პოლიტემიგრაცია პირდაპირ ეთერში
ცნობილი ქართველი ჟურნალისტი სამხრეთ ოსეთში გაიქცა და რუსეთისთვის პოლიტიკური თავშესაფრის თხოვნას აპირებს.
მალხაზ გულაშვილი საქართველოს მედიასივრცეში მნიშვნელოვანი ფიგურაა. 1990-იან წლებში მან ინგლისურენოვანი გაზეთი გეორგიან ტიმეს-ი დააფუძნა, რომელიც შემდგომში გავლენიან ჰოლდინგად იქცა. მალხაზ გულაშვილი მეთაურობს სახალხო მართლმადიდებლურ მოძრაობას. სწორედ ამ მოძრაობის აქტივისტების დაპატიმრების შემდეგ გაქრა იგი თბილისიდან. მისი რელიგიური ორგანიზაციის და ასევე "მართლმადიდებელ მშობელთა კავშირის" რამდენიმე წევრს ორთვიანი წინასწარი პატიმრობა მიესაჯათ დამოუკიდებელ ტელეკომპანია "კავკასიაში" გადაცემის დროს შევარდნისა და ხულიგნური საქციელის გამო.
კერძოდ, მათ სცემეს ჟურნალისტებსა და ტელეკომპანიის დამფუძნებელ დავით აქუბარდიას. ტელეწამყვანმა ნინო ჯანგირაშვილმა პირდაპირ ეთერში მოუწოდა პოლიციას, დაუყოვნებლივ მოსულიყო და დაეცვა გადაცემის მონაწილენი. "ეტყობა, გულაშვილს და მის თანამებრძოლებს ყველაფერი დაგეგმილი ჰქონდათ, არადა, წინასწარ ვთხოვე მისი მოძრაობისა და კავშირის მხრიდან ყოველგვარი გამოხდომის აღკვეთის უზრუნველყოფა", - ამბობს ჯანგირაშვილი. სახალხო მართლმადიდებელი ორგანიზაციის ერთ-ერთმა წევრმა "კომერსანტს" შეატყობინა, რომ პროვოკაცია საქართველოს შსს-ს დაკვეთით სპეციალურად მოაწყვეს აქუბარდიამ და ჯანგირაშვილმა, რადგან საქართველოს ხელისუფლებას დიდი ხანია მალხაზის დაპატიმრება ჰქონდა განზრახული. მისივე ცნობით, "სპეცსამსახურები ცდილობდნენ მალხაზის ვაჟის პროვოცირებასაც, ამიტომ მამა-შვილი ფეხით გადავიდა სამხრეთ ოსეთის ახალგორის რაიონში". უკვე ცხინვალში მყოფმა მალხაზ გულაშვილმა კი განაცხადა, რომ რფ-ის პრეზიდენტ დმიტრი მედვედევს რუსეთში პოლიტიკურ თავშესაფარს სთხოვს.
გულაშვილის საქციელი მოულოდნელი არ ყოფილა. ის ჯერ კიდევ "ვარდების რევოლუციის" დროიდან ითვლებოდა მიხეილ სააკაშვილის მოწინააღმდეგედ. 2008 წლის ხუთდღიანი ომის შემდეგ ის მოითხოვდა საქართველოს საგარეო პოლიტიკური კურსის შეცვლასა და ერთიანი მართლმადიდებლური რწმენის გამო რუსეთთან დაახლოებას.
ბოლო დროს გულაშვილი არაერთხელ ყოფილა მოსკოვში. ყოფილი საბჭოთა ქვეყნების ჟურნალისტების მონაწილეობით ჩატარებულ ბოლო მედიაფორუმზე კი მოახერხა და დმიტრი მედვედევს კითხვა დაუსვა რუსულ ბაზარზე სასოფლო-სამეურნეო პროდუქტებისა და პირდაპირი ავიაკავშირის აღდგენის თაობაზე. რუსეთის პრეზიდენტმა მაშინ უპასუხა, საქართველოს ახლანდელი ხელმძღვანელების პირობებშიც კი არ არის პრობლემური ამ საკითხების გადაწყვეტაო.
მალხაზ გულაშვილი უკვე მეორე ქართველი ჟურნალისტია, რომელმაც რუსეთს პოლიტიკური თავშესაფარი სთხოვა. შარშან, 1-ელ ოქტომბერს ინტერნეტსაიტი იტნეხლუსივე-ის მთავარი რედაქტორი ლუკიანე გუდაძე ოჯახთან ერთად გაიქცა სამხრეთ ოსეთში. განაცხადა, ქართული ხელისუფლება მდევნისო და რფ-ში თავშესაფარი ითხოვა. ახლა ბ-ნი გუდაძე რუსეთში ცხოვრობს.
"კომერსანტი", რუსეთი