დასაკბენები, ანუ სად დარგო ნარმანიამ ნახევარი მილიონი ხე
ერთი კვირაა, მთელი საქართველო მარჯვენასაჭიანი მანქნების ექსპორტის შეზღუდვასა და საავტომობილო ჯარიმების ახალ რეგულაციებზე ლაპარაკობს. მეც ამ თემით მინდოდა დამეწყო, მაგრამ ისეთი ამბავი წავიკითხე ამ წუთს, შსს-ს ცნობებში, რომ არ შემიძლია, თქვენც არ გაგიზიაროთ, ავტომობილებზე კი ქვევით ვისაუბროთ.
მაშ ასე: "გურჯაანის მუნიციპალიტეტის სოფელ ახაშენში ახალგაზრდა გოგონამ მეზობელი ქალბატონი დაკბინა. ქალბატონს ექსპერტიზა ლევან სამხარაულის სახელობის სასამართლო ექსპერტიზის ეროვნულ ბიუროში ჩაუტარდა. კახეთში შსს-ს პრესსამსახურის წარმომადგენლის, შორენა ჯახუას ინფორმაციით, საქმე სსკ-ის 125-ე მუხლით აღიძრა, რაც ცემას გულისხმობს. შემთხვევას წინ კონფლიქტი უძღოდა".
ამ ბოლო ფრაზა-განმარტებამ საერთოდ მომსპო: კონფლიქტი უძღოდა წინო. წარმოიდგინეთ, - რომ არ ყოფილიყო კონფლიქტი და ისე, უმიზეზოდ რომ დაძგერებოდა და დაეკბინა!
ვინმესთვის შესაძლოა, არც არაფერი იყოს განსაკუთრებული ამ ამბავში, მაგრამ მე ნამდვილად მენიშნა, რადგან სულ ვფიქრობდი, გამოთქმა რომ არსებობს - "ესღა გვაკლდა!", რა შემთხვევაში იქნებოდა ზუსტი, რა არის ის ერთადერთი, რასაც "ჩვენქვეყნელები" ერთმანეთს არ ვუკეთებთ-მეთქი და აჰა: პირდაპირი მნიშვნელობით დაკბენა არ იყო ჯერ პრაქტიკაში, მხოლოდ ეს გვაკლდა!
ოღონდ ცუდი ის არის, რომ ამისთვის ცალკე მუხლი არ გვქონია კოდექსში, ცემის მუხლში გადის. ტეხავს. აბა, სად ცემა - ტრივილაური, "ჩვეულებრივი", გოიმური "რტყმევა" და სად ასეთი ნატურალური, ბუნებრივი და ადამიანური - კბენა!
აი, გასულ კვირაში, პატრიარქმა რომ თქვა პატიმარი ქალების სპექტაკლზე, - რა კარგი იქნებოდა, პატრიარქს ტუსაღების შეწყალების უფლება რომ ჰქონდესო, რამდენი კბილალესილი გამოჩნდა! აააიტ! რას ჰქვია, პატრიარქს უნდა ჰქონდეს უფლებაო! მერე რა, რომ 90%-იანი რეიტინგი აქვსო! მერე რა, დღეს შეწყალების საკითხებს ის ადამიანები წყვეტენ, ვისზეც ათას რამეს ამბობენ და ამ "ათასიდან", სულ ცოტა "ცხრაასი" სიმართლეაო! ესაო, ისაო... ვერ დაკბინეს, მაგრამ მცდელობა იყო. მცდელობაზეც არის რაღაც მუხლი, ხო?
ამასობაში, საქართველოში გირჩამ "ნაყოფი გამოიღო", ანუ დაისხა: ჯაფარიძე-ხაჩიძე-კუბლაშვილი-მელაძის კვარტეტს კიდევ ხუთი ყოიფილი "ნაცი" ემატება მათი ლიდერის - ბაქრაძის თამადობით და ახალ ფრაქციასაც მივიღებთ პარლამენტში. "გირჩი - შიშველთესლოვანი მცენარეების სქესობრივი გამრავლების ორგანო." - განმარტავს ვიკიპედია და ეგ არი რა - გამრავლდნენ...
ჰო, მანქანები: ეეეჰ, ჩემი საწყალი ტოიოტა... ჯერ რას ჰგავს, არც ერთი მხარე და ნაწილი შეუჭეჭყავი აღარ აქვს და ახლა კანონგარეშეც ცხადდება. თურმე, ნუ იტყვით და, ახალი რეგულაციების მიზეზი ჰაერის დაბინძურება ყოფილა! ე.ი. არსებობენ ადამიანები შსს-ში, რომლებიც თვლიან, რომ მარჯვენა საჭიანის გამონაბოლქვი უფრო მავნებელია, ვიდრე მარხცხენასაჭიანისა. ალალად მითხარით: ამ იდეის ავტორი ერთი მაგრად არ უნდა დაკბინო?! კარგი ბატონო, ზოგი მეტყვის, ნუ პროვოკატორობ, მიზეზი ის არის, რომ ეგ "უკუღმა" მანქანები გზებზე მეტ საფრთხეს ქმნიანო, მაგრამ თქვე დალოცვილებო, ყველაფერზე რომ "რეფერენდუმს" ატარებთ და ასიათასიანი კვლევის გარეშე, ორმოცდაათიათასიან პროექტს არ იწყებთ (მართლა მაქვს მონიშნული რამდენიმე ასეთი შემთხვევა), სადმე არსებობს ავტოკატასტროფების სტატისტიკა ამ თავლსაზრისით? შეკითხვა რიტორიკულია, რადგან გადავამოწმე და არ არსებობს.
ბევრი რომ არ გავაგრძელო (აღარც გვაქვს ადგილი) მიზეზი ორიდან ერთი მგონია და თქვენი აზრიც მაინტერესებს: ბიუჯეტის შევსება ავტომობილების გაძვირების ხარჯზე (ფაქტია, რომ სამ დღეში გაძვირდა) ან მერიის მიერ ვერა და ვერ მოგვარებული საცობების პრობლემების ამ საშუალებით მოგვარება.
პ.ს. მერიაზე გამახსენდა: ნარმანიამ განაცხადა, დაპირებული ერთი მილიონი ხიდან, ნახევარი უკვე დავრგეთო!
ზღაპარია, ზღაპარი! აი, რომელი ზღაპარი, იცით? მეფე გლეხის ბიჭს რომ დავალებებს აძლევს და ერთ-ერთი რომ ასეთია: ამ ჯამში (თუ ტომარაში) ზუსტად რამდენი ხორბლის მარცვალია, მითხარიო. გლეხის ბიჭი ბრძენთან მივა და მისი რჩევისამებრ უპასუხებს მეფეს: ამდენი და ამდენიაო (მაგალითად, 2 ტრილიონ, 167 მილიარდ რაღაცა). თუ არ გჯერა, მიდი და დათვალეო!
ასეა ეს საქმეც: ვისაც არ სჯერა, რომ ნახევარი მილიონი ხე დაირგო, წავიდეს და დათვალოს (ამ შემთხვევაში, მეფე - ხალხია, ამომრჩეველი, მბრძანებელი; გლეხის ბიჭი - კი იცით, ვინც არის; მაგრამ მთავრი ის "ბრძენია" - ვინ ურჩია ამის თქმა, იმ ჩემი ცოდვით სავსემ?! ეეეჰ, ეგეც კაი დასაკბენია!..