მერია V/S ტაქსები - ვინ იხეირებს ახალი რეგულაციით?!
15-04-2019
მერია V/S ტაქსები - ვინ იხეირებს ახალი რეგულაციით?!
"მალე ნახავთ, რომ ტაქსის მძღოლობა დაფასებული და პრესტიჟული საქმე გახდება"
2019 წლის ოქტომბრიდან თბილისში A და B კატეგორიის ტაქსი იმოძრავებს. A კატე­გორიის ტაქსი იქნება თეთრი ფერის, ტექნიკურად გამართული, მარცხენასაჭიანი­ და ოთხკარიანი. ტაქსის აღმნიშვნელი თეთრი ფერის მანათობელი ნიშნით მასზე დატანილი წარწერით "TAXI თბილისი".

B კატეგორიის მძღოლებს შესაძლებლობა ექნებათ ნებისმიერი ფერის ავტომობილით იმუშაონ, თუმცა მათ ტაქსის ამოსაცნობი ნიშნის განთავსებისა და მგზავრის ქუჩაში აყვანის უფლება არ ექნებათ. ამ კატეგორიის მძღოლებს ტაქსის კომპანიებთან მოუწევთ თანამშრომლობა
(გამოძახებით).

ტაქსის მძღოლებს მანქანების შესაღე­ბად 700-ლარიანი ვაუჩერები გადასცემათ, ასევე დაურიგდებათ ქიმწმენდის ვაუჩერები,­ აგრეთვე მათთვის გამოყოფილი იქნება საპ­არკინგე ადგილები. მძღოლები საშემოსავლო გადასახადისგანაც თავისუფლდებიან.

ჩვენ დავინტერესდით, რა პრობლემები­ მოუტანა რეგულაციამ მძღოლებს, გავესაუბრეთ მგზავრებსაც და ხელოსნებსაც. ასევე ვესაუბრეთ მერიის წარმომადგენლებს.

გოგი, ხელოსანი:
- თუ ზედაპირულად­ შევღებავთ, ისე, რომ
გარედან თეთრი იყოს და შიგნით სხვა ფერი, 700-800 ლარში ჩაეტევით, ძირფესვიანად შეღებვა კი 2.000 ლარამდე ღირს, გააჩნია მანქანის მარკას. მანქანას ადრინდელი ფერი რომ არ დაეტყოს, ფაქტობრივად, უნდა დაიშალოს.

- მერიამ ტაქსისტებს გადასაკრავი თეთრი ფირის გამოყენების უფლებაც მისცა.
- მაგისთვის კარგი სპეციალისტის შოვნა­ ცოტა ძნელია, მაგრამ 700-800 ლარად გაკეთდება...

რობერტი, ტაქსის მძღოლი: -"700 ლარად ვინ შეგიღებავს, ვაუჩერის თანხაზე დამატება დამჭირდება. ხელოსანი შეღებვას ერთ კვირას მაინც მოანდომებს, არადა, ერთ კვირას­ რომ არ ვიმუშაო, ბანკის ვალი როგორ გადავიხადო?!
მალხაზი, ოპელის მარკის ტაქსის მძღოლი: - დღეში რამდენი მანქანა უნდა გადაიღებოს, რომ ოქტომბრამდე მოესწროს. ეს იმიტომ მოიგონეს, რომ კერძო ტაქსები მაქსიმალურად შემცირდეს, იქნებ გაქრეს კიდეც და ამის მერე გამოჩნდება კომპანია, რომელსაც ზიზია ტაქსები ეყოლება...

ლევანი, მგზავრი: - მგზავრის პოზი­ციიდან თუ მივუდგებით, კომფორტულად­ მგზავრობა ჯობს. ზოგიერთ ტაქსის მძღოლს ქუჩების მიგნება უჭირს, ზო­გიერთი­ კი ისეთი მანქანით გემსახურება, ჩაჯდომა­ შეგზიზღდება. მეორე მხრივ, ტაქსისტები ლუკმაპურის საშოვნელად დღედაღამ საჭეს უსხედან და ახლა ეს გზა უნდათ შეეზღუდოთ. გასაგებია, რომ მერიამ ჩვენი კომფორტულად მგზავრობისთვის შემოიღო რეგულა­ცია, მაგრამ თუ საზოგადოებრივი ტრანსპორტი მოწესრიგდება, ხალხი აღარ ჩაჯდება მოუწესრიგებელ ტაქსიში და ბაზარი სიტუაციას თავისთავად დაარეგულირებს...

მამუკა მუმლაძე, ტრანსპორტის საქალაქო სამსახურის ხელმძღვანელი:
- რეგულაციის წესთან დაკავშირებულ ყველა საჭირო ინფორმაციას www.taxi.tbilisi.gov.ge-ზე ნახავთ. გარდა ამისა, ინფორმაცია მესიჯებად რეგულარულად მისდით ტაქსის­ მძღოლებს, თუ როდის რა გააკეთონ­. ჩვენ მივყევით კვლევებს და იმ მოთხოვნებს, რომლებიც წლების განმავლობაში მოსახლე­ობის გამოკითხვებით მივიღეთ. მათ კომფორტული ტრანსპორტით მგზავრობა სურთ. ტაქსების სისტემა თუ არ მოწესრიგდება, მერე ნახეთ მგზავრების ნაკლებობა. ტაქსების სიმრავლე არასაკმარისმა საზოგადოებრივმა ტრანსპორტმა განაპირობა, ამიტომ ვიყიდეთ "ევრო 6" ტიპის ავტობუსები და მიკროავტობუსები, ამასთან, გვეყოლება კომფორტული ტაქსები,­ რათა მათ მგზავრები არ დაკარგონ.

- იქნებ ჯერ საზოგადოებრივი ტრანსპორტის მომსახურების გამართვა ჯობდა?
- მაგრამ საზოგადოება კომფორტული ტაქსებით მომსახურებასაც ითხოვს.

- საზოგადოება იმასაც ითხოვს, ჯერ საზოგადოებრივი ტრანსპორტის პრობლემა მოაგვარეთო.
- 2019 წლის მიწურულამდე ავტობუსების პარკი მთლიანად შეიცვლება.

- რამდენი წერტილია, სადაც მძღოლებს ვაუჩერის აღება შეუძლიათ?
- 5 წერტილია. არც იმის პრობლემაა, რომ მომსახურების ცენტრები დავამატოთ, რათა რიგები არ დადგეს.

- შეღებვისთვის 700 ლარი რა კრიტერიუმებით დაწესდა?
- ეს საბაზრო ფასია, აღებული იმ მასალაზე დაყრდნობით, რომელიც სრულფასოვნად შეღებვას სჭირდება. შეიძლება 350 ლარში ჩაეტიოთ, თუკი იაფფასიან მასალას აირჩევთ. ჩვენ მძღოლებს არ მივუთითებთ, სად შეღებონ, ეს მათი არჩევანია, თუ უნდათ, ბათუმში შეღებონ და ინვოისი ჩამოუტანონ ვაუჩერის გამცემს.

- ექსპერიმენტი ჩავატარეთ და 700 ლარად მანქანის შეღებვაზე არსად გვთანხმდებიან, ლაპარაკია 1.000-1.200 ლარზე და ზემოთ.
- არ ვიცი... ჩვენ ეს ფასი დავადგინეთ.­ ბაზრის კვლევის დროს შესაბამის ორგანიზაციებში იგზავნება ინფორმაცია და მათი უმრავლესობის დადებული ფასიდან საშუალო გამოგვყავს.

- ფირის გადაკვრის კარგი სპეციალისტი ცოტა გვყავსო...
- ტყუილია. პირადად მეც შემიძლია მანქანის მინების დასაბურად ცელოფანის­ გაკვრა. ფირის გადაკვრას ერთი დღე სჭირდება.

- მძღოლები მოითხოვენ, რომ 2 ან 3 წლით გადაიდოს რეგულაცია.
- ეს ცვლილება დაკავშირებულია მთლიან სატრანსპორტო სისტემასთან, ამიტომ ჩვენ არ განვიხილავთ ამ საკითხს.

- ანუ კომპრომისზე არ მიდიხართ?
- კომპრომისი არ იყო, 700-ლარიანი ვაუჩერი რომ შემოვიღეთ, ცალკე ქიმწმენდის ვაუჩერიც, ტაქსების მძღოლები გავათავისუფლეთ საშემოსავლო გადასახადისგან? კომპრომისი არ იყო, როდესაც ტექპასპორტის ცვლილებაში თანხა უნდა გადაეხადათ და აქაც მოვხსენით გადასახადი,­ უფასო საპარკინგე ადგილებიც გამოვყავით­. ოდესმე თუ ჰქონიათ ტაქსისტებს ასეთი კომფორტი? მალე ნახავთ, რომ ტაქსის მძღოლობა დაფასებული და პრესტიჟული საქმე გახდება.

მკითხველის კომენტარი (0)
კომენტარი ჯერ არ გაკეთებულა.
იყავი პირველი!

რედაქტორის რჩევით
რომელი საარჩევნო სისტემაა თქვენთვის მისაღები ყველაზე მეტად?
თქვენი აზრი მნიშვნელოვანია!
რომელი საარჩევნო სისტემაა თქვენთვის მისაღები ყველაზე მეტად?
თვის კითხვადი სტატიები