"სტურუა ქართულ თეატრს არ დააკლდება"
მიუხედავად იმისა, რომ ხელისუფლების წარმომადგენლები თავს არიდებდნენ რობერტ სტურუას მოხსნაზე კომენტარს, ჩვენ მაინც მოვახერხეთ პარლამენტის განათლების, მეცნიერებისა და კულტურის კომიტეტის თავმჯდომარე გოკა გაბაშვილთან გასაუბრება:
- რამდენად სწორად მიგაჩნიათ ასეთი რანგის ხელოვანის ქსენოფობის იარლიყით თეატრიდან გაშვება?
- მინისტრმა ნიკა რურუამ ამ საკითხზე ამომწურავი განცხადება გააკეთა, არგუმენტებიც მოიყვანა და ახსნა, რატომ მიიღო ეს გადაწყვეტილება. საჯარო ქსენოფობიური და რასისტული განცხადებები არც ხელოვანს შვენის და არც სხვა პროფესიის ადამიანს.
- მიგაჩნიათ, რომ სტურუას განცხადებები ქსენოფობიური იყო?
- მისი განცხადებები რამდენიმე შემთხვევაში - ქსენოფობიური, რამდენიმე შემთხვევაში კი რასისტული გახლდათ. ასეთი განცხადება ერთხელ ხომ არ გაუკეთებია? ამგვარ სამარცხვინო განცხადებებზე ნებისმიერი სახელოვანი ადამიანი ბოდიშს მოიხდიდა.
- ბატონმა სტურუამ განაცხადა, რომ სომეხ ხალხს მოუბოდიშა.
- ჩვენ არ მოგვისმენია მისგან ბოდიში. მისი ყოველი შემდგომი განცხადება პირიქით, უფრო დამამძიმებელი იყო და მეტად გამოხატავდა რასიზმსა და ქსენოფობიას.
- მისი წასვლა ქართულ თეატრს არ დააზარალებს?
- სტურუა ქართულ თეატრს არ დააკლდება, რადგან ის ქართული თეატრიდან არავის გაუგდია და შეუძლია კვლავ დადგას სპექტაკლები.
- რუსთაველის თეატრთან გასულ კვირას საზოგადოება შეიკრიბა. ხალხმა დასთან ერთად გააპროტესტა რეჟისორის მოხსნა.
- რამდენიც უნდა ილაპარაკონ დემაგოგიურად, რომ რობერტ სტურუას პროფესიული საქმიანობა აუკრძალეს, ეს აბსოლუტური ტყუილია.
- ისე, მიხეილ სააკაშვილიც შემჩნეულია ქსენოფობიურ გამონათქვამებში.
- სააკაშვილის პოზიციაა, რომ საქართველო მულტიკულტურული ქვეყანაა, საქართველოს ყველა მოქალაქე თანაბარია უფლებებით.
როგორც სტურუა ამბობს, თავისუფლება მინდა, ამიტომ რუსეთში უნდა ვიმუშაოო. ჩანს, ყველას თავისებურად ესმის თავისუფლება, კულტურა, ქსენოფობია და რასიზმი.
- არის მოსაზრება, რომ რობერტ სტურუამ ამ ფორმით წასვლა განგებ გაითამაშა, ანუ აიძულა ხელისუფლება მოეხსნათ.
- არ ვიცი ეს დეტალები. ჩემთვის სიტუაცია აბსოლუტურად ცხადია, ზოგჯერ ადამიანი პროფესიონალია, მაგრამ საზოგადოებრივი პოზიცია იმდენად მიუღებელი აქვს, რომ არ აჩერებენ საჯარო თანამდებობაზე.