ჟამიდან ჟამამდე
გალების შეთქმულება "რომელუსის ზღაპარში"
მოგეხსენებათ, ჩვენი პრეზიდენტი რამდენიმე დღის წინ რომში ბრძანდებოდა. იყო დრო, ყველა გზა რომში მიდიოდა... ჩვენ თვალი გადავავლეთ რომის ისტორიას და მაშინდელი ერთ-ერთი კეისრისა და ხელქვეითის დიალოგი ამოვიკითხეთ. ძალიან დიდი მსგავსებაა ჩვენს დროსა და მაშინდელს შორის. მაშ, ასე, ძველი რომი, კეისრის სასახლე:
- უსათნოესო კეისარო, ფაქტობრივად, ღმერთო, რომისა და სამყაროს გამგებელო!
- ბატონო!
- ჯერ არ დამიმთავრებია, უსათნოესო კეისარო, ფაქტობრივად, ღმერთო, რომისა და სამყაროს გამგებელო, "წილი ნაყარიას" დამძახებელო, ღმერთ მარსის შვილო...
- დაამთავრე?
- დიახ, კეისარო, რამე ხომ არ გამომრჩა?
- "გალების დამმარცხებელო" გამოგრჩა, მაგრამ მიპატიებია...
- მაპატიეთ, კეისარო, ყოველდღე ვვარჯიშობ, მაგრამ მაინც ვერ დავიზეპირე.
- არა უშავს... რა მოხდა ქვეყანაში ჩემს არყოფნაში?
- ხალხი იყო გამოსული, კეისარო...
- ეგ ვიცი, მერე?
- მერე, არაფერი - ლეგიონერებმა მიფანტ-მოფანტეს.
- ბევრნი იყვნენ?
- არა, და ვინც იყვნენ, იმათშიც ნახევარი ჩვენი ხალხი იყო.
- ყოჩაღ! შენა და, რაიმე შეთქმულება ხომ არ გამოგიმჟღავნებია?
- დიახ, კეისარო, მათ საუბარს იდუმალ იწერდა ჩვენი ჟამთააღმწერელი დუქან "რომულუსის ზღაპარში". დღესვე შევკრებთ ხალხს კოლიზეუმში და შევატყობინებთ.
- აბა, თქვენ იცით, ჩვეულებრივ, ერთი ასად გაბუქეთ, როგორმე გალებთან კავშირში დაადანაშაულეთ და რაც შეიძლება ხშირად უბურღეთ ტვინი ხალხს ამ ინფორმაციით.
- გასაგებია, კეისარო, ეგრე არ ვაკეთებთ სულ? მაგრამ ამ ბოლო დროს გალების შემოსევით დაშინება მაინცდამაინც აღარ ჭრის.
- სანამ გაჭრის, მანამდე გამოვიყენოთ, მერე სხვა რამეს მოვიფიქრებ.
- რა თქმა უნდა, მბრძანებელო, თქვენ ხომ გენიოსი ბრძანდებით!
- ძალიან კარგი. ბუნტის ხელმძღვანელები დააკავეთ?
- არა, რას ამბობთ, კეისარო, ესენი რომ დავაკავოთ, მერე სხვა ხელმძღვანელმა იქნებ უფრო მეტი ხალხი გამოიყვანოს...
- ჭკვიანი კაცი ხარ შენ, ახლა ისიც მითხარი, ხალხი რას ამბობს.
- ხალხს ვინ ჰკითხავს, კეისარო, მიეცი ხალხს პური და სანახაობა და ეგაა.
- ვაა, რა მაგარი სიტყვა თქვი! "პური და სანახაობა!" პური ხომ გვაქვს?
- გვაქვს, მაგრამ გაძვირდა ძალიან...
- მერე რა, სამაგიეროდ, ხაზინა შეივსება და სანახაობებს დავაფინანსებთ. ხიდი აშენდა? ხომ იცი, ერთი თვეა, არაფერი გამიხსნია.
- კი, აშენდა, მაგრამ ის ხიდი უკვე სამჯერ გახსენით, კეისარო, უხერხულია.
- შენ მე ჭკუას ნუ მასწავლი, 5-ჯერ შეიძლება გახსნა, მერეა უხერხული.
- რა სულელი ვარ, რა თქმა უნდა, 5-ჯერ შეიძლება გახსნა.
- სენატი რას შვრება? ეგენი ხომ არ იქნებიან წინააღმდეგი?
- სენატი წინააღმდეგი? შესანიშნავი იუმორი გაქვთ, კეისარო, სენატი მდუმარეა, ვითარცა წყალი და უმოძრაო, ვითარცა ქვა.
- ეგ ვიცი და ლეგიონი ხომ დაასაჩუქრეთ ხალხის დაშლისთვის?
- რა თქმა უნდა, თითო ქისა ოქრო დავურიგეთ, ვინც უფრო სასტიკი იყო, მათ - ორ-ორი ქისა.
- მუდამ მაქვს შენი იმედი, ჩემო ჭკვიანო ხელქვეითო! ბარემ ვაჭრების ამბებიც მითხარი და გამახარე.
- ო, ვაჭრები უკვე რასაც იშოვიან, შეხსენებაც არ სჭირდებათ, ისე შეაქვთ ხაზინაში. ვინც არ იხდის, ქარავანს ვაყოლებთ. გადასახადები ყველაფერზე დავაწესეთ, კეისარო, მათ შორის - გალიური სიმღერის მღერაზეც.
- ეგ რამ მოგაფიქრათ, სირცხვილია, ხელქვეითო.
- ფულს სუნი არა აქვს, კეისარო.
- ფულს სუნი არა აქვსო? რა კარგ სიტყვებს ამბობ ამ ბოლო დროს შენ! რაიმე ხომ არ გაქვს გულში?
- მხოლოდ თქვენი სიყვარული, კეისარო.
- მაგარი ვარ, რა, აბა, ერთხელ კიდევ შემახსენე, ვინ ვარ?
- უსათნოესო კეისარო, ფაქტობრივად, ღმერთო, რომისა და სამყაროს გამგებელო.
- გეყოფა, ჰო! მოგზაურების ნაკადმა ხომ მოიმატა?
- კი, მაგრამ...
- რა მაგრამ?
- არ გეწყინოთ, კეისარო და ბოლო დროს, იცით, რატომ ჩამოდიან?
- რატომ?
- აინტერესებთ, ხალხი მშიერიაო, ეკონომიკა, ხიდების აშენებას თუ არ ჩავთვლით, უკან მიდისო და მაინც როგორ უჭერს ხალხი მხარს კეისარსო.
- მერე?
- მერე, კეისარო, თქვენ სანახავად ჩამოდიან მოგზაურები, ახლოს გვინდა ვნახოთ ეს სასწაული კაციო. ერთი იდეა მაქვს - ამაზე გადასახადი რომ დავაწესოთ, კეისარო?
- გადასახადი ჩემს შეხედვაზე? კარგი აზრია, მაგრამ როგორ?
- როგორ და თქვენი ფეხების დანახვა - ერთი დინარი, ტანისა და ხელებისა - ორი, მთლიანად დანახვა - 5 დინარი, როგორია?
- ბრწყინვალე აზრია, 10-პროცენტიან წილში იქნები!
- დიდი მადლობა, ჩემო ღმერთო!
- მხოლოდ ღმერთო?
- უსათნოესო, რომისა და სამყაროს გამგებელო.
- ჭკვიანი კაცი ხარ შენ, მაგრამ ერთი ეს მითხარი, ამ ხანჯლით რატომ შემოდიხარ ჩემთან, ხომ იცი, იარაღით არ შეიძლება აქ შემოსვლა.
- ეს ისე მაქვს... ლამაზად გამოვიყურები ასე...
- კარგი, წადი, ჩემო ბრუტუს...