"თუ ასე გააგრძელებთ, ვერეს გაცოფებაზე არანაკლებ კატასტროფას მიიღებთ"
"კანონით, თუ ხეების გაჩეხით მიყენებული ზარალი აღემატება 1 000 ლარს, საქმე გადაეცემა შსს-ს"
"ერთი ხის მოჭრა ან გადარგვა კონკრეტული თანხა ღირს. "არქი ჯგუფს" 12 ხის მოჭრის გამო 88.000 ლარი აქვს გადახდილი. წარმოგიდგენიათ, ამ თანხით რამდენი რამის გაკეთება შეიძლებოდა ეკოლოგიის გასაუმჯობესებლად?"
თბილისში კიდევ ერთხელ დანაშაულებრივად შეამცირეს გამწვანებული არეალი - ზალდასტანიშვილის ქუჩის 19 ნომერში 20-მდე საღი ფიჭვის ხე მოიჭრა. "ამ ქალაქში არავის ეპატიება ხეების უკანონო ჭრა. ყველა მკაცრად დაისჯება. ეს იქნება ჩვენი შეუვალი და უცვლელი პოზიცია", - განაცხადა თბილისის მერმა დავით ნარმანიამ, ისევე, როგორც შარშან თამარაშვილის ქუჩაზე ხეების განზრახ დაზიანების ფაქტის დაფიქსირების შემდეგ.
ზალდასტანიშვილის ქუჩაზე ხეები ეკოლოგიისა და გამწვანების სამსახურის უფროსის, ბიძინა გიორგობიანის თანხმობით მოჭრეს. თუმცა, მერიის საქალაქო სამსახურის მიერ გაცემულ დოკუმენტში გარკვევით წერია, რომ მხოლოდ ათამდე ხის მოჭრა შეიძლება.
როგორც მერიაში აცხადებენ, თანხმობა მოქალაქის განცხადების საფუძველზე გაიცა და მხოლოდ გამხმარი ხეები უნდა მოეჭრათ, ისიც მერიის წარმომადგენლების თანდასწრებით. თუმცა, ეს ვანდალიზმი ოფიციალური ზედამხედველების გარეშე მოხდა და ხმელი ხეების ნაცვლად 20-მდე ჯანსაღი ხე მოჭრეს. ასე მოასუფთავეს სამშენებლო მოედანი, სადაც მრავალსართულიანი კორპუსის აგება აქვთ განზრახული.
თბილისის მერიის ეკოლოგიისა და გამწვანების სამსახურის უფროსი ბიძინა გიორგობიანი უარყოფს ბრალდებას, რომ სავარაუდოდ დეველოპერებთან არის შეკრული. გიორგობიანი აბსურდულს უწოდებს კიდევ ერთ ბრალდებას, რომ ზალდასტანიშვილის ქუჩაზე "ნაციონალ" გივი თარგამაძის ძმას მოუმზადა სამშენებლო მოედანი. "ვინც ამ ბრალდებებს მიყენებს, როგორც ჩანს, არაფერი იცის ჩემი და თარგამაძის "სიამტკბილობის" შესახებ", - ამბობს ბიძინა გიორგობიანი:
- მოქალაქე ალექსანდრე ალავიძემ გვთხოვა ავარიული ხეების მოჭრაზე თანხმობა. სამწუხაროდ, თანხმობის მიღების შემდეგ მოქალაქემ 16 ჯანმრთელი ხე მოჭრა. ახლა ჩემზე ამბობენ, რომ თურმე მე ქრთამი ავიღე და ამ კაცს ვუთხარი, გამხმარ ხეებს ჯანსაღიც მიაყოლე-მეთქი.
- ამბობენ, ზალდასტანიშვილის ქუჩაზე თარგამაძის ძმა აშენებს სახლსო?
- მე არქიტექტურის სამსახურში დოკუმენტები გამოვითხოვე და დავადგინე, რომ ტერიტორია, სადაც ხეები გაიჩეხა, ეკუთვნის შპს "სოლოს" და მისი დამფუძნებლები არიან ვინმე წაბრია და ალავიძე. ვინ რას აპირებს ამ ტერიტორიაზე, ეს ჩემთვის უცნობია.
- ეს უკვე მეორე შემთხვევაა, როდესაც თქვენ მიერ გაცემული თანხმობის დოკუმენტით ბოროტად სარგებლობენ. შეგახსენებთ, თამარაშვილის ქუჩის 13 ნომერშიც თქვენი თანხმობის საფუძველზე გაჩეხეს ხეები და შესაბამისად, დეველოპერებთან თქვენი კავშირის შესახებ ეჭვები მაშინ გაჩნდა.
- დასანანია, რომ ვიდრე ხეებს გაჩეხდნენ, არავინ დაგვიკავშირდა. თურმე ამბობენ, მერიის ცხელ ხაზზე ვრეკავდით და არავინ გვპასუხობდაო. გადავამოწმეთ, ცხელ ხაზზე ზარი არ შემოსულა.
ვერტიკალური გამწვანება
- ზალდასტანიშვილის ქუჩაზე აქვთ მშენებლობის ნებართვა?
- განცხადება შეუტანიათ არქიტექტურის სამსახურში. ერთხელ უარი მიიღეს. მეორედ ხარვეზების გამო შუალედური პასუხი მიუღიათ. ერთ-ერთი ხარვეზი სწორედ ამ ხეების არსებობა იყო და ამ ფორმით "გამოასწორეს". ეს არის ჩვეულებრივი დანაშაული და, ალბათ, პასუხს მიიღებენ შსს-სგან\. კანონით, თუ ხეების გაჩეხით მიყენებული ზარალი აღემატება 1 000 ლარს, საქმე გადაეცემა შსს-ს.
- ისევ თამარაშვილის ქუჩას დავუბრუნდები. როგორ ფიქრობთ, შეცდომა არ დაუშვით, როდესაც დეველოპერს საკრებულოში განაშენიანების რეგულირების გეგმის განხილვამდე მიეცით ხეების მოჭრის ნებართვა?
- მშენებლობაზე თანხმობა ჯერ კიდევ არა აქვთ. თუ საკრებულო განაშენიანების რეგულირების გეგმას არ განიხილავდა, დეველოპერებს შეეძლოთ სასამართლოს ძალით მოეპოვებინათ მშენებლობის ნებართვა არა ჩვენ მიერ შეთავაზებულ სივრცეში, სადაც მეზობელი კორპუსის მობინადრეების უფლებები არ ირღვეოდა, არამედ ცალ-ცალკე.
- დეველოპერები თქვენს ხელმოწერილ დოკუმენტებს რომ აფრიალებენ?
- დეველოპერებს იმ შემთხვევაში მოვერევით, თუ მათ არ შევუშლით ხელს ბიზნესის განვითარებაში, მაგრამ დავადგენთ ქალაქში განაშენიანებისა და გამწვანების ისეთ წესებს, რომელთაც ისინი ვერ გადავლენ.
მშენებლობის ნებართვის გაცემის დროს კრიტერიუმებში უნდა დავამატოთ კა-4 კოეფიციენტი, რომელიც გულისხმობს მშენებლობის დროს ვერტიკალურ გამწვანებასაც. ასე გავამწვანებთო გარემოს. კა-4 კოეფიციენტი არის სართულებს შორის გამწვანებული ადგილები, რის შემდეგაც თვითონ შენობა წარმოადგენს ერთგვარ რეკრეაციულ ზონას. ძალიან კარგი იქნებოდა, საკრებულოს დეპუტატები, მაგალითად, ალეკო ელისაშვილი, ჩემი გაკრიტიკების ნაცვლად, მსგავსი ტიპის საკანონმდებლო ცვლილებებზე მუშაობდნენ და ქალაქის გამწვანების სტრატეგიული დოკუმენტის განხილვაში მონაწილეობდნენ.
რატომ აქვს ეჭვი გარემოს დამცველ საზოგადოებას, რომ ქალაქის მერია, კერძოდ კი ეკოლოგიისა და გამწვანების სამსახური დეველოპერებს შეეკრა? თამარაშვილის ქუჩის 13 ნომრის საინიციატივო ჯგუფის ერთ-ერთი წევრი გიორგი შილაკაძე ამას ასე პასუხობს:
- გამწვანებისა და ეკოლოგიის და არქიტექტურის სამსახურები აცხადებენ, ვიღაც კერძო პირს ნაყიდი აქვს კონკრეტული ტერიტორია და თუ იქ მშენებლობის უფლებას არ მივცემთ, ინვესტორი დაზარალდებაო. ასეთი მიდგომის გამო, იძულებული ვართ, ვიფიქროთ, რომ
მერიას შეკვეთილი აქვს მავანთა კერძო ინტერესების გატარება და სულ არ ანაღვლებს, რა დაემართება მოსახლეობას, რომელიც ვეღარ სუნთქავს უწესრიგოდ ჩარგული კორპუსების ჯუნგლებში, სადაც ხეს სამადლოდ ვერ ნახავთ.
როგორც ვიცით, მხოლოდ "არქი ჯგუფს" 12 ხის მოჭრის გამო 88.000 ლარი აქვს გადახდილი. წარმოგიდგენიათ, ამ თანხით რამდენი რამის გაკეთება შეიძლებოდა ეკოლოგიის გასაუმჯობესებლად? იძულებული ვხდებით, ვიფიქროთ, რომ ხეების მოჭრით ფულის შოვნა ეფექტურია ბიუჯეტის შესავსებად.
ბიძინა გიორგობიანს ისეთი პოზა აქვს, თითქოს რადგან წინა ხელისუფლებისგან პოლიტიკური დევნილი იყო, ემიგრანტობა ერთგვარ ინდულგენციად ექცა და ამიტომ მის ინერტულობაზე თვალი უნდა დავხუჭოთ და ვაპატიოთ დეველოპერების ინტერესებისთვის მუშაობა.
ძველი იპოდრომის ტერიტორია ქალაქის განიავების ერთ-ერთი მნიშვნელოვანი "მილი", იყო რომელსაც თავი და ბოლო უკვე დაუხშვეს მაღალსართულიანი კორპუსებით, თუ დანარჩენ ტერიტორიაზეც შეუქცევადი გახდება პროცესი, მივიღებთ იმაზე უარესს, ვიდრე სპორტის სასახლესთან ხდება. რამდენიმე კომპანია ოდესღაც დიდრონი ხეების, ქალაქური ტყის ადგილზე, ძალიან პატარა ტერიტორიაზე რამდენიმეათასბინიან სახლებს აშენებს, რის შემდეგაც სულ ცოტა, 4000 ავტომობილით მეტი იმოძრავებს ამ ტერიტორიაზე. როგორ წარმოუდგენიათ ქალაქისთავებს საბურთალოს, ყაზბეგის, თამარაშვილის ქუჩებზე ასეთი მომატებული ნაკადების გადაადგილება?
ბატონ ბიძინას უცდია ოდესმე გაეზომა, როგორია ამ ტერიტორიებზე ჰაერის დაბინძურების ხარისხი? თუ ყველაფერს ჩახუთავთ, მდინარე ვერეს გაცოფებაზე არანაკლებ კატასტროფას მიიღებთ. უბადრუკია მერიის განცხადებები, ერთ დღეს ქალაქის განტვირთვის მიზნით ველოსიპედით მგზავრობისკენ რომ მოგვიწოდებს, მეორე დღეს კი ტრამვაის შემოღებას აპირებს.
გაჩეხილ სკვერებში, ტროტუარებზე და ბაღებში კორპუსები ჩადგით, პარკინგისთვის ტერიტორია არ გაგაჩნიათ და ტრამვაი სად უნდა გაიყვანოთ?!