კონსულტანტი ერთი დღით
კონსულტანტი ერთი დღით
"მომხმარებელი ყველაზე ხშირად პროდუქტის ვადით ინტერესდება. ვადები სისტემატურად მოწმდება. ბევრი ისეთი დეტალია, რომლებიც ჩვენ არც ვიცით"

მაღაზიებსა და მარკეტებში მომუშავე კონსულტანტების მომსახურებაზე ბევრი განსხვავებული აზრი მომისმენია. ზოგს არ მოსწონს, ზოგი კი, პირიქით, კონკრეტულ მაღაზიაში ხშირად იმიტომ შედის, რომ იქაურ პერსონალს ეჩვევა და უშინაურდება. გადავწყვიტე, ერთ-ერთ სუპერმარკეტში კონსულტანტად დამეწყო მუშაობა, რათა გამეგო, როგორია კონსულტანტის ერთი ჩვეულებრივი სამუშაო დღე.

დილის 09:00 სთ

თბილი და შინაურული გარემო მხვდება­. უმეტესობა აქ ძველი თანამშრომელია. მენეჯერი
მოკლე ინსტრუქტაჟს მიტარებს, მიხსნის, რომ მთავარია, მომხმარებელს თავაზიანად ესაუბრო, გაუღიმო და სააქციო პროდუქცია შესთავაზო. შესვენება დღეში­ სამჯერ არის, თითო ნახევარი საათით. ამის შემდეგ იწყება ყველაზე საინტერესო: მე ფორმას ვიცვამ, თავზე კეპს ვიხურავ და ხორცპროდუქტების მაცივართან ვდგები.
თავს უჩვეულოდ ვგრძნობ, ყველაზე მეტად სლაიდერი, ანუ ელექტრომჭრელი მაშინებს.
დაძაბულობას მხიარული კონსულტანტის, მარეხის წახალისება მიხსნის, რომელსაც უამრავ კითხვას ვუსვამ. ისიც დაუზარებლად მპასუხობს. ამასობაში პირველი კლიენტიც გამოჩნდა და მეც მომხმარებელს ყურებამდე გავუღიმე."სააქციო რა გაქვთო, მეკითხება და მეც ვპასუხობ. ერთი კილოგრამი ამიწონეთ, არასდროს გამისინჯავს, თუ მომეწონა, კიდევ ვიყიდიო. ჩემდა გასაკვირად, ელექტროსასწორზე იოლად ავწონე­ დაჭრილი ლორი და ეტიკეტიც ამოვბეჭდე. მარეხმა ყველა პროდუქტის კოდი და შემადგენლობა ზეპირად იცის, რაც ჩემთვის წარმოუდგენელია.

მაცივრიდან გამომაქვს სტერილურად შეფუთული სოსისი, რომელსაც ვადა აწერია. ვხსნი და მაცივარში ვაწყობ. მენეჯერი სწრაფი ნაბიჯებით მიახლოვდება. ალბათ, რამე არასწორად გავაკეთე-მეთქი, ვფიქრობ და საყვედურის მოლოდინში მწნილით­ სავსე­ კონტეინერს ვდებ მაცივარში. "ძალიან მომწონს შენი მუშაობა,­ ჩვენთან ხომ არ დარჩები", -"მეუბნება ღიმილით და თან მიხსნის, რომ აუცილებელია, პროდუქცია შევსებული იყოს და თით­ოეული სოსისი სიმეტრიულად და ლამაზად იდოს.

"როდესაც ძეხვს დაჭრი, მაკრატლით ლამაზად უნდა შემოაჭრა პარკი, ახალი საკვების შესაფუთი ცელოფანი შემოაკრა და ისე დააბრუნო მაცივარში. მზა საჭმელსაც ყოველ ჯერზე ახალი პოლიეთილენის პარკი ისე უნდა გადააკრა, ერთი ნაწიბურიც რომ არ აჩნდეს", - მიხსნის მენეჯერი.


11:30 სთ

პირველ შესვენებაზე გავდივარ და დროის ათვლა იწყება. მოსასვენებელ ოთახში ყავას ვიმზადებ. ვერ ვიტყვი, არ დავღლილვარ-მეთქი, მაგრამ კმაყოფილი ვარ, რომ ვიღაცას ვეხმარები.

12:00 სთ


მყიდველების რაოდენობა მატულობს. მარეხი სწრაფად ემსახურება ყველას, მე კი თავში ქაოსი მაქვს, გულწრფელად მიკვირს, როგორ შეიძლება არ დაიბნე და არაფერი შეგეშალოს.
მარეხი თვალის ზომით ხვდება, რამდენი სოსისი ან სარდელი ჩააწყოს პარკში. თითქმის გრამებში არტყამს. მეც ვეხმარები. ყველაზე მეტად ხელთათმნიანი ხელით ახალი პარკის გახსნა მიჭირს - ერთ მყიდველს შევეცოდე და დახმარება შემომთავაზა. სამაგიეროდ, აწონა კარგად გამომდის, მაგრამ სასწორის ეკრანს მაინც შიშით ვაკვირდები, რადგან ერთხელ შემეშალა და ძეხვის კოდის მაგივრად მომხმარებელს მარილის კოდი ავუკრიფე, შესაბამისად, ლანძღვაც დავიმსახურე - თუ არ იცი, სახლში წადიო, სანამ პასუხს გავცემდი, მარეხმა სიტუაცია გაანეიტრალა. მეწყინა, დღეში რამდენი აგრესიული მომხმარებელი­ შემოვა, ყველას უნდა უცინო და საბოლოოდ მაინც ლანძღვას იმსახურებ-მეთქი.

14:30 სთ


ბურღულეულში გადავინაცვლე. ეს სექცია ხათუნას აბარია, ზეპირად იცის, სად რა დევს და შეუძლია ამომწურავი პასუხი გაგცეს ნებისმიერ პროდუქტზე. ისეთი სითბოთი სთავაზობს მყიდველებს დახმარებას, რომ მთელ სამყაროზე განაწყენებული ადამიანიც ვერ გაუძლებს და გაეღიმება.

ერთხელ ვიღაც მამაკაცი შემოსულა, რომელიც პროდუქტს ხელში იგროვებდა. ხათუნას უკითხავს, კალათა ხომ არ გნებავთო, რაზეც მამაკაცს უპასუხია, კალათა რად მინდა, წითელქუდა კი არა ვარო. არიან ისეთებიც, ვისაც კონსულტანტის­ დახმარება აღიზიანებთ. მაგალითად, სიტყ­ვაზე, "გისმენთ", გპასუხობს,"რას მისმენ,­ ლექსს კი არ გიკითხავო! მოკლედ, რას აღარ მოისმენთ აქ დღის განმავლობაში.

15:00 სთ


უკვე ვიცი, რომ ყოველი სახეობის პროდუქტს დახლზე განსხვავებული ფერის შესაბამისი სტიკერი აკრავს. ფასების და ვადების გადამოწმებაც ვისწავლე.

16:00 სთ


ვალაგებ ხილბოსტნეულს, რომელიც დღეში მინიმუმ ორჯერ უნდა შეამოწმო­ და გაფუჭებული მაშინვე­ ამოიღო. საქმესთან ერთად მყიდველებს­ ვაკვირდები - ზოგი დახმარებაზე გადა­ჭრით ამბობს­ უარს, ზოგი კი დაბნეული ათვალიერებს დახლებს და სიამოვნებით იღებს დახმარებას. ათას წვრილმანზე გეკითხებიან. მაგალითად, როგორი ფორმის მაკარონს უფრო მოუხდება"მოცარელა, რომელი პური შეიცავს მეტი რაოდენობით შვრიას; ზოგი ზეფირს ეძებს, ზოგიც სამარხო ტკბილეულს.…

17:00 სთ

დახლს ვაკონტროლებ - თუ ვინმე რომელიმე პროდუქტს აიღებს, მაშინვე უნდა შევავსო. ყველაფერს ლამაზად ვაწყობ, პარიტეტების მიხედვით. მომხმარებელი ყველაზე ხშირად პროდუქტის ვადით ინტერესდება. ვადები სისტემატურად მოწმდება. ბევრი ისეთი დეტალია, რომლებსაც ჩვენ, ჩვეულებრივი მყიდველები, ვერც ვამჩნევთ­ და არც ვიცით. მაგალითად, რას ნიშნავს­ ფაიფოს პრინციპი, ან თუნდაც როგორ აკონტროლებენ ვადებს. გადავწყვიტე, გამ­ეგო, რა სიხშირით იყიდება ქართული პროდუქცია და რამდენად ხელმისაწვდომია­ ფასები მომხმარებლისთვის. მაინტერესებდა, რას ფიქრობენ ქართულ ნაწარმზე.
ნინომ ჩემი ყურადღება იმით მიიქცია, რომ თითოეული პროდუქტის ანოტაციას გულისყურით ეცნობოდა.

- ყოველთვის ორ რაღაცას ვაქცევ ყურადღებას: პირველი - პროდუქტი სად არის წარმოებული და მეორე - შენახვის ვადას. ქართული პროდუქტი უფრო გემ­რიელია და შედარებით ნატურალურიც, ვიდრე შემოსული პროდუქტები. მიხარია, რომ ახალ-ახალი ქართული პროდუქტები­ იქმნება. რამდენიმე წლის წინ მარკეტებში­ იშვიათობა იყო ქართული ნაწარმი, ახლა თვითონაც ხედავთ, რამდენი დასახელებაა.

18:00 სთ

მიხარია, რომ ასეთი საინტერესო გამოცდილება მივიღე. პერსონალს ვემშვიდობები და"სუპერმარკეტს ვტოვებ.

P.S. ჩემი პირველი სამუშაო დღის ბოლოს მივხვდი, რომ კონსულტანტის პროფესია სულაც არ არის ისეთი ადვილი, როგორიც ჩანს - უნდა იცოდე, ყველა პროდუქტის დასახელება, მისი ვარგისიანობა, ფასი და რაც მთავარია, გიყვარდეს ადამიანები, მათთან ურთიერთობა. მომთმენიც უნდა იყო - მომხმარებლისგან დაუმსახურებელი ლანძღვაც უნდა აიტანო, რადგან მომხმარებელი ყოველთვის მართალია!
ზურა სოლომნიშვილი
მკითხველის კომენტარი (0)
კომენტარი ჯერ არ გაკეთებულა.
იყავი პირველი!

რუბრიკის სხვა სიახლეები
თქვენი აზრით, რომელი პრობლემის მოგვარება უნდა იყოს პრიორიტეტული საქართველოს ხელისუფლებისთვის?
თქვენი აზრი მნიშვნელოვანია!
თქვენი აზრით, რომელი პრობლემის მოგვარება უნდა იყოს პრიორიტეტული საქართველოს ხელისუფლებისთვის?