ირაკლი ღარიბაშვილი ბათუმში, კორპუსის ჩამონგრევის დროს გარდაცვლილთა სამოქალაქო პანაშვიდზე იმყოფებოდა
"მინდა ღრმა მწუხარება გამოვხატო. ძნელია სიტყვებით გამოხატო ის განცდა, რომელიც ჩვენ ყველას აქ გვაქვს", - ამის შესახებ ბათუმში, კორპუსის ჩამონგრევის დროს გარდაცვლილთა სამოქალაქო პანაშვიდზე მისულმა პრემიერ-მინისტრმა, ირაკლი ღარიბაშვილმა განაცხადა.
მანვე აღნიშნა, რომ ბათუმში უდიდესი ტრაგედია მოხდა და ეს უბედურება მთელმა ქვეყანამ განიცადა.
"კიდევ ერთხელ ვუსამძიმრებ გარდაცვლილთა ოჯახებს და ვუსურვებ გამძლეობასა და ღმერთის წყალობას", - აღნიშნა პრემიერმა.
შეგახსენებთ, რომ ბათუმში, 26 მაისის ქუჩაზე საცხოვრებელი კორპუსი 8 ოქტომბერს ჩამოინგრა. ნგრევას 9 ადამიანი ემსხვერპლა, მათგან 3 არასრულწლოვანია.
შინაგან საქმეთა სამინისტრომ მომხდარ ფაქტზე 3 პირი დააკავა. დაკავებულია ბინის მეპატრონე ზაურ ბუდაგოვი და 2 მუშა, მამა-შვილი სურმანიძეები.