სამუშაოდ გერმანიაში
სამუშაოდ გერმანიაში
საქართველოს მოქალაქეების გერმანიაში დროებით ლეგალურ დასაქმებაზე რეგისტრაცია 15 თებერვლიდან დაიწყო. ორ სახელმწიფოს შორის შეთანხმების საფუძველზე საქართველოს მოქალაქეებს გერმანიაში დროებით დასაქმების შესაძლებლობა ეძლევათ. საუბარია სეზონურ, მაქსიმუმ, სამი თვის ვადით სამუშაოზე სოფლის მეურნეობაში. სამუშაოები გერმანიაში 1-ლი აპრილიდან იწყება.

სსიპ "დასაქმების ხელშეწყობის სახელმწიფო სააგენტოს" ინფორმაციით, 18 თებერვლის მდგომარეობით სააპლიკაციო ფორმა - დროებითი დასაქმება გერმანიაში - 65 821-მა პირმა შეავსო.

ნინო ველთაური, დასაქმების ხელშეწყობის სახელმწიფო სააგენტოს დირექტორი:

- რეგისტრაცია სტანდარტულად მიმდინარეობს, რაც გულისხმობს პირადი
ინფორმაციის შევსებას: პირადი ნომერი, გვარი, მამის სახელი, იურიდიული მისამართი და მობილურის ნომერი.

დასაქმების მსურველი უნდა იყოს საქართველოს მოქალაქე, რომელიც აქ ცხოვრობს, ასევე, 18-დან 60 წლამდე, დეპორტირებული არ უნდა იყოს და არ უნდა ჰქონდეს სამართლებრივი დარღვევა. სასურველია ჰქონდეს სოფლის მეურნეობის სფეროში მუშაობის გამოცდილება, საჭიროა, უცხო ენის
საბაზისოცოდნაც. დამსაქმებლები თანახმა არიან დასაქმებულთა ჯგუფში იყოს ენის მცოდნე ერთი პირი, რომელიც მას კომუნიკაციაში დაეხმარება.

რეგისტრაციის შემდეგ სამუშაოს მაძიებელს თავისი უნიკალური კოდი ენიჭება. განაცხადების დამუშავების შემდეგ რეგისტრირებულ აპლიკანტებს, რომლებიც პირველად მოთხოვნებს აკმაყოფილებენ, დასაქმების ხელშეწყობის სახელმწიფო სააგენტოსა და სოციალური მომსახურების სააგენტოს სერვისცენტრებში გასაუბრებასა და კონსულტაციაზე დაიბარებენ, თუ რას ნიშნავს გერმანიაში დროებითი შრომითი მიგრაცია, რომ ეს დროებითია და თუ ნაკისრი შრომითი ურთიერთობები პირნათლად შესრულდება, მომავალ წელს დასაქმების სქემაში იმ პირის ჩართვა, ვინც დასაქმების სურვილს გამოხატავს, კიდევ უფრო გამარტივდება.

გერმანული მხარის პოზიციით, სავსებით შესაძლებელია მომავალ წელს დამსაქმებლებმა ის მოქალაქეები მოითხოვონ, რომელთაც კეთილსინდისიერად იშრომეს.

შესაძლოა დამსაქმებელსა და დასაქმებულს შორის პირდაპირი კავშირიც შეიქმნას. ისიც შესაძლებელია, ხშირი მიმოსვლა რომ არ მოუწიოთ, მათ უშუალოდ ვაკანსიების შემოსვლის შემდეგ დავუკავშირდეთ.

- ამ დროისთვის ვაკანსიები არის?
- ჯერჯერობით არა, მაგრამ ველით, რომ ახლო მომავალში დაიწყება და სამუშაოს მაძიებელი თავად აირჩევს სამუშაო ადგილს და კონკრეტულ ვაკანსიაზე თანხმობის შემდეგ შეავსებს სპეციალურ სააპლიკაციო ფორმას, რომელსაც ქართულ მხარეს გერმანიის დასაქმების სააგენტო მიაწვდის, რის შემდეგაც საბოლოო გადაწყვეტილებას უკვე გერმანიაში დამსაქმებელი მიიღებს.

- მგზავრობის ხარჯს ვინ ფარავს?
- მგზავრობის ხარჯებს დასაქმებული ფარავს. ამასთან, დასაქმების მსურველმა გამგზავრებამდე 72 საათით ადრე უნდა ჩაიტაროს კორონავირუსზე PCR-ტესტი. ამის შემდეგ მას გერმანიაში, აეროპორტში ხვდება დამსაქმებლის წარმომადგენელი, რომელიც მის სამუშაო ადგილამდე ტრანსპორტირებას უზრუნველყოფს.

ერთ საათში მინიმალური ხელფასია 9.5 ევრო, აქედან 5% არის საშემოსავლო გადასახადი. ჯანმრთელობის დაზღვევის ხარჯს დამსაქმებელი ფარავს. დამსაქმებელი ვალდებულია უზრუნველყოს დასაქმებულის საცხოვრებელი პირობები სამუშაო ადგილთან ახლოს, თუმცა ქირის საფასურს დასაქმებული იხდის. შეიძლება კვების ხარჯი დამსაქმებელმაც გასწიოს, მაგრამ მას შემდგომ დასაქმებული ფარავს.

კოვიდინფექციის გავრცელების პრევენციისთვის საქართველოდან გამგზავრებული ჯგუფი პირველი ათი დღის განმავლობაში სხვა ჯგუფებისგან განცალკევებულად იმუშავებს. სამუშაო საათები დღის განმავლობაში 8 საათია, შეთანხმების შემთხვევაში შესაძლოა იყოს 10 საათიც.

- დასაქმებულმა უფლებების დარღვევის შემთხვევაში, ვის უნდა მიმართოს?
- გერმანიის დასაქმების სააგენტო სრულად უზრუნველყოფს, რომ სახელშეკრულებო პირობები შესრულდეს. ორივე სახელმწიფოს მხრიდან სრული მზადყოფნაა, რომ ამ სქემამ იმუშაოს.

არსებობს რისკი, რომ ვიღაც სამთვიანი ვიზის დარღვევას შეეცდება, ამიტომ მათ გასაგონად მინდა ვთქვა, მათი ჩანაფიქრი ყველა შემთხვევაში ცუდად დასრულდება, რადგან ჩვენთვის ცნობილია ამ პირთა მონაცემები და მისი მოძიება ადვილი იქნება, რაზეც გერმანული მხარე, შრომის ფედერალური სააგენტო იზრუნებს და მას ელის დეპორტირება. ეს კი ნიშნავს, რომ ეს პირები ამ სქემაში ვეღარასდროს ჩაერთვებიან.

- რეგისტრაციის მსურველთა კვოტა ლიმიტირებულია?
- ეს წელი გერმანული მხარისთვისაც საპილოტეა: 70-იანი წლების შემდეგ მათ მსგავსი კოორდინირებული შრომითი მიგრაციული სქემები არ ჰქონიათ. ამიტომ ამ ეტაპზე კონკრეტულ ციფრებს ვერ გვეუბნებიან. როდესაც დრო გავა, დინამიკაც გამოიკვეთება და უფრო მარტივი იქნება პროგნოზების გაკეთებაც.
მკითხველის კომენტარი (0)
კომენტარი ჯერ არ გაკეთებულა.
იყავი პირველი!

რუბრიკის სხვა სიახლეები
დღის კითხვადი სტატიები
თვის კითხვადი სტატიები