"წითელი დროშები" ქართულ ცასაც გააკონტროლებენ
30-09-2013
"წითელი დროშები" ქართულ ცასაც გააკონტროლებენ
თურქებს ჩინური HQ-9-ებით მთელი სომხეთის, თვითაღიარებული მთიანი ყარაბაღისა და საქართველოს ცის გაკონტროლების საშუალება ეძლევათ...

26 სექტემბერს თურქეთმა მიიღო ისტორიული გადაწყვეტილება, რომლის წყალობით მისი სამხედრო შესაძლებლობები ერთი-ორად გაიზრდება. კერძოდ, თურქმა სამხედროებმა მრავალწლიანი ტენდერის გამარჯვებულად ჩინური წარმოების შორი მოქმედების საზენიტო-სარაკეტო სისტემები HQ-9-ები გამოაცხადა.
ჩინურად ამ სისტემას "ჰუნცი-9" ჰქვია, რაც ქართულად "წითელი დროშა-9"-ს ნიშნავს და იგი განკუთვნილია მოწინააღმდეგის თვითმფრინავების, ფრთოსანი რაკეტებისა და შვეულმფრენების ჩამოსაგდებად, ასევე "მიწა-მიწა" კლასის ტაქტიკური დანიშნულების ბალისტიკური რაკეტების დასაზიანებლად.

ეს
ჩინური, მესამე თაობის ყველაზე სრულყოფილი სისტემაა და მისი შექმნა გასული საუკუნის 90-იანი წლების ბოლოს დაიწყო, მას შემდეგ, რაც პეკინმა 1993 წელს რუსეთისგან  С-300 ПМУ-1 ტიპის საზენიტო-სარაკეტო სისტემები შეიძინა. უდავოა, რომ ჩინელმა ინჟინრებმა რუსული С-300-ის ღრმა კლონირება განახორციელეს, რაზეც ვიზუალური მსგავსებაც მეტყველებს.

2008 წელს, რაც ანკარამ
შორი მოქმედების საზენიტო-სარაკეტო სისტემების შეძენაზე ღია ტენდერი გამოაცხადა, ჩინეთმა თურქეთს HQ-9-ის საექსპორტო ვარიანტი FD-2000 შესთავაზა.

მას შემდეგ თურქეთი ხუთი წელი ფიქრობდა, რომელ სისტემაზე გაეკეთებინა არჩევანი. ტენდერში ჩინური HQ-9-ს გარდა რუსული С-300ВМ-ი, ამერიკული Patriot Pac-3-ი და ფრანგული Aster-30-იც მონაწილეობდნენ.
თურქულ მხარეს განსაზღვრული ჰქონდა საზენიტო-სარაკეტო სისტემების არანაკლებ 12 დივიზიონის შესყიდვა, თუმცა 4 მლრდ დოლარზე მეტის დახარჯვას არ აპირებდა.

შეიძლება სწორედ ფინანსების დაზოგვა იქცა გადამწყვეტად ჩინური სისტემების არჩევისას, რადგან პეკინი ანკარას თავისი HQ-9-ის დივიზიონებს კონკურენტებზე იაფად - მხოლოდ 3 მლრდ დოლარად სთავაზობდა.
ჩინური HQ-9-ის ერთ საზენიტო-სარაკეტო დივიზიონში გაერთიანებულია მართვის ერთი ოცეული და სამი სასტარტო ბატარეა, ოთხი რადიოლოკატორი, 12 სატრანსპორტო-დამტენი მანქანა. თითოეულ დანადგარს ოთხი საზენიტო რაკეტის გაშვება შეუძლია. 9 მ სიგრძისა და 2 ტონა მასის საზენიტო რაკეტა მაქსიმალურ 200 კმ სიშორეზე მიფრინავს, მას 30 კმ სიმაღლემდე შეუძლია საჰაერო სამიზნის დაზიანება.

თურქებს ჩინური HQ-9-ებით 200 კმ-ის რადიუსში შეუძლიათ გააკონტროლონ შავი ზღვის აკვატორია, ხოლო ხოფიდან ეს რაკეტები გუდაუთამდეც აღწევს. უშუალოდ სომხეთის საზღვრის სიახლოვეს HQ-9-ების განთავსების შემთხვევაში ანკარას საშუალება ეძლევა, დღედაღამ უყუროს, რა ხდება როგორც მთლიანად სომხეთის, ასევე თვითაღიარებული მთიანი ყარაბაღის თავზე.

ერთადერთი კახეთის აღმოსავლეთი ნაწილია, სადამდეც თურქულ-ჩინური საზენიტო სისტემების რადიოლოკატორების ტალღები ვერ მისწვდება.

თუკი გავიხსენებთ, რომ დღეს შორი მოქმედების საზენიტო-სარაკეტო სისტემები (რუსული ჩ-300-ების მოდიფიკაციები და ჩინური HQ-9-ები) დგას ყველგან - ოკუპირებულ აფხაზეთში, სომხეთში, თვითაღიარებულ მთიან  ყარაბაღში, აზერბაიჯანში და მალე გამოჩნდება თურქეთშიც, მთელ რეგიონში მხოლოდ საქართველოს არაოკუპირებული ტერიტორია რჩება, სადაც შორი მოქმედების საზენიტო-სარაკეტო სისტემები არ გაგვაჩნია.

P.S. ტენდერის პერიოდში  NATO-ს ხელმძღვანელობა აფრთხილებდა თურქეთის მთავრობას, რომ მათ არჩევანი არ გაეკეთებინათ არც რუსულ С-300-ებსა და არც ჩინურ HQ-9-ებზე. წინააღმდეგ შემთხვევაში, ალიანსის შტაბში აცხადებდნენ, რომ ამ სისტემებს არ ჩართავდნენ  NATO-ს საჰაერო კონტროლისა და საჰაერო თავდაცვის ერთიან სისტემაში.

ალიანსის ერთ-ერთმა ძლიერმა წევრმა - თურქეთმა - არ დაუჯერა NATO-ს ხელმძღვანელობას და მაინც ჩინური სისტემები აირჩია. დაველოდოთ, როგორ განვითარდება მოვლენები.
ვალერი
16 დეკემბერი 2013 23:59
ასეთი სისტემების ქონაზე ჩვენთვის ოცნებაც კი ადრეა ისევ ებრაულ spyder-ზე ვიფიქროთ ჯობია. თურქების იმედი არ მაქვს თუ ჩვენ არ მივხედეთ თავს არავინ დაგვიცავს. patriot pac-3 ჯობია HQ-9-ს ჩემი აზრით
Giosait
11 ოქტომბერი 2013 12:31
რთულია მურადს არ დავეთანხმო :(( გვჩაგრავენ იავნად და ეს მაცოფებს !!!!!!!!
muradi
01 ოქტომბერი 2013 00:57
ყველაზე სუსტი და უსუსური ქვეყანა ვართ

რედაქტორის რჩევით
 როგორ აფასებთ ნათია თურნავას დანიშვნას ეკონომიკისა და მდგრადი განვითარების მინისტრის პოსტზე?
თქვენი აზრი მნიშვნელოვანია!
როგორ აფასებთ ნათია თურნავას დანიშვნას ეკონომიკისა და მდგრადი განვითარების მინისტრის პოსტზე?
თვის კითხვადი სტატიები