"ჩემთვის ეს საოცარი გამოცდილება იყო - თითქოს ხელახლა დავიბადე..."
"ჩემთვის ეს საოცარი გამოცდილება იყო - თითქოს ხელახლა დავიბადე..."
ამერიკიდან დაბრუნებული, დასვენებული, ენერგიით სავსე და მოტივირებული ნინო შავგულიძე სერიალში - "იდეალური დედა" ტასოს როლით გამოჩნდა. გულთბილი, ცოტათი ჯაჯღანა ტასო, რომლის საქციელიც ღიმილს იწვევს, მსახიობს ძალიან შეუყვარდა. მიიჩნევს, რომ ცხოვრებისეულ სირთულეებსაც იუმორით თუ შევხედავთ, ყველაფერი გამოგვივა...

გთავაზობთ ამონარიდებს ინტერვიუდან, რომელიც ჟურნალ "გზაში" დაიბეჭდა:

"კვირაში 5 დღე ბავშვთან ვიყავი. დასვენების იმ 2 დღეს, რაც მეკუთვნოდა, მეგობრების წრეში ვატარებდი, რადგან ნიუ-იორკში ჩემი ბევრი მეგობარი ცხოვრობს. ახალი მეგობრებიც შევიძინე. სხვადასხვა აქტივობით ვიყავი დაკავებული,
მაგალითად - ჩემს ცხოვრებაში პირველად, თვითმფრინავიდან პარაშუტით გადმოვხტი. ჩემთვის ეს საოცარი გამოცდილება იყო - თითქოს ხელახლა დავიბადე... ამერიკაში როგორი დიდი ხნითაც უნდა წახვიდე, მას ვერ ამოწურავ - მაინც სულ სიახლეები გხვდება, რადგან იქ ყველაფერი ყოველდღიურად იცვლება. იქ ყოფნა ჩემთვის ძალიან საინტერესო იყო. რომ არა სამშობლოს
მიმართ ჩემი ასეთი ნოსტალგია და სიყვარული, შეიძლება, საქართველოში არ ჩამოვსულიყავი (იღიმის)... ასეთი ცდუნების წინაშე ბევრი დგება..."


"მეგობრების გარეშე ცხოვრება არ შემიძლია. ვცდილობთ, ერთმანეთს ყოველდღე შევხვდეთ. მყავს მეგობრები, რომლებსაც ყოველდღე ვეკონტაქტები - საერთო "ჩათიც" გვაქვს და ყველაფერს განვიხილავთ, რაც ხდება (ტექნოლოგიური სიახლე იქნება, ჩვენი მეგობრის ამბავი თუ ნებისმიერი სისულელე, მნიშვნელობა არ აქვს)... ადამიანებთან ურთიერთობა მიყვარს. ოღონდ მარტო არ ვიყო და ნებისმიერ თემაზე ვისაუბრებ..."

"ოჰ, ცუდი გოგო ვარ (იცინის). უკვე დროა, თავს მოვუარო, მაგრამ ხომ გაგიგონია - გული არ ბერდებაო? ისე მოხდა, რომ ბოლო 2 წლის განმავლობაში, როცა თავის მოვლა მართლა უნდა დამეწყო, ნიუ-იორკში წავედი, ჩამოვედი, წავედი, ჩამოვედი... შემდეგ შემოსავლის გარეშე ვიყავი, რადგან გადაღებები არ მქონდა. მერე ისევ წავედი - იქ 5 თვე ვიყავი. საქართველოში დაბრუნების მერე, ჩემთვის ისეთი აქტიური ცხოვრება დაიწყო, რომ ვერაფრით მოვიცალე, თუნდაც კოსმეტოლოგთან მივსულიყავი, როგორც ტასო დადის ყოველდღე..."

"ანდრია გველესიანი ძალიან საყვარელი და კარგი ბიჭია. სხვათა შორის, სერიალის გადაღებები უკვე დაწყებული გვქონდა და ძიებაში ვიყავით - ტასოს როგორი ქმარი უნდა ჰყოლოდა. ერთ დღესაც, მთელმა გადამღებმა ჯგუფმა ერთხმად წარმოვთქვით - "ანდრია გველესიანი!" უცებ წარმოვიდგინეთ, რომ ტასოს ასეთი ქმარი უნდა ჰყოლოდა. ანდრია "ტიპაჟურად" შეირჩა - ვიცოდით, რომ "ჩემი" ქმარი იქნებოდა..."

სტატიას სრულად ჟურნალ "გზის" 25 აპრილის ნომერში წაიკითხავთ.

ეთო ყორღანაშვილი


რუბრიკის სხვა სიახლეები
ბოლო 2-3 წლის განმავლობაში როგორ შეიცვალა თქვენი ოჯახის მატერიალური მდგომარეობა?
თქვენი აზრი მნიშვნელოვანია!
ბოლო 2-3 წლის განმავლობაში როგორ შეიცვალა თქვენი ოჯახის მატერიალური მდგომარეობა?