ქართული ენის გრამატიკის გაკვეთილები მე-5, მე-6 კლასებში ცალკე ჩატარდება - კვირის პალიტრა

ქართული ენის გრამატიკის გაკვეთილები მე-5, მე-6 კლასებში ცალკე ჩატარდება

ქართული ენის გრამატიკის გაკვეთილები მე-5, მე-6 კლასებში ცალკე ჩატარდება, - ამის შესახებ საქართველოს განათლების, მეცნიერების, კულტურის და სპორტის სამინისტროს ზოგადი განათლების მართვისა და განვითარების დეპარტამენტის უფროსმა მარიამ ჩიქობავამ „ინტერპრესნიუსთან“ ინტერვიუში განაცხადა.

როგორც ჩიქობავამ აღნიშნა, მასწავლებლის გადასაწყვეტია, რამდენ საათს დაუთმობს ენის გაკვეთილს, მაგრამ ენის გრამატიკული ასპექტი აუცილებლად გამოყოფილი უნდა იყოს.

„ქართულ ენასა და ლიტერატურაში გვაქვს სიახლე. ცალკე გამოიყო ენის კომპონენტი მე-5, მე-6 კლასებში. აქამდე ქართული ენა და ლიტერატურა გვქონდა და ცალკე ენის კომპონენტი გამოყოფილი არ იყო. მასწავლებლის გადასაწყვეტია, რამდენ საათს დაუთმობს ენის გაკვეთილს, მაგრამ ენის გრამატიკული ასპექტი აუცილებლად უნდა იყოს გამოყოფილი. მაგალითად, კვირაში თუ 5 საათია ენასა და ლიტერატურაზე გამოყოფილი, აქედან მასწავლებელმა თვითონ უნდა განსაზღვროს რამდენი საათი იქნება ენის გაკვეთილი. შესაძლებელია ინტეგრირებული იყოს ლიტერატურის გაკვეთილთანაც, თუმცა, შესაძლებელია ცალკე საათიც დაუთმოს, როგორც ამას საჭიროება მოითხოვს. ამის თხოვნა თვითონ მასწავლებლებისგანაც მოდიოდა, რომ ცალკე ჩაეტარებინათ ენის გაკვეთილები მოსწავლეებისთვის; ამას აქამდეც არავინ უშლიდათ, მაგრამ მკაფიოდ გამოკვეთილი არ იყო“, - განაცხადა ჩიქობავამ.