შუა აზიაში ომი იწყება?
ყირგიზეთი რუსეთს ჯარის შეყვანას ეხვეწება...
შაბათს, 12 ივნისს, როდესაც ეს სტატია იწერებოდა, ქ. ოშში უზბეკებით დასახლებული უბნების დარბევა მიმდინარეობდა. წინადღეს ყირგიზებსა და უზბეკებს შორის შეიარაღებული შეტაკების შედეგად, 800 კაცი დაშავდა, 62 კი დაიღუპა. ქალაქში ისმოდა ავტომატების კაკანი, საარტილერიო სისტემების ბათქაბუთქი.
ჩანს, სიტუაცია ძალზე მძაფრდება, რაც, შეიძლება, ყირგიზეთ-უზბეკეთის ნამდვილ ფართომასშტაბიან ომში გადაიზარდოს.
ქ. ოში ყირგიზეთის დედაქალაქ ბიშკეკიდან პირდაპირი ხაზით 300 კმ-ითაა დაშორებული, ხოლო უზბეკეთ-ყირგიზეთის საზღვრიდან 6-ოდე კმ თუ აშორებს.
ეს კი იმას ნიშნავს, რომ უზბეკები შეიძლება თანამემამულეთა დასახმარებლად დაიძრან და გაარღვიონ უზბეკეთ-ყირგიზეთის სახელმწიფო საზღვარი...
ნუთუ ყირგიზეთში მომხდარი სახელმწიფო გადატრიალების მთავარი მიზანი ამ ქვეყანაში რუსეთის დამატებითი სამხედრო დანაყოფების შეყვანა იყო?
სხვანაირად ვერც იფიქრებ, რადგან ყირგიზეთის მთავრობა კრემლს ეხვეწება, ჯარები შემოიყვანე, რათა რუსმა "ცისფერჩაფხუტიანებმა" ჩააცხრონ ოშის ოლქში ყირგიზებსა და უზბეკებს შორის შესაძლებელი ომიო.