"ქოცნაცობის" საცირკო ტრიუკები პარლამენტში, ანუ რას "დააჭირა" კვიციანმა
"ქოცნაცობის" საცირკო ტრიუკები პარლამენტში, ანუ რას "დააჭირა" კვიციანმა
ცოტა ხნის წინ დაიწყეს პოლემიკა ქართული ცირკის მდგომარეობის შესახებ. უმეტესობა ამბობდა, რომ საცირკო ხელოვნება უპერსპექტივოა და არ ვიცით, რატომო. ახსნა მარტივია: უბრალოდ, გადავხედოთ საქართველოს პარლამენტის ყოველდღიურ სამუშაო რეჟიმს და მივხვდებით, რომ არა მარტო ცირკს, არამედ ვოდევილისა და კომედიის ჟანრებსაც სერიოზული კონკურენტი ჰყავს. როცა ტელევიზიები "ქოცნაცობის" ტრიუკებს გადასცემენ, მეტი რაღა სანახაობა უნდა ხალხს? რატომღა ივლიან თეატრებსა და ცირკში? ჰოდა, მთელი ფინანსური პერსპექტივა ჩაკლულია ცირკისთვის მანამ, ვიდრე ზარდიაშვილი, კახიძე, ენძელა, გუგული და
მისთანანი გვყავს საკანონმდებლო ორგანოში!

გასულ კვირას ხურვალეთი მოექცა ყურადღების ცენტრში. რუსებმა "ბორდერი" დაგვირღვიესო და გაჩნდა ქაცარავა თავისი დაყენებული ბოევიკური სიფათით, კონფლიქტის ზონაში. ვითომ დაალაგა სიტუაცია და ალბათ მალე თავსაც დაგვამადლის! მე არც ქაცარავასა და ბერულავას ძლევამოსილებისა მწამს, მაგრამ ეს ჩვენი ხელისუფლება რომ აძლევს ამ ვაჟბატონს
პროვოკაციების მოწყობისა და დეზინფორმირების უფლებას, ერთ დღესაც რომ გადმოყაროს რუსეთმა თუნდაც მხოლოდ ნახმარი სამხედრო "ბატინკები" საქართველოში, მერე ოქრუაშვილი გვიშველის?

ბოლო დღეებში "ოცნებისგან" გამიჯნულებმა კვლავ შეგვახსენეს თავი. ბესელია ისევ აუბუნტდა "ქართულ ოცნებას" მოსამართლეების გამო - აქაოდა, მურუსიძე-ჩინჩალაძე რად არ მოიშორეთო. სხვას ვერაფერს ვიტყვი იმის გარდა, რომ ბესელიასგან კარგი ახირებაა, ოღონდ დაგვიანებული. უბრალოდ, ის ვერ ავხსენი, ცირკის კი არა, პარლამენტის თავმჯდომარე რად გვეუბნება, ცუდის მოქმედი მოსამართლეები კარგნი გახდნენო? ვერც ის გავიგე, რად უნდოდა ეკასგან მოსამართლეების კრიტიკის დაწყებას "საოცნებო" ექვსი წლის გასვლა? მრჩება შთაბეჭდილება, რომ ყველა პოლიტიკოსი თავის პლაცდარმს იმაგრებს! "ნეოქოცები" სასამართლოს ჩაჯიბვაზე არიან ორიენტირებული, "ნაცმოძი", "პალეოქოცობა" და "ქოცთაგან გამიჯნულნი" კიდევ, პოპულისტურ აზრებს აწვებიან ელექტორატის გულის მოსაგებად. აი, პოპულიზმში ბადალი რომ არ ჰყავს ქართველ პოლიტელიტას, ვაღიაროთ და ოდნავ მაინც მოგვეშვება... რაღაც სხვა რომ გვჭირდება, ვიდრე "ქართული ოცნება" და "ნაციონალური მოძრაობაა", მაგრამ ეს სხვა ჯერ კიდევ არ ჩანს, მით უფრო, თუ "რაღაცას დააჭირა კვიციანმა"! როგორი უიღბლო ვართ საქართველოს მოქალაქეები, დაირქმევენ ეს პარტიები ლამაზ სახელებს, მოვტყუვდებით ერთხელ, ორჯერ, სამჯერ... თანაც, "იმედი" "ოცნებას" უკმევს გუნდრუკს, "რუსთავი 2" - "ნაციონალებს", "ობიექტივი" - ინაშვილის პარტიას და ამასობაში სასამართლო სასამართლოს აღარ ჰგავს, პარლამენტიც გაგვიცირკდა, მთავრობა კიდევ იმის შიშშია, ერთი ხელის მოსმით არ გაუშვან დიდ "უიქენდზე"...

თურმე ნუ იტყვით და ზემოთ ნახსენები სამი "ტელევიზორიანი" პოლიტიკური ძალებისთვის ადამიანური რესურსების შერჩევა-გადარჩევა და განახლება დღის წესრიგში ისე მწვავედ დგას, თითქოს მაგათ გარეშე ქვეყანა აღარ იარსებებდა. ცალკე კალაძე იწყებს "ოცნებისთვის" სახეების მოძიებას (ღარიბაშვილი რა ხვითოც იქნებოდა, თავიდანვე ვთქვი), ცალკე კვიციანია შესაცვლელი ცხენიანით მაინც და აი, "ნაციონალური მოძრაობის" დიდი ბელადიც "ფეისბუკმიმართვაში" აცხადებს, რომ პარტიის შემადგენლობა შესაცვლელია, თანაც, საპრეზიდენტო კამპანიის ჩატარების ხარისხით თუ ვიმსჯელებთ, უფროსი ვაშაძეა "ნაცმოძის" თავმჯდომარეობისთვის ზედგამოჭრილიო!

პ.ს. საქსტატის მონაცემების მიხედვით, საქართველოში საშუალო ხელფასი 1.000 ლარს აჭარბებს. მართალია, ღარიბი მოსახლეობა კომბოსტოს ჭამს, მდიდარი - ხორცს მიირთმევს, მაგრამ საშუალო არითმეტიკულ-სამზარეულო თვალსაზრისით, ჩვენ ვჭამთ ტოლმას!

ბლოგში გამოთქმული მოსაზრებები ეკუთვნის ბლოგერს, რომელსაც შესაძლოა რედაქცია არ ეთანხმებოდეს

რუბრიკის სხვა სიახლეები