"კაცს რომ კაცობას წაართმევ, ბევრად ჯობია მოკლა"
იმედა კახიანი, მსახიობი: - "ნაცმოძრაობა" რომ ხელისუფლებაში არ უნდა დაბრუნდეს, ამის იმდენი მიზეზია, ვერ ჩამოვთვლი. მათი მმართველობის დროს ადამიანი უარყოფილი იყო! არასოდეს დამავიწყდება სულხან მოლაშვილის სახე, იმ ჩანაწერს რომ ნახავს ადამიანი, რა ჭკუაზე დადგება?! ადამიანებს ცოცხლად წვავდნენ და ღირსებას ართმევდნენ! კაცს რომ კაცობას წაართმევ, ბევრად ჯობია, მოკლა! ამბობენ, შეცდომები იყოო, ადამიანების დახოცვა შეცდომაა, კაცო?!
- ხელოვანების აზრი ვიცით გირგვლიანის საქმის შესახებ, მაგრამ თქვენი მხარდაჭერა არ ჩანს სარალიძისა და მაჩალიკაშვილის მიმართ...
- გირგვლიანის ტრაგედიას წინა ხელისუფლებას არასოდეს აპატიებენ! რაც შეეხება ზაზა სარალიძეს, თავად გადავიტანე მსგავსი ტკივილი, როცა 14 წლის ვაჟი დამეღუპა. ამ შემთხვევაში დანაშაულის მიზეზი უნდა ვეძებოთ, ეს რატომ მოხდა? იქნებ საზოგადოება, სკოლა უშვებს შეცდომებს. ბავშვებს ვერ მოვუარეთ და ამის სასწრაფოდ გამოსწორებაზე უნდა ვიფიქროთ. რაც შეეხება მაჩალიკაშვილს, არა მგონია, ვინმეს ბრძანება გაეცა, ბიჭი ლოგინში დახვრიტეთო. ვფიქრობ, გაუთვალისწინებელი შემთხვევა მოხდა. სპეცრაზმელმა, რომელიც ასეთ დავალებას ასრულებს, იცის, რამხელა რისკზე მიდის სპეცოპერაციის ჩატარებისას და შეიძლება დაიღუპოს. ამიტომ შესაძლოა შეცდომა დაუშვა... თუ საგანგებო დავალება იყო, რომ ადგილზე უნდა მოეკლათ, მაშინ მკაცრად დასასჯელია ყველა!
"ვინ მოაბრუნებს ხელისუფლებაში სააკაშვილს?!"
თენგიზ არჩვაძე, მსახიობი: - როგორ შეიძლება "ნაცმოძრაობა" და სააკაშვილი ისევ ხელისუფლებაში დაბრუნდნენ, ან ვინ მოაბრუნებს, ან მაშინ რა უნდოდა სააკაშვილს, როცა იყო?! პოლიტიკაზე არ მსურს საუბარი და დამანებეთ თავი!