უხორცო ხინკალი
ეს ამბავი კომუნისტების დროს მოხდა. ოზურგეთში სასადილოს გამგედ მუშაობდა საკმაოდ ენაკვიმატი ნოდარ ბ-ძე. ერთხელ, ერთი კლიენტი აღშფოთებული კიცხავდა
ოფიციანტს:
- რა არის, ესაა ხინკალი?! ახლავე დაუძახეთ გამგეს! - მუშტი დაარტყა მაგიდაზე კლიენტმა. ოფიციანტს ფერი ეცვალა და სასწრაფოდ გაეშურა უფროსის კაბინეტისკენ.
- რა უნდა? - ჰკითხა ნოდარიმ.
- რა ვიცი, ბატონო, ხინკალი არ მოეწონა, ნაღდად ინტრიგანია. უხალისოდ გაემართა ნოდარი სასადილოს დარბაზისკენ.
- რა პრეტენზია გაქ, ძამა? - ჰკითხა კლიენტს მეგობრულად.
- რა და 20 ცალი ხინკალი შევუკვეთე და არც ერთში ხორცი არ არის, ხომ ვერ ამიხსნით, რატომ?
- რატომ და გუშინ ხორცმა ხალხი დაგვიწამლა და აღარ ჩავდევით, ბატონო. - უპასუხა ნოდარმა. კლიენტმა თავი ვეღარ შეიკავა და გულიანად გაიცინა, რამაც სიტუაცია უცებ განმუხტა.
დათო, თბილისი.