"ნაციონალური მოძრაობის" ხელისუფლებაში დაბრუნება არ შეიძლება!"
31-10-2018
"ნაციონალური მოძრაობის" ხელისუფლებაში დაბრუნება არ შეიძლება!"
"ამ ხელისუფლებას ნამდვილად ჰქონდა ხალხის დიდი ნდობა და პროცესების არასწორად წარმართვამ გამოიწვია ის, რაც მოხდა"

საქართველოში საპრეზიდენტო არჩევნების მეორე ტურისთვის ემზადებიან. ბევრისთვის პირველი ტურის შედეგი მოულოდნელი აღმოჩნდა. მოგეხსენებათ 50%-იანი ბარიერი ვერცერთმა კანდიდატმა ვერ გადალახა, შედეგად მე-2 ტურში გავიდნენ "ქართული ოცნებისა" და "ნაციონალური მოძრაობის" მხარდაჭერილი კანდიდატები: სალომე ზურაბიშვილი და გრიგოლ ვაშაძე. ჩვენ შექმნილი ვითარების შეფასება ცნობილ ადამიანებს ვთხოვეთ:

სალომე ზურაბიშვილის აქტიური მხარდამჭერია ცნობილი მსახიობი -კახი კავსაძე... არჩევნების პირველი ტურის შედეგების შეფასება
პირველად მას ვთხოვეთ, რაზეც ვრცელი კომენტარისგან თავი შეიკავა და მხოლოდ ეს გვითხრა - ქართველი კაცი ყველაფერს მაშინ მიხვდება, კარგად რომ მოხვდება თავშიო... ამ სიტყვებში იგი "ნაციონალური მოძრაობის" შესაძლო რევანშს გულისხმობდა...
ჯემალ ჭკუასელი
ჯემალ ჭკუასელი, ანსამბლ "ერისიონის" ხელმძღვანელი:
- არჩევნების პირველი ტურის ამ შედეგით დასრულებაში ხალხში განათლების დეფიციტს
ვხედავ... პოლიტიკაზე არ მსურს ლაპარაკი, მაგრამ აქ პოლიტიკა კი არა ჩვენი სამშობლოს ბედი წყდება და ამაშია საქმე! რა მოხდა, ვერ ვიგებ, ასე სწრაფად დაგვავიწყდა "ნაციონალური მოძრაობის" მიერ ჩადენილი დანაშაულები?!

ზურა ყიფშიძე, მსახიობი:
- მეორე ტური გაიმართება, ჯერ არაფერი დასრულებულა და ვერაფერს ვიტყვით! პირველი ტური რა შედეგითაც დასრულდა, ამას გარკვეულწილად ველოდი, რადგან არასწორად წარიმართა წინასაარჩევნოდ ყველაფერი... ავიღოთ თუნდაც - კანაფის კულტივაციაზე ლაპარაკი, კანონ-პროექტის მომზადება, რა შუაში იყო, რაში სჭირდებოდათ ეს, ვერაფრით გავიგე! მეორე ტურში გასამარჯვებლად სამკვდრო-სასიცოცხლო ბრძოლა დაიწყება, ძალიან რთული იქნება ეს ბრძოლა ხელისუფლებისთვის! ხომ ვიცით, რომ სახელის გატეხვას, თავის გატეხვა სჯობია! ამ ხელისუფლებას ნამდვილად ჰქონდა ხალხის დიდი ნდობა და პროცესების არასწორად წარმართვამ გამოიწვია ის, რაც მოხდა! არადა, "ნაციონალური მოძრაობის" ხელისუფლებაში დაბრუნება არაფრით არ შეიძლება და წარმოდგენაც არ მინდა, რა საშინელება შეიძლება დაატრიალონ...

გია როინიშვილი, მსახიობი:
- სამი თვის განმავლობაში თითქმის მთელი საქართველო მოვიარე - კახეთი, იმერეთი, აჭარა, გურია, სამეგრელო... ძალიან ბევრ ადამიანს შევხვდით და მათში ისეთი განწყობა იყო, რაც არჩევნების პირელი ტურის შედეგში გამოჩნდა! კიდევ მეტს გეტყვით: ხალხის განწყობა კიდევ არ ჩანს მთლიანად, რადგან ეს არის ციფრები, რომლის უკანაც ხელისუფლების ძალიან დიდი ზეწოლა დგას! ადგილი ჰქონდა ძალიან დიდ გაყალბებას, მოსყიდვას, დაშინებას, ადმინისტრაციული რესურსის გამოყენებას და რაც კი ბუნებაში არსებობს...
ამ დილით მოვისმინე ხელისუფლების წარმომადგენელი იძახდა, შეცდომები უნდა გამოვასწოროთო... - ჩემო ძვირფასებო, ახლა თქვენთვის ყველაზე კარგი გამოსავალია, რომ მოემზადოთ და საკუთარი ნებით გადახვიდეთ ოპოზიციაში, ისიც ყველაზე კარგ შემთხვევაში... ძალიან მშვიდად და წყანარად უნდა მოიქცნენ, მათ უკვე აქვთ მაგალითი, თუ როგორ მიდის ხელისუფლება ოპოზიციაში. წინა ხელისუფლებისგან უნდა აიღონ მაგალითი! არანაირი შურისძიება და რევანში არ იქნება! ის, რაც ჩვენ გავიარეთ ამ 6 წლის განმავლობაში და პირადად მე რაც გავიარე! ძალიან დიდი ტკივილი იყო და ყველაფერს გავაკეთებთ იმისთვის, რომ საქართველოში შურისძიება აღარასოდეს დაიწყოს! დაიღალა ქვეყანა!

- იმ ხალხს რას ეტყოდით, ვინც ამბობს, რომ "ნაციონალური მოძრაობა" ხელისუფლებში მობრუნებით სისხლის ნიაღვრებს დააყენებსო... ყველას გვახსოვს მათი ხელისუფლებაში ყოფნისას რამდენი ცუდი რამ მოხდა, ციხეებში არსებული ვითარება გავიხსენოთ თუნდაც...
- ეს არის აბსოლუტური სისულელე და აბსურდი! გამოგონილია იმ ადამიანების მიერ, რომლებსაც სურთ, რომ ეს ხელისუფლება შეინარჩუნონ! აქ არ არის მხოლოდ "ნაციონალური მოძრაობა", მთელი ოპოზიციური სპექტრი იმარჯვებს! ქართული ევროპელობა ზუსტად შურისძიების უარყოფას ნიშნავს!
რაც შეეხება ციხეებს, ჩვენ ყველაფერი გავიარეთ და ჩვენს შეცდომებზე ვისწავლეთ! ამათმა ვერც ჩვენ შეცდომებზე ისწავლეს და ვერც თავისაზე!
იწყება ხელისუფლების ცვლის პროცესი საქართველოში და ვინც ძალაუფლებას ჩაეჭიდება, ის უფრო მალე კარგავს მას!


(სპეციალურად საიტისთვის)

ია
16 ნოემბერი 2018 18:16
თურმე როინიშვილს და სააკაშვილს ტომრით ფული მოაქვს და მიმდევრებო დაუხვდით - უფასო ფული. კარგად მოიხმაროთ იქნებ . როინიშვილი მართლაც ღებულობდა უფასო ფულს, მაგრამ ხალხს რა დაემართა არ ვიცი. ნაჩვევები ხართ ფულების დარიგებისა??????????? რასაც დაგირიგებენ, ღირსიც იქნებით.
პატრიოტი
05 ნოემბერი 2018 06:25
მაშინ დაიქცეს ეს ქვეყანა, თუ ნაცები უნდა დაბრუნდეს. მაგრა'მ ისედაც მობრუნებულები არ არიან? ყველგან ეგენი არიან

01 ნოემბერი 2018 14:11
გია როინიშვილო ''მათ უკვე აქვთ მაგალითი, თუ როგორ მიდის ხელისუფლება ოპოზიციაში. წინა ხელისუფლებისგან უნდა აიღონ მაგალითი! ''---უკაცრავად და რას ნ იშნავს მიდის??? შემთხვევით ხომ არ წააგეს არჩევნები??? თუ მე მეშლება და საკუთარი სურვილით დიდსულოვნად გადააბარეს???

რედაქტორის რჩევით
საერთო ჯამში როგორ შეაფასებთ 2019 წელს საქართველოსთვის?
თქვენი აზრი მნიშვნელოვანია!
საერთო ჯამში როგორ შეაფასებთ 2019 წელს საქართველოსთვის?