რა ღირს და სად შევიძინოთ "სეთ-თოფ-ბოქსები" - კვირის პალიტრა

რა ღირს და სად შევიძინოთ "სეთ-თოფ-ბოქსები"

1-ლი ივლისიდან საქართველოს მასშტაბით ციფრულ მაუწყებლობაზე ეტაპობრივად გადასვლის პროცესი დაიწყო. თუმცა, ზოგიერთი ჩვენი თანამოქალაქე ამას მოუმზადებელი შეხვდა და  ტელევიზორი გაეთიშა. მათთვის კიდევ ერთხელ განვმარტავთ - უტელევიზოროდ რომ არ დარჩეთ, "სეთ-თოფ-ბოქსი" უნდა შეიძინოთ. ტელევიზორების შეცვლა კი მხოლოდ იმ მომხმარებლებს მოუწევთ, რომელთა ტელევიზორებს RCA ტიპის კაბელი არ უერთდება. ამ ეტაპზე საცალო ვაჭრობის ბაზარზე უმეტესად ორი ტიპის "სეთ-თოფ-ბოქსია" შემოტანილი - Eurostar-ი და TV Star-ი. მისი ფასი, დაახლოებით, 55-65 ლარამდე მერყეობს. ბაზარზე ასევე წარმოდგენილია შვენ-ის ფირმის 95 ლარის ღირებულების "სეთ-თოფ-ბოქსები". სხვათა შორის, "ციფრული მაუწყებლობის სააგენტომ" სოციალურად დაუცველი პირებისთვის Konka-ს ფირმის რისივერები შეიძინა და ამ მოწყობილობის შემოტანას საცალო ბაზარზეც გეგმავს. ,,სეთ-თოფ-ბოქსის" შეძენა სამომხმარებლო ტექნიკის მაღაზიებშია შესაძლებელი (ლილოს ბაზრობაზე, ვაგზლის მოედანსა და ვარკეთილის ტერიტორიაზე). აღსანიშნავია, რომ სოციალურად დაუცველი ოჯახებისთვის, რომელთა სარეიტინგო ქულა 70 000 და მასზე ნაკლებია, მთავრობა სერტიფიცირებულ "სეთ-თოფ-ბოქსებს" შეისყიდის და საქართველოს ფოსტის რაიონულ სერვისცენტრებში გაანაწილებს.

ხმისა და გამოსახულების გაუმჯობესების გარდა, ციფრული მაუწყებლობის საშუალებით, მაყურებელს მეტი ქართული არხის ყურების შესაძლებლობა ექნება. თუ აქამდე მოქალაქეები საკაბელო თუ ე.წ. სახლის ანტენების საშუალებით მხოლოდ რამდენიმე ქართულ არხს უყურებდნენ, ამიერიდან სპექტრი ფართოვდება - ციფრული მაუწყებლობის მთავარი უპირატესობა სწორედ მაყურებლისთვის მეტი არჩევანის შეთავაზებაა. ტელევიზიების ჩამონათვალი, რომლებიც უკვე ვრცელდება ციფრული მაუწყებლობის საშუალებით, ასეთია: "იმედი", "რუსთავი 2", "პალიტრა ტვ", "პირველი არხი", GDS, "ტაბულა", "არტარეა", "კომედი ტვ", "თრიალეთი" და სხვა.

რუსუდან შელია