აღიარებინებენ თუ არა კრემლს საუკუნის დანაშაულს?
აღიარებინებენ თუ არა კრემლს საუკუნის დანაშაულს?
"9 მარტს ჰააგაში დაიწყო სასამართლო პროცესი, რომელმაც უკრაინის ცაში მალაიზიური "ბოინგის" ჩამოგდებასა და 298 ადამიანის დაღუპვაში დამნაშავეები უნდა გამოავლინოს..."

"კვირის პალიტრის" ამ ნომრის გამოსვლის დღეს, 9 მარტს, ნიდერლანდებში, ჰააგაში იწყება სასამართლო პროცესი, რომელიც 2014 წლის 17 ივლისს უკრაინის საჰაერო სივრცეში მალაიზიური სამგზავრო "ბოინგის" ჩამოგდების "საუკუნის დანაშაულად" შეფასებულ საქმეს განიხილავს.
ერთობლივმა საერთაშორისო საგამოძიებო ჯგუფმა (რომლის წევრები არიან გამომძიებლები ნიდერლანდებიდან, ბელგიიდან, ავსტრალიიდან და უკრაინიდან) თითქმის ექვსი წლის განმავლობაში დიდი მოცულობის საგამოძიებო და
საექსპერტო სამუშაოები ჩაატარა და გამოაქვეყნა საბოლოო დასკვნა, რომლის თანახმად, უკრაინის ცაში სამგზავრო "ბოინგი" ჩამოაგდო რუსეთიდან დონბასში მალულად გადაყვანილმა რუსეთის შეიარაღებული ძალების კურსკის 53-ე საზენიტო-სარაკეტო ბრიგადის კუთვნილი საზენიტო-სარაკეტო დანადგარის, "ბუკის", ეკიპაჟმა ერთი საზენიტო რაკეტის გასროლით, რის შემდეგაც "ბუკი" ეკიპაჟითურთ სასწრაფოდ დააბრუნეს რუსეთის ტერიტორიაზე.

საგამოძიებო ჯგუფმა, რომელშიც
არის ასი გამომძიებელი და ორასამდე ექსპერტი, ამ წლების განმავლობაში შეაგროვა ჩამოგდებული "ბოინგის" 1 448 ფრაგმენტი, გააანალიზა ნახევარ მილიონამდე ფოტო და ვიდეომასალა, მათ შორის - ინტერნეტში მოპოვებული, 60-ჯერ მიიღო სხვადასხვა ქვეყნის დაზვერვის სამსახურების კონფიდენციალური ინფორმაცია, დაჰკითხა 200-მდე მოწმე, გაშიფრა 150 ათასამდე სატელეფონო საუბარი;

ჯგუფმა დაასახელა ოთხი ეჭვმიტანილის გვარი (სამი რუსეთის და ერთი უკრაინის მოქალაქე), რომლებიც ხელმძღვანელობდნენ რუსული "ბუკის" უკრაინის ტერიტორიაზე შეყვანა-გამოყვანის ფარულ პროცესს. გარდა ამისა, გამოძიებას აქვს არანაკლებ 13 თვითმხილველის ჩვენებები, რომლებიც შეესწრნენ რუსული "ბუკიდან" საზენიტო რაკეტის გაშვების ფაქტს. ეს ჩვენებები აქამდე საიდუმლოდ ინახებოდა და ისინი პირველად სასამართლო პროცესზე გამჟღავნდება.

რუსეთმა, რა თქმა უნდა, არ აღიარა ეს ბრალდება, უამრავი მცდარი ვერსიის გავრცელება დაიწყო და გაეროს უშიშროების საბჭოს რეზოლუციებიც დაბლოკა.

სიმართლის დასადგენ ერთადერთ გზად ღია სასამართლო პროცესი რჩებოდა და აი, ისიც დაიწყო.

სასამართლო ტარდება ჰააგიდან 50 კმ-ში მდებარე სხიპჰოლში, იმ აეროპორტის სიახლოვეს, საიდანაც ბოლოს აფრინდა მალაიზიური "ბოინგი".
სასამართლო პროცესი 25 კვირა გაგრძელდება და მას სამი ნიდერლანდელი მოსამართლე გაუძღვება, თუმცა სასამართლოზე ეჭვმიტანილთა გამოძახებას არ აპირებენ, რადგან რუსეთის ფედერაციის კანონი ამას არ დაუშვებს; მათ დაკითხვას ვიდეოკავშირით ეცდებიან.

ეს სასამართლო პროცესი უდავოდ იქცევა მსოფლიოს ერთ-ერთ ყველაზე მნიშვნელოვან მოვლენად, რადგან თუკი ასობით უდანაშაულო ადამიანის დაღუპვაში კრემლის ბრალეულობა დამტკიცდა, იქნებ საერთაშორისო საზოგადოებას ჩვენი ძველი ტკივილიც გავახსენოთ, როცა აფხაზეთის ომის ბოლოს, 1993 წლის 20-23 სექტემბერს, აფხაზმა სეპარატისტებმა რუსი სამხედროების დახმარებით ბაბუშერის აეროპორტთან ორი სამგზავრო თვითმფრინავი ჩამოგვიგდეს, სამი უშუალოდ აეროდრომზე დაწვეს, რასაც 136 მგზავრი ემსხვერპლა, ამისთვის კი დღემდე არავინ დასჯილა.

...
14 მარტი 2020 11:43
რა იცი, რომ კრემლისაა, პროკლოვ?!
მაიას
14 მარტი 2020 01:06
მაია, მაგ ხალხს რუსეთი უფრო უყვარს ვიდრე საკუთარი ქვეყანა. მათ ვერ წარმოუდგენიათ საქრთველოს არსებობა როგორც დამოუკიდებელი სახელმწიფო და ზუსტად ამიტომაც აბრალებენ თავიანთ ქვეყანას ომის დაწყებას.
მაია
13 მარტი 2020 11:21
აი ამ ყველაფრის მერე, ყველაფერს რომ კადრულობს რუსეთი, ვინმე კიდევ რომ იტყვის: აგვისტოს ომი საქართველომ დაიწყოო, მოღალატეა ერის.

რუბრიკის სხვა სიახლეები
თქვენი აზრით, ეპიდსიტუაციიდან გამომდინარე, უნდა შეეძლოს თუ არა ხელისუფლებას საგანგებო მდგომარეობის გამოცხადების გარეშე შეზღუდვების დაწესება?
თქვენი აზრი მნიშვნელოვანია!
თქვენი აზრით, ეპიდსიტუაციიდან გამომდინარე, უნდა შეეძლოს თუ არა ხელისუფლებას საგანგებო მდგომარეობის გამოცხადების გარეშე შეზღუდვების დაწესება?
დღის კითხვადი სტატიები
თვის კითხვადი სტატიები