ტრამპმა ქართველებს მოგვბაძა... იძულებით
ტრამპმა ქართველებს მოგვბაძა... იძულებით
ფოტო:პრეზიდენტი ტრამპი აბრაამ ლინკოლნის მემორიალის წინ "აბრამსებისა" და "ბრედლების" უძრავად დგომას იძულებით დაჰყაბულდა...
აშშ-ის დამოუკიდებლობის დღის აღნიშვნისას ვაშინგტონში 28-წლიანი პაუზის შემდეგ პირველად გამოჩნდა ამერიკული არმიის მძიმე ჯავშანტექნიკა - "აბრამსის" ტანკები და "ბრედლის" ტიპის ქვეითთა საბრძოლო მანქანები.

აღლუმი ვაშინგტონში ბოლოს 1991 წელს ჩატარდა სადამ ჰუსეინზე გამარჯვების აღსანიშნავად და დედაქალაქის ქუჩებში ომში მონაწილე საბრძოლო ტექნიკამ ჩაიარა.

პრეზიდენტად არჩევის შემდეგ დონალდ ტრამპს ძალიან უნდოდა, რომ ვაშინგტონის ცენტრში ისეთივე აღლუმი ჩაეტარებინა, როგორსაც ფრანგები ელისეს მინდვრებზე, ხოლო რუსები წითელ მოედანზე ატარებენ, მაგრამ საბოლოოდ ისეთი გამოუვიდა, როგორსაც ქართველები თავისუფლების
მოედანზე ვაწყობთ.

საპროტესტო აქციებმა პრეზიდენტ ტრამპს საშუალება არ მისცა ვაშინგტონის ცენტრში 65-ტონიანი "აბრამსები" თავიანთი სვლით ჩაეტარებინა, რაც ბოლოს მოუღებდა ასფალტსა და სხვა კომუნიკაციებს. ამიტომაც კომპრომისულ ვარიანტს დაჰყაბულდა - აბრაამ­ ლინკოლნის მემორიალთან ორ-ორი "აბრამსი" და "ბრედლი", ასევე მეორე მსოფლიო ომისდროინდელი ლეგენდარული ტანკი "შერმანი" ჩაამწკრივეს. ეს ტექნიკა
აღლუმის ადგილამდე უნაგირა-გამწევებით მიიტანეს და ასფალტი დაზიანებას გადაარჩინეს.

ჩვენს მკითხველს ამის წარმოდგენა არ გაუჭირდება, რადგან 2017 წლის 26 მაისს თავისუფლების მოედანზე ქართული არმიის საბრძოლო ტექნიკასთან ერთად გამოფენილი იყო ამერიკული "აბრამსიცა" და "ბრედლიც", რომლებიც იმ დროისთვის ვაზიანის პოლიგონზე საერთაშორისო სამხედრო სწავლებაში მონაწილე ამერიკული არმიის დანაყოფს ეკუთვნოდა. ეს მძიმე საბრძოლო ტექნიკაც ვაზიანიდან თავისუფლების მოედანზე უნაგირა-გამწევებით მიიტანეს, რამაც თბილისის ქუჩების ასფალტის საფარი გადაარჩინა.

მართალია, პუტინივით ტანკები ვერ ჩაახრიგინა ტრამპმა, მაგრამ გული მაინც იჯერა, როდესაც ვაშინგტონს დაბალ სიმაღლეზე სტრატეგიულმა ბომბდამშენებმა, გამანადგურებელმა თვითმფრინავებმა და საბრძოლო შვეულმფრენებმა გადაუფრინეს.

ისე, ხანდახან ამა თუ იმ ქვეყნის პირველი პირი ბავშვივით იქცევა - არმია სათამაშო ჰგონია მისი ტანკებით, თვითმფრინავებითა თუ საზღვაო ხომალდებით...

P.S. ამერიკელი საზოგადოების ნაწილმა პრეზიდენტ ტრამპს აბრაამ ლინკოლნის მემორიალის წინ გამოფენილი "აბრამსებისა" და "ბრედლების" დაჟანგული დეტალები დაუწუნა, არადა, სანამ პუტინის წინ წითელ მოედანზე რუსული ტანკები ჩაივლიან, მათ შამპუნით რეცხავენ...

P.S.S. ამერიკელებამდე ერთი დღით ადრე დამოუკიდებლობის დღე ბელორუსმა აღნიშნა და პრეზიდენტი ლუკაშენკო ამაყად გადაჰყურებდა მის წინ ჩავლილ ათობით ჯავშანტექნიკას, თუმცა ტრაგიკულ ინციდენტს ვერ გადაურჩნენ - ფეიერვერკის დროს აფეთქება მოხდა და ნამსხვრევებმა ერთი ქალი იმსხვერპლა, რამდენიმე კი დაიჭრა.
გვარი
27 აგვისტო 2019 16:03
თენგიზ გეთანხმებით, ყველაფერს აკეთებს თავისი ქვეყნისთვის და მიზნის მიღწევაში, თუ ვინმე ხელის შეშლას ცდილობს, ხისტად პასუხობს და თავის ადგილს მიუჩენს.
თენგიზს
23 აგვისტო 2019 14:26
არფიქრობ რომ როდესაც მსოფლიოს წამყვანი მთავარი ქვეყანა ხარ, ეგოისტური დღის წესრიგით ძალიან მარტივია იზრუნო მარტო საკუთარ თავზე!?ტრამპის პოლიტიკა ძალიან ეგოისტურია და გაუბედავი,ტრამპი და მისი ადმინისტრაცია გავსს ბავშვს რომელიც ბაქიბუქობს იმ ბავშვებთან ვინც დააშინა ბაქიაობით,ხოლო როცა სხვა ბავშვი მას გამოიწვევს უცებ ჩუმდება და სხვა ბავშვებთან გარბის საბაქიბუქოდ,სუპერსახეკმწიფოს ლიდერი რომელიც ამ რესურსებს კეტავს ერთ სივრცეში ძალიან მარტივია მსგავსი შედეგების ჩვენება,უფრო ძნელია მოიქცე პასუხისმგებლობიანად მსოფლიოში სადაც უკვე ორმაგი სტანდარტების თამაშისათვის მოკავშირეებიც კი დააზარალე და საერთოდ არ განაღვლ;ებს მათი ბდგომარეობა.
თენგიზ
27 ივლისი 2019 21:25
ტრამპი უკვე შევიდა ისტორიაში როგორც ერთ-ერთი ბრწყინვალე პრეზიდენტი. ის არის პირველი, ვინც ყველა თავისი დაპირება ან შეასრულა ან შესრულების პროცესშია. ეკონომიკა არნახულ სიმაღლეებს მიაღწია, უმუშევრობა ისტორიულ მინიმუმს, ქალების დასაქმება ყველაზე მაღალია ისტორიულად, ისევე როგორც შავებისა და ლათინოსების დასაქმება. გადასახადები მნიშვნელოვნად შეამცირა და ბიძგი მისცა ბიზნესის განვითარებას, ხელი შეუწყო ამერიკული კომპანიების ამერიკაში დაბრუნებას, სამედიცინო ტექნოლოგიების განვითარებას, წამლების ფასის შემცირებას, რეგენერაციული მედიცინის განვითარებას, ობამას მტრული და საზიანო კანონების გაუქმებას და უამრავი სხვა. მისი კედლის აშენება მექსიკის საზღვარზე არის სწორი. იქიდან შემოდის ნარკოტრაფიკი, კრიმინალი, დაავადებები და ბევრი სხვა უბედურება. ამერიკას უჯდება ამ არალეგალების გადმოსვლა და მათთან დაკავშირებული პრობლემები 1 მილიარდი დოლარი ყოველდღიურად. ტრამპა პირველად გადასცა უაღრესად მნიშვნელოვანი იარაღი საქართველოს და უკრაინას და კიდევ მეტს გააკეთებს ამ მოძმე ქვეყნებისთვის. ვილოცოთ ტრამპისთვის.

რუბრიკის სხვა სიახლეები
საერთო ჯამში როგორ შეაფასებთ სამთავრობო ცვლილებებს?
თქვენი აზრი მნიშვნელოვანია!
საერთო ჯამში როგორ შეაფასებთ სამთავრობო ცვლილებებს?