ახალაია ალასანიას დაემუქრა
22-07-2013
ახალაია ალასანიას დაემუქრა
ყოფილი თავდაცვის მინისტრი მოქმედს კორუფციაში სდებს ბრალს და პასუხის მოთხოვნით ემუქრება

"მატროსოვის" ციხეში ბრალდებულის სტატუსით მყოფმა ყოფილმა თავდაცვის მინისტრმა ბაჩანა ახალაიამ მოქმედი თავდაცვის მინისტრი ირაკლი ალასანია კორუფციასა და ქართული ჯარის დანგრევაში დაადანაშაულა.

ყოველ შემთხვევაში, ახალაიას "ფეისბუკის" ოფიციალურ ვებგვერდზე სწორედ ამ სახის ბრალდებები გამოქვეყნდა, რომელშიც ნათქვამია (სტილი დაცულია): "ალასანიამ ააწყო კორუფციაზე დაფუძნებული სისტემა, ტენდერებში გაამარჯვებინა მის საახლობლოს კანონის უხეში დარღვევებით. სწორედ ამიტომ ცხრა თვის მანძილზე რამდენჯერმე მოიწამლა ასობით ჯარისკაცი გაფუჭებული საკვების
მიღებით".
როგორც ჩანს, ახალაიას "ფეისბუკის" ოფიციალურ ვებგვერდზე ამ ბრალდებების გამოჩენა უკავშირდება 15 ივლისს თავდაცვის მინისტრ ალასანიას მიერ პრესკონფერენციაზე გაკეთებულ მინიშნებას გაერთიანებული შტაბის ყოფილი უფროსის, გიგი კალანდაძის მისამართით, რომ ახალაიას მინისტრობისას მაღალჩინოსანმა სამხედროებმა ჯარის ბიუჯეტის ხარჯზე სახლები აიშენეს და კეთილმოაწყვეს.

ძალზე საინტერესო ვითარებაა - ნაცვლად იმისა,
მოქმედმა თავდაცვის მინისტრმა სრულყოფილად აამუშაოს სამინისტროს გენერალური ინსპექცია, სამხედრო პოლიცია და ობიექტურად და პროფესიონალურად გამოიძიონ ბაჩო ახალაიას სამწლიანი მინისტრობის დროინდელი შესაძლო კორუფციის ფაქტები, თავად არიან კორუფციაში დადანაშაულებული.

მართალია, ბაჩო ახალაია პატიმარია, მაგრამ მისი გუნდის ბირთვი გარეთაა (მიმალულების ჩათვლით) და უფრო მეტიც, ამ გუნდის არცთუ ისე მცირერიცხოვანი ნაწილი ჯერ კიდევ მუშაობს როგორც თავდაცვის სამინისტროში, ისე გაერთიანებულ შტაბში, სახმელეთო ძალებსა და ბრიგადებში. მათგან (განსაკუთრებით კი სენაკისა და ვაზიანის ბრიგადებიდან) ბაჩო ახალაიას "მატროსოვის" საკანშიც მისდის ინფორმაცია, თუ რა ხდება ქართულ არმიაში და ამიტომაც მისი ბრალდებები სულაც არ არის ხელწამოსაკრავი, მათ გაანალიზება სჭირდება.

მანამდე კი, სანამ ეს ყბადაღებული კოაბიტაცია მიმდინარეობს, ბიძინა ივანიშვილის მთავრობა კიდევ ბევრ ბრალდებას მოისმენს, რომელთა ფონზე ნელ-ნელა მიიჩქმალება ის მძიმე დანაშაულები (გინდ შეიარაღებულ ძალებში, გინდ მთელ ქვეყანაში), რასაც 9 წლის განმავლობაში "ნაციონალური მოძრაობის" ხელისუფლების წარმომადგენლები სჩადიოდნენ.
ვიქტორი
24 ივლისი 2013 21:33
ახალაია როცა ჯარისკაცების მოწამვლაზე საუბრობს, გაიხსენოსრამდენჯერ მოიწამლენ ჯარისკაცები მე~4 ბრიგადიდან მისი მინისტრობის დროს და მისი ლეკვები როგორფარცხავდნენ მერე ამ საქმეებს კალანდაძე და ძმანი მისნი. ეტყობა ახალაია თავის თავდაცვის მინისტრობის დროინდელ ფაქტებს ახლანდელ მინისტრს აბრალებს. და ბოლოსბაჩო შენი ........
ირაკლი
24 ივლისი 2013 10:38
ჯარში კიდე ბევრი რომ არის მოსაცილებელი ამას ვეთანხმები, მაგრამ ერთ დღეში და თუნდაც 1 წელში ყველას რომ ვერ მოიცილებ ესეც ფაქტია. ის რომ ჯარისკაციბისადმი მიდგომა სასიკეთოთ შეიცვალა ეს ჯარისკაცებისგან შეგიძლიათ გაიგოთ, არ არის ძნელი. ის რომ ვეტერანებს აღარ დასცინიან და ყოველ შემთხვევაში ცდილობენ რომ დაეხმარონ ესეც ვეტერანებისგან შეგიძლიათ გაიგოთ. მე სტატიის პათოსი უფრო მიკვირს, თქვე დალოცვილებო ის რაზეც ეჭვი გაქვთ ძალიან ადვილი გასაქარწყლებელია, მიდით ჯარში, დაელაპარაკეთ ჯარისკაცებს, ასე ძნელია? ბრმაც დაინახავს რომ ქართული ჯარი უკეთესობისკენ მიდის. ტენდერებში გამარჯვებაზე, ახლობლების მფარველობაზე და ა.შ. მართლა არაფერი შემიმჩნევია მე და კიდე უფრო კომიკურია როდესაც ეს ბრალდება ახალაიასგან მოდის.
TOT
23 ივლისი 2013 22:09
მარეხი
სწორი ბრძანდებით, ეს უსინდისო, აღვირახსილი და სინანულს არმქონე ახალგაზრდების პლეადა, დიდი ხნით უნდა ჩამოშორდეს საზოგადოებას. არ არსებობს სიბინძურე და უზნეობა, რომელიც მათ არ ეკეთებინოს. სხვისი დადანაშაულება კორუფციაში, როდესაც, თვითონ, ყველა სახის თაღლითური სქემების გამოყენებით ჩვენივე წვალებით შევსებული ბიუჯეტიდან უზარმაზარ თანხებს ფლანგავდნენ, მათი უპირველესი თვისების - ცინიზმის კიდევ ერთი დადასტურებაა. მაგალითისათვის, ჩვენი ქალაქის თაღლითი მერი უგულავაც საკმარისია. ყველასთვის ნათელია, რომ უნდა იჯდეს, მაგრამ ხელს არ ახლებენ ( იმედია დროებით).

რედაქტორის რჩევით