"სულ ვიყავი მომხრე ამ გაყალბებულ პარლამენტში არ შევსულიყავით. მაგრამ იმ დღეს პირველად ვიფიქრე, რა კარგია, იქ რომ ვიყავი-მეთქი" - კვირის პალიტრა

"სულ ვიყავი მომხრე ამ გაყალბებულ პარლამენტში არ შევსულიყავით. მაგრამ იმ დღეს პირველად ვიფიქრე, რა კარგია, იქ რომ ვიყავი-მეთქი"

"იმედი არ ჰქონდეთ, ოდესმე დავიღალო საქართველოს სიყვარულში"

"მოკლედ ღიაა გვერდი. დადეთ თქვენი მოსაზრება - კი ან არა, პარლამენტში შესვლასთან დაკავშირებით", -ასეთი სტატუსი სოციალურ ქსელში ერთი თვის წინ პარტია "კანონი და სამართლის" დამფუძნებელმა თაკო ჩარკვიანმა დადო და ხალხის აზრს გაეცნო. მალევე ამ სტატუსს დიდი გამოხმაურება მოყვა, 600-ზე მეტი კომენტარი გაჩნდა მის გვერდზე. ზოგი პარლამენტში შესვლას ურჩევდა, ზოგი უარს ამბობდა. ხალხი ღიად აფიქსირებდა თავის აზრს. საბოლოოდ, თაკო ჩარკვიანმა პარლამენტში შესვლის გადაწყვეტილება მიიღო და ორი კვირაა, აქტიურად ჩაერთო საპარლამენტო საქმიანობაში. სხდომათა დარბაზში მისი ცხარე კამათიც ისმის. ორი დღის წინ ბექა დავითულიანს დაუპირისპირდა. ამის მიზეზი დავითულიანის განცხადება გახდა, რომელმაც გამოსვლისას აღნიშნა, რომ წინა ხელისუფლებამ ხელი მოაწერა რეზოლუციას, რომლის მიხედვითაც, 2008 წლის ომი საქართველომ დაიწყო. უმრავლესობის წევრის ეს განცხადება ოპოზიციონერმა თაკო ჩარკვიანმა გააპროტესტა. ასევე, იმავე დღეს იგივე საკითხზე დაუპირისპირდა უმრავლესობის კიდევ ერთ ლიდერს, გია ვოლსკის. ამბობს, რომ ყოველთვის სერიოზულ ოპონირებას გაუწევს პარლამენტში უმრავლესობას.

თაკო ჩარკვიანი: - ასეთი კარგი დასკვნა დაიდო საქართველოს და რუსეთის ომთან დაკავშირებით, ცალსახად გარკვეულია, რომ საქართველოს ომი არ დაუწყია, ამის მიუხედავად, საკანონმდებლო ორგანოში დღეს უმრავლესობიდან შეიძლება ვიღაც გამოხტეს, გაბედოს და თქვას, ომი საქართველომ დაიწყოო. ვერ გეტყვით, ვიღაც არაპროფესიონალი ამბობს ამას, ვინაიდან ასეთი დოკუმენტი უკვე არსებობს. როცა ამას ამბობ, ამ დოკუმენტის შემდეგ ბეცი ხარ ან - მავნებელი. ფაქტია, ვიღაც ბედავს ამის თქმას. პარლამენტში ასეთი ამბავი იმიტომ ავტეხე, რომ არ მინდოდა, დაფიქსირებულიყო ეს სიბინძურე საქართველოს წინააღმდეგ საკანონმდებლო ორგანოში. სირცხვილია უმაღლეს საკანონმდებლო ორგანოში ეს საშინელება რომ ფიქსირდება. იცით თქვენ, სულ ვიყავი მომხრე ამ გაყალბებულ პარლამენტში არ შევსულიყავით. ვამბობდი, შესვლა არ არის სწორი-თქო, მაგრამ იმ დღეს პირველად ვიფიქრე, რა კარგია იქ რომ ვიყავი-თქო. არ გავუტარე საქართველოს წინააღმდეგ გაკეთებული მავნებლობა პარლამენტის ორ წარმომადგენელს. ობიექტურობა მოითხოვს, ვთქვა. ძალიან კორექტურად მიიღო ვოლსკიმ ჩემი პასუხი და აღარ გააგრძელა, ამას მაინც ვაქცევ ყურადღებას. მაგრამ ძალიან ანტისახელმწიფოებრივია და არაკორექტულია ვინმე, დავითულიანი, რომელიც თავს გვამახსოვრებს ანტისახელმწიფოებრივი გამოსვლით და თავისი თმის ვარცხნილობით. თავხედურად შემეპასუხა, მადროვეთო და ის აზრი ისევ გაგრძელა, საქართველოს ომის დაწყებისა. ვუთხარი, 4 სოფელი გამოიარა მტერმა, არავითარ შემთხვევაში არ გადროვებთ ანტისახელმწიფოებრივი განცხადების გაკეთებას-მეთქი. ამის თქმა არის კონსტიტუციის დარღვევა, მტერი გვიყურებს და მიიღებთ ყოველთვის ისეთ დიდ წინააღმდეგობას დეპუტატისგან-თქო. რა უფლებაც თქვენ გაქვთ, ის უფლება მე მაქვს-თქო და არაფრით არ მივეცი საშუალება, ესაუბრა. არადა, უკვე ჩემი დრო აღარ იყო, ვოლსკის გამოსვლის შემდეგ მე და ვოლსკიმ რომ ვიპაექრეთ და ვიპოლემიკეთ, იქ ამოვწურე ჩემი საუბრის დრო.

ძალიან კორექტულად დავაფიქსირე ჩემი აზრი ვოლსკისთან, მეორედ ეს არ გაიმეოროთ, ანტისახელმწიფოებრივია-მეთქი, ჩვენს დაპირისპირებას ოპოზიცია და პოზიცია ქვეყანას ნუ მივაყოლებთ. თითქოს, დასრულდა ეს საუბარი, მაგრამ ხომ არიან "მოსამსახურენი", რომლებსაც უნდათ მამა მარჩენალს დაანახვონ რაღაც, უნდათ, თუნდაც, სამშობლოს დაძირვაში პირველები იყვნენ, ვინმე, დავითულიანმა ჩემში სწორედ ასეთი შთაბეჭდილება დატოვა. იქ უკვე არ მქონდა რეგლამენტით გათვალისწინებული დრო, მაგრამ მაინც არ დავუთმე, არ მივეცი საშუალება, მინდოდა, უკან დაეხია. ასეც მოხდა, მერე თავის მართლებაში გადაიტანა. ძალიან მომეწონა, გარეთ რომ გამოვედი, ჟურნალისტთა მთელი კორპუსი, ოპოზიციური არხის თუ სამთავრობო არხის წარმომადგენლები, ყველა ჟურნალისტის სახეზე სინათლე დავინახე, რა კარგია წინააღმდეგობა რომ მიიღესო. ასეთი საკანონმდებლო ორგანო რომ გექნება და ასეთ მავნებლობას წამოაყრანტალებენ, მერე რატომ უნდა გაგიკვირდეს, რომ იმ დეპუტაციამ და ხელისუფლებამ გავრილოვი თავისი ხელით შემოიყვანა. თუ არ შემოიყვანეს და არ იცოდნენ, მთლად უარესი, მაშინ საერთოდ უშიშროება არ გვყოლია, მაგრამ ვერც ამას იტყვიან, რადგან უკრაინის წარმომადგენელმა დატოვა დელეგაცია და შემდეგ ამათმა ის შემოიყვანეს. იცოდნენ, რა რეაქცია მოჰყვებოდა ამას, ჩვენ მანამდე გვქონდა გამოსვლები გავრილოვის წინააღმდეგ. ეს არის ხელისუფლება, რომელიც აკეთებს ასეთ მავნებლობას. ყოველდღე დიდ წინააღმდეგობას ვუწევთ და გავუწევთ ბოლომდე. მათ არ გაუვათ ეს ამბავი. ინსტიტუციურად მიიტაცეს ქვეყანა, რასაც აკეთებენ, ეს არის საქართველოს წინააღმდეგ მოქმედება.

- ქალბატონო თაკო, ამდენი თვის განმავლობაში აცხადებდით, რომ პარლამენტში არ შეხვიდოდით, საბოლოოდ, მაინც შეხვედით, არ გაგიჭირდათ ეს?

- გულწრფელად გეტყვით, ძალიან გამიჭირდა. რომ არ მოგატყუოთ, ვერაფერი ამბავია იქ ჩვენი ყოფნა, თუ ჩვენ კომისიებით არ მოვიგეთ. ჩვენი მოლოდინი გამართლდა, რატომაც არ მინდოდა შესვლა, ეს იყო. ისინი სრულიად სამარცხვინო კანონპროექტებს წარმოადგენენ და ამტკიცებენ. იგივე ამნისტიას და ოპოზიციის ნაწილმა დოკუმენტს ისე მოაწერა ხელი, დაზარალებულებს საერთოდ არ გაესაუბრა. ეს ძალიან დიდი შეცდომა იყო. მე არ მოვაწერე ხელი შარლ მიშელის დოკუმენტს სწორედ ამ ამნისტიის გამო. ეს დიდი შეცდომაა. ნახეთ რა ხდება, კანონპროექტებს გამოიტანენ, კენჭისყრით ყველაფერს გაიტანენ, ერთადერთი შანსი არის ოპოზიციის, რომ საგამოძიებო კომიტეტები შეიქმნას და ისე ვიბრძოლოთ. ეს დაიმახსოვრონ, არ დავიღლები სამშობლოსთვის ბრძოლაში, მაგრამ მე ის არ მინდა, ტენისის მაგიდის თამაშში ჩაგვითრიონ. კიდევ გიმეორებთ, გუშინდელ დღემდე უკმაყოფილო ვიყავი იქ შესვლით, მაგრამ მაშინ მივხდი, კარგი იყო, იქ რომ ვიყავი, უდიდესი წინააღმდეგობა შეხვდა მათ წამოსროლილ ფრაზას და საქართველოს პარლამენტში ეს არ დარჩა უყურადღებოდ.

- რისთვის იბრძვით ახლა პარლამენტში? - თუ კომისიებით არ ვაჯობეთ, სხვანაირად არაფერი გამოვა. ბევრი თემაა. მაჩალიკაშვილის საქმე ავიღოთ, დაზარალებულად არ ცნეს ადამიანი ამ დრომდე, ახალი გარემოებაა თამარ ბაჩალიაშვილის საქმეში და ა.შ. საგამოძიებო კომისიები უნდა შეიქმნას და უნდა გამოიძიონ ეს საქმეები, ასევე, ანტიკორუფციული კომისიებიც უნდა შეიქმნას. გამოძიებას რომ დაიწყებ, ეს არის ერთადერთი იმედი, თორემ სხვანაირად არაფერი გამოვა. ჯერჯერობით რასაც ვხედავ, რასაც მე ვამბობდი, ის ჩანს, რომ აზრი არ ჰქონდა ჩვენს შესვლას. კარგი ის არის, რომ რაღაცნაირად არ ვაძლევთ საშუალებას ისაუბრონ, რაც უნდათ, იქვე ვართ გამაგრებულები და ამიტომ ახლა უფრო ფრთხილები არიან, რადგან ოპონირებას ვუწევთ, ეს კი ძალიან მნიშვნელოვანია. უთუოდ არის ამაში სასარგებლო, მაგრამ მეტი შედეგი მინდა, დაიდოს, ეს მნიშვნელოვანია. ასე ვიბრძვით და კბილებით გაგვაქვს, იმედი არ ჰქონდეთ, ოდესმე დავიღალო საქართველოს სიყვარულში.

- დღეს ხომ არ ფიქრობთ, რომ აქამდეც უნდა შესულიყავით პარლამენტში და ეს პერიოდი დაკარგულია? - ძალიან საინტერესო შეხვედრა მქონდა პარლამენტში საქართველოში ნატოს მისიის ხელმძღვანელობასთან და მათაც ვუთხარი, ჩვენი თვითმიზანი არ იყო ბოიკოტი, ბოიკოტმა ბევრი ქნა და შედეგი დადო. თქვენ გახსოვთ ივანიშვილის გამომეტყველებებიც. პირველი მარცხი იყო მაშინ, როცა საპრეზიდენტო არჩევნებისთვის მეორე ტური დაინიშნა და დიდი მარცხი განიცადა, საშინელი სახე ჰქონდა მას. მეორე მარცხი განიცადა გავრილოვის ჩამოსვლის დროს. მიხვდა, ესეც იყო უდიდესი მარცხი, როცა საკუთარ ხალხს თვალებს დათხრი და მესამე მარცხი იყო ისტერია მისი, როდესაც ერთპარტიული პარლამენტი მიიღო. პარლამენტი ოლიგარქისთვის ყველაზე საშიში მდგომარეობაა, რადგან ასეთი რამ ხდება მხოლოდ ავტორიტარულ ქვეყნებში. ასე რომ, ეს ძალიან არ მოეწონათ. როცა ქვეყანა კორუფციაშია და გაქვს ერთპარტიული პარლამენტი ძალიან კარგად იცის ოლიგარქმა, ასეთი ქვეყნები ვერ წევრდებიან ნატოში, ანაკლიის პროექტის ჩაგდებით, კრიმინალის გაზრდით, კოვიდის არაცრით და ა.შ.

გახსოვთ, დაეძებდნენ 700 მილიონს და არანაირი გამოძიება არ ჩატარებულა, ახლა გახარია ლაპარაკობს, რომ კორუფციაშია ჩამპალი ყველაფერიო. მათი მოქმედება ქართული სახელმწიფოს წინააღმდეგ არის მიმართული. ბოიკოტმა თავისი საქმე გააკეთა, შეცდომა ის იყო, დაზარალებულებთან რომ არ უსაუბრიათ და ისე რომ შევიდნენ პარლამენტში და მერე ბოდიშის მოხდა მოუწიათ. ბოდიში ასეთ დროს არ გშველის. უნდა ჩააყენო საქმის კურსში ამომრჩეველი და ისე მოაწერო ხელი. გარკვეული პარტიები რომ შევიდნენ, მერე უკვე აღარ იყო პარლამენტი ერთპარტიული და იმ ბოიკოტს დააკარგვინეს აზრი. აზრი არ ჰქონდა ამ პროტესტს. მე შედარებით პატარა პარტია მაქვს, ვიდრე - "ნაცმოძრაობას". რომ ხედავ, იმ პარტიის გამარგინალება უნდა ხელისუფლებას, რომელმაც 27 პროცენტი აიღო, როგორი ამბავია? სულ მეუბნებიან, "ნაციონალებს" იცავო, მე ვიცავ 27-პროცენტიან, დასავლური ვექტორის პარტიას და ამომრჩეველს. დავიღუპეთ ჩვენ, თუ ეს ვექტორი გაწირა ხელისუფლებამ, მაშინ ჩათვალეთ რუსეთს გავადავაბარეთ ყველაფერი. მე უფრო შორს ვიხედები და არ ვუყურებ ისე, რასაც ჰქვია "ქართული ოცნების" ომი "ნაცმოძრაობასთან". ჩემთვის იყო უმძიმესი გადაწყვეტილება პარლამენტში შესვლა, გამოკითხვაც ჩავატარე სოციალურ ქსელში, სადაც ძალიან აქტიური ვარ. როგორ არ უნდა მეკითხა ხალხისთვის აზრი? ვიღაცებმა კი მითხრეს, რად გინდოდაო, ტროლებიო, მაგრამ ვერავინ მომერია, აბსოლუტურად. იქვე, ჩემს კედელზე მიდიოდა პოლემიკა. ეს არის ჩემი ცხოვრების ბიოგრაფიის ერთი ნაწილი და ვთვლი, რომ ნამუსიანად შევედი პარლამენტში. რომ შევედი, არც არაფერი უკადრებიათ.

- ამხელა პროტესტის შემდეგ პარლამენტში შესვლის პირველი დღე ემოციური იყო? - პირველივე დღე იყო ნაყოფიერი. ოხანაშვილთან მქონდა პირველ დღეს პოლემიკა, გაყალბებულ პარლამენტში შემოხვედითო? ვუპასუხე, - დიახ, გაყალბებულში-თქო. ამერიკის შეერთებული შტატები რომ გეუბნება, სასამართლოში კლანი გაქვს და შეაჩერე მოსამართლეთა დანიშვნებიო, როგორ შეიძლებოდა იქ ჩატარებულიყო სამართლიანი არჩევნები? ვერ მიპასუხეს. ჩიტი ბრდღვნად ღირდა. რაც იქ ვარ, მეორე კვირაა და არ ჩამიმუხლავს, არ ჩამიგდია არაფერი ერთი წამით. რაც შემიძლია, ყველაფერს გავაკეთებ, მაგრამ რა შედეგსაც მივიღებთ,  ეს არის მთავარი, თორემ პარლამენტს შესასვლელიც აქვს და გამოსასვლელიც. ბალტიის ქვეყნებშიც ძალიან საინტერესო რამ მოხდა, დეპუტაცია შეურთდა ქუჩაში ხალხს. ყველაფერს თავის ხიბლი აქვს. დღეს სახელმწიფო ინსტიტუციები მიტაცებულია და ეს დასაბრუნებელია. ძალიან ფრთხილად უნდა ვიყოთ, საქართველოს არჩევანი დასავლეთია. დასავლური ვექტორი უნდა გამოიკვეთოს, რომ ვიღაცამ არ მომაძახოს პარლამენტში, შენ რომ ვოლსკის გამოსვლაზე პროტესტი გაქვს, შენთან ოპოზიციის მაგიდასთან იმავე განცხადების გამკეთებელი რატომ გიზისო. ობიექტურობა მოითხოვს - იგივე განცხადება მოგვისმენია ქალბატონი ბურჯანაძისგან. უნდა გავითვალისწინოთ, რომ ხალხი ნიჰილისტურად იქნება განწყობილი ამ შემთხვევაში.

- დღეს თქვენთვის რა კანონპროექტებია მნიშვნელოვანი? - ანტიკორუფციული და საგამოძიებო კომისიების შექმნა არის ძალიან მნიშვნელოვანი.

- შარლ მიშელის დოკუმენტზე არ არის თქვენი ხელმოწერა, არ მოაწერთ ხელს? - შარლ მიშელის დოკუმენტზე ხელმოწერას არ ვაპირებ, რადგან ამნისტიის ამ ფორმით მიღებას არ ვეთანხმები და როგორ გავუტეხავ გულს იმ ხალხს, ვინც ასე ფიქრობს. მე ვიქნები ძალიან აქტიური პარლამენტში.

- მამუკა ხაზარაძე ამბობს, შესაძლოა, პარლამენტი ისევ დავტოვოთ, რადგან ხელისუფლება არ ჩერდება და მოსამართლეების დანიშვნას საერთაშორისო პარტნიორების გაფრთხილების მიუხედავად აგრძელებსო, შეუერთდებით ამას? - მამუკას მინდა ვუთხრა, რომ ბოლომდე თქვენ გვერდით ვიქნები სასამართლოსთან მიმართებაში. იმ თვალსაზრისით, რომ მას ძალიან ცუდად ექცევიან. მე გითხარით, პარლამენტს შესასვლელი კარიც აქვს და გამოსასვლელიც-მეთქი. მათთან ერთად ვიქნები ბოლომდე, სასამართლოს თემის გამო, მაგრამ შენიშვნა რომ არ მივცე ხელმომწერ პარტიებს, გამორიცხული ამბავია. მიხვედით, ხომ, იმ დასკვნამდე, რასაც მე ვამბობდი, ნაადრევი იყო შესვლა და რომ ოლიგარქიულ მმართველობას არ აინტერესებს არც შარლ მიშელის დოკუმენტი და - არავის დოკუმენტი. რომელი ქვეყანა იქცევა ხოლმე ასე, არაფერი რომ არ აინტერესებს? - რუსეთი. ესენიც ასე იქცევიან, რადგან არიან რუსეთის მსახურნი. სჯობდა, ცოტა მოგვეთმინა. რაც შეეხება ბოიკოტს, მოსაფიქრებელია და მათი სურვილების მიხედვით არ დავდივარ. როდესაც ვეუბნებოდი, ჩვენ მეტს წამოვიღებთ ბოიკოტით, ნუ დაუკარგავთ აზრს ბოიკოტს, მაშინ არ დაგვიჯერეს და შევარდნენ. ხელმომწერი პარტიები, ჩემი აზრით, ნაადრევად შევიდნენ პარლამენტში. მათ სრულიად შეცვალეს პოლიტიკური ვითარება. ბოიკოტი იყო განკუთვნილი იმისთვის, რომ ყოფილიყო ერთპარტიული პარლამენტი, რომელიც აღარ არის პარტიების ნაწილის შესვლის შემდეგ და მრავალპარტიული გახდა. ახლა უკვე ოპონენტს, რომელსაც ჩვენ პრეტენზიებს ვუყენებთ, ამ შემთხვევაში ხელისუფლებას, რა თქმა უნდა, უფრო აწყობს ის, რომ მრავალპარტიულია. შენ იქნები თუ არ იქნები, რაოდენ მსხვილი ოპოზიციური პარტიაც უნდა იყო, უკვე მათთვის მნიშვნელობა აღარ აქვს, პირიქით - უფრო კომფორტულია. ჩვენ გვინდა, რომ ეს კომფორტის ზონა არ ჰქონდეს ხელისუფლებას და რაც უფრო ნაკლებად კომფორტულ ზონაში იქნებიან, უფრო კარგია ეს ხალხისთვის. გვინდა რეფორმები, თითოეულ ხმას აქვს ძალიან დიდი მნიშვნელობა. რაც შეეხება არჩევნების გაყალბების ნაწილს, მე ისევ იმ პოზიციაზე ვარ, რომ არჩევნები გაყალბდა.

(სპეციალურად საიტისთვის)