლით ხელისუფლებას.