"ალკოჰოლთან დაკავშირებით ჰქონდა რაღაც პრობლემა" - რას ამბობს საპატრიარქოს წარმომადგენელი დაკავებულ ბერზე - კვირის პალიტრა

"ალკოჰოლთან დაკავშირებით ჰქონდა რაღაც პრობლემა" - რას ამბობს საპატრიარქოს წარმომადგენელი დაკავებულ ბერზე

საპატრიარქოს პრესცენტრის ხელმძღვანელის, დეკანოზ ანრია ჯაღმაიძის ინფორმაციით, ნარკოდანაშაულისთვის დაკავებული ბერი ათონის მთაზე ცხოვრობდა, ქართულ ეკლესიაში კი არასდროს უმსახურია.

როგორც დეკანოზმა ანდრია ჯაღმაიძემ "ინტერპრესნიუსს" განუცხადა, შესაბამისად, საპატრიარქოს დაკავებულზე პასუხისმგებლობა არ ეკისრება.

"საქმე იმაშია, რომ ეს ადამიანი აღიკვეცა ათონის მთაზე და ცხოვრობდა იქ. საქართველოში რაც დაბრუნდა, ცხოვრობდა თავის სახლში. არ ცხოვრობდა მონასტერში და არც მოღვაწეობდა ეკლესიაში. ასე რომ, ჩვენ პრინციპში მის სასულიერო პირობაზე და მის მოღვაწეობაზე არანაირი პასუხისმგებლობა და ინფორმაცია არ გვაქვს", - განაცხადა დეკანოზმა.

მისივე თქმით, დაკავებულ პირზე ინფორმაცია არ აქვს, თუმცა გადმოცემით მათთვის ცნობილია, რომ ალკოჰოლთან დაკავშირებული პრობლემა ჰქონდა.

"არაფერი ვიცი, პირადად არ ვიცნობ. თბილისის ეპარქიაში არ არის. უბრალოდ რაც გვაქვს გადმოცემით ინფორმაცია, რომ მოიხმარდა ალკოჰოლს, ალკოჰოლთან დაკავშირებით ჰქონდა რაღაც პრობლემა. სახლში ცხოვრობდა, როგორც ერისკაცი", - აღნიშნა ჯაღმაიძემ.

შეგახსენებთ, ზუგდიდში ნარკოდანაშაულისთვის ათონის მთაზე მოღვაწე ბერი დააკავეს. "ინტერპრესნიუსის" ინფორმაციით, ათონის მთაზე მოღვაწე ბერს 40 აბი მეტადონი აღმოუჩინეს.

იხილეთ ასევე: "ის არის დადებითი წარსულის მქონე ბერი" - რას ამბობს ნარკოტიკების შეძენა-შენახვის ბრალდებით დაკავებული ბერის ადვოკატი?

"ინტერპრესნიუსი"