"შემიყვარდა ან როგორ შეიძლებოდა ლიკასნაირი გოგო არ შეგყვარებოდა?!" - კვირის პალიტრა

"შემიყვარდა ან როგორ შეიძლებოდა ლიკასნაირი გოგო არ შეგყვარებოდა?!"

ქართველი კინოვარსკვლავი, უმშვენიერესი ლიკა ქავჟარაძე 2017 წლის 11 ოქტომბერს, საკუთარ სახლში გარდაცვლილი იპოვეს.

მსახიობმა ხალხს ყველაზე მეტად "ნატვრის ხეში", მარიტას როლით დაამახსოვრა თავი. ამ ფილმში მას პარტნიორობა სოსო ჯაჭვლიანმა და ზაზა კოლელიშვილმა გაუწიეს.

ფოტოგალერეა

სოსო ჯაჭვლიანი kvirispalitra.ge - ს ლიკა ქავჟარაძეზე დიდი ტკივილით ესაუბრა:

- დამუნჯებული ვარ, უმძიმესი იყო ჩემთვის ამ ამბის გაგება, თავიდან ვერც დავიჯერე... ახლაც წარმოუდგენლად მეჩვენება - ლიკა ქავჟარაძეზე უკვე წარსულში ლაპარაკი... ყველას ჰგონია, რომ "ნატვრის ხე" იყო პირველი ფილმი, სადაც ჩვენ ერთმანეთს შევხვდით... მანამდე იყო მოკლემეტრაჟიანი ფილმი - "სიყვარულო ძალსა შენსა", რომელიც რეზო გაბრიაძემ გადაიღო. ერთ-ერთი ნოველა იყო - კავკასიური რომანსი და ამ ფილმში ჩვენ შეყვარებულებს ვთამაშობდით... მე და ლიკა თითქმის ორი წელიწადი გადასაღებ მოედანზე ერთად ვიყავით. "კავკასიური რომანსის" გადაღება დაახლოებით ცხრა თვე გაგრძელდა და წელიწადზე მეტი "ნატვრის ხე"... ლიკა რაც იყო, სამწუხაროდ იმის მეასედიც არ არის გადაღებული. ვერ გამოიყენა ამხელა სილამაზე ქართულმა კინომ! ქართველებს ძალიან ცუდი ჩვევა გვაქვს, ადამიანი რომ წავა ამ ქვეყნიდან, მერე მივტირით... ჩვენ, ვინც ვიცნობდით, ლიკა ყოველთვის გვიყვარდა. გადასაღებ მოედანზე მთელი ჯგუფი მასზე იყო შეყვარებული, ძალიან ვუფრთხილდებოდით, რადგან ნამდვილი ფერია იყო ჩვენს თვალწინ...

სოსო ჯაჭვლიანი და ლიკა ქავჟარაძე ფილმში

ცხოვრება, მოგეხსენებათ, რა დაუნდობელია! ადამიანებს თუ ოდნავ სალაპარაკო მიეცათ, ათას იმდენს მიამატებენ იმას, რაც სინამდვილეშია! ლიკა უფაქიზესი იყო, მარიტასავით ნაზი, ლაღი, უბოროტო და გულწრფელი! ბოლოს სამწუხაროდ გულჩათხრობილიც გახდა... ქვეყანას ასეთი ადამიანი, ასეთი მსახიობი ჰყავდა და ხელის გულზე უნდა გვეტარებინა. როგორ შეიძლებოდა მას საარსებო წყაროზე ჰქონოდა საზრუნავი?! ეს ქვეყნის დიდი სირცხვილია! ლიკა ქავჟარაძეს ისედაც ურთულესი ცხოვრება ჰქონდა. დედამისი, არაჩვეულებრივი ქალბატონი ადრე გარდაიცვალა. მე მას კარგად ვიცნობდი და ვიცი რასაც ნიშნავდა ლიკასთვის დედის დაკარგვა. ლიკამ უამრავი სევდა და ტკივილი წაიღო იმ ქვეყნად...

- ლიკა ქავჟარაძეს დიდი პოპულარობა და ხალხის გულწრფელი სიყვარული ხვდა წილად...

- საბჭოთა მასშტაბით, 8-მილიონიანი ტირაჟით გამოდიოდა ჟურნალები, რომლის გარეკანზე ლიკა იყო. ყველას ეგონა ასეთი პოპულარული გოგო ძალიან ამაყი და მედიდური იქნებოდა, არადა, ყველასთან საოცრად უბრალო და მორიდებული იყო. ცხოვრებაშიც ზუსტად ისეთი იყო, როგორც მისი კინოგმირი მარიტა.

ამ ყველაფრის შემდეგ კი უცებ ისეთ სიტუაციაში რომ ვარდები ადამიანი, როდესაც სათანადოდ დაფასება არ გაქვს... ბოლოს რომ დავურეკე, მეკითხებოდა, ფილმში როდის გადამიღებ ერთი სული მაქვსო. ძალიან ენატრებოდა კინო... რაღაც სცენარი მაქვს და გადაღებას ვგეგმავდით, ერთობლივ გეგმებს ვაწყობდით.... სამწუხაროდ სინანული გვიანია, დროს უკან ვეღარ დავაბრუნებთ და ვეღარაფერს შევცვლით! ლიკას სხით ჩემგან იმედი წავიდა...

- დღემდე ყველას ჰგონია, რომ გედია მარიტაზე ცხოვრებაშიც იყო შეყვარებული...

- ეს შეკითხვა ადრეც დამისვეს... მაშინ ვთქვი, რომ შემიყვარდა ან როგორ შეიძლებოდა ასეთი ლამაზი გოგო არ შეგყვარებოდა?! თუმცა მე მოვიქეცი ისე, როგორც ნამდვილ მამაკაცს შეეფერებოდა. ლიკას უკვე საქმრო ჰყავდა და მე საკუთარ თავზე წარმოვიდგინე, ჩემი საცოლისთვის სხვას რომ დაეწყო "ჩალიჩი", როგორი იქნებოდა. ლიკას საქმროს - სანდრო თაქთაქიშვილს ვიცნობდით. ისინი დაქორწინდნენ, მაგრამ, სამწუხაროდ, მალევე გაშორდნენ. მათ საერთო შვილი დარჩათ.

იხილეთ ფოტოგალერეა

იხილეთ ასევე: "შეიძლება ბევრ შეცდომასაც ვუშვებდი, ახლა ეს აღარ მაწუხებს... მორჩა"! - ქართული კინოს მშვენება ლიკა ქავჟარაძე

მანანა გაბრიჭიძე (სპეციალურად საიტისთვის)