ინტერვიუ მოსკოვის სახელმწიფო უნივერსიტეტის საერთაშორისო ურთიერთობების კათედრის ხელმძღვანელ ალექსანდრ დუგინთან.

"ჩვენ სამხრეთ ოსეთს დამოუკიდებელ სახელმწიფოდ მივიჩნევთ და მასთან ისე ვურთიერთობთ, როგორც დამოუკიდებელ ქვეყანასთან, რომელსაც სრული უფლება აქვს, მოახდინოს საკუთარი საზღვრების დემარკაცია. მეორე მხრივ, გულუბრყვილონი ნუ ვიქნებით და ნუ ვივარაუდებთ, რომ ამას ქართველები ან საერთაშორისო საზოგადოება ლეგალურად მიიჩნევენ.

ჩვენ, ჩემი აზრით, მივიღეთ ძალზე გადამჭრელი და ძალზე სწორი გეოპოლიტიკური გადაწყვეტილება. ზნეობრივი თვალსაზრისით, გენოციდისგან ვიხსენით მთელი ერი; მეორე - ჩვენ დავამტკიცეთ, რომ ევრაზიულ სივრცეში გადაწყვეტილებებს იღებს არა მხოლოდ ერთი ცენტრი - ვაშინგტონი და მისი სატელიტები, არამედ სულ მცირე, ორი. და ჩვენ მზად ვართ, საკამათო საკითხები, აუცილებლობის შემთხვევაში, ძალისმიერი გზით მოვაგვაროთ. როგორ გადავწყვიტოთ სიტუაცია მარტივად? თუ საქართველო ევრაზიის კავშირში აფხაზეთსა და სამხრეთ ოსეთთან ერთად გაწევრდება, მაშინ ევრაზიის კავშირის ფარგლებში საზღვრების დემარკაციის საკითხი მნიშვნელობას კარგავს, ისევე როგორც, მაგალითად, ევროპაში. ეროვნული სახელმწიფო არც თქვენ გამოგივიდათ და არც არავის პოსტსაბჭოთა სივრცეში. ამიტომ ვუბრუნდებით განვითარების სწორ მოდელს - საზიარო, ტრანსნაციონალური განვითარების მოდელს რეგიონულ კონტექსტში. ასე რომ, თუ არ მოინდომებთ, ჩვენ ახლა დროებით დემარკაციას განვახორციელებთ, შემდეგ კი, თუ არ მოჭკვიანდებით, შეგვიძლია ამ საზღვრების მნიშვნელობა მეორეხარისხოვანი გავხადოთ ან საერთოდ გავაუქმოთ. თბილისმა, რა თქმა უნდა, ივანიშვილის არჩევის შემდეგ, მკვეთრად შეიცვალა პოზიცია. ახლა ეს სრულიად სხვა ქვეყანაა. ვფიქრობ, სიტუაციის ესკალაცია ახლა შეუძლებელია. საქართველოში ყველამ შეიგნო, რომ სააკაშვილის პოლიტიკა თვითმკვლელობაა. მისი გაგრძელება კიდევ რაღაც ტერიტორიის დაკარგვამდე მიგიყვანთ. ამიტომ, ივანიშვილო, მოდით, ავაწყოთ რუსეთთან ურთიერთობები, ნუ ვიჩხუბებთ საზღვრების გამო და ვთხოვთ ჩვენს მეგობრებს სამხრეთ ოსეთში, დემარკაცია არ იჩქარონ.

ივანიშვილი პრაგმატული პოლიტიკოსია, ქართველი ნაციონალისტია. ყველა ამბობს, "მოსკოვის ხელიაო", თუმცა ასე არ არის. ის უბრალოდ ქართველი რაციონალური ნაციონალისტია, რომელიც ქართველი ხალხის ინტერესების კარნახით მოქმედებს და ესმის, რა არის მისთვის სასარგებლო და რა არა. სულაც არ არის პრორუსული პოლიტიკოსი, უფრო პროდასავლელია, მაგრამ რეალისტი. რუსეთთან ურთიერთობის ნებისმიერი გამწვავება საქართველოს ზიანს მოუტანს. ივანიშვილს ეს არ სურს, რადგან ის თავისი ხალხის მეგობარია და არა მარიონეტი, რომელსაც დასავლური ფონდების ხარჯზე გააქვს თავი. ის ქართველი ქართველია, სააკაშვილი კი ამერიკელი ქართველი. აი, სულ ეს არის განსხვავება. ამიტომ, ვფიქრობ, რომ მსგავსი, ეროვნული ყაიდის გონიერ პოლიტიკოსებთან, ჩვენ, რა თქმა უნდა, შევძლებთ ავაშენოთ საკმაოდ თანამიმდევრული და გაუმჯობესებული ურთიერთობების სისტემა.