პა-სპორტი: მანუჩარ მარკოიშვილი
22-04-2013
პა-სპორტი: მანუჩარ მარკოიშვილი
- კალათბურთელი რომ არა, ვინ იქნებოდი?
- მოცეკვავე... სანამ კალათბურთში ვარჯიშს დავიწყებდი, ცეკვის სტუდიაში ვსწავლობდი და კალათბურთის თამაშით გატაცება რომ არა, ალბათ, პროფესიულად გავყვებოდი ცეკვას.

- გამოდის, ბავშვობაში შენი ოცნებები მხოლოდ ცეკვასა და კალათბურთს უკავშირდებოდა?
- ბავშვობის ოცნება იყო, NBA-ში მეთამაშა და ბევრი მემოგზაურა...

- ოჯახის წევრები გაგვაცანი...
- ჩემი მეუღლე, ანჟელა ნიკიტინა უკრაინელია. ორი წლის განმავლობაში კიევის კლუბში ვთამაშობდი
და მაშინ გავიცანი. ოჯახის დანარჩენი წევრები არიან მშობლები - ნუგზარი და ლია, ჩემი ძმა გიორგი, რომელიც ასევე კალათბურთელია და მისი ცოლ-შვილი: ანი, ნიკოლოზი და საბა.

- რის ან ვის გარეშე ვერ წარმოგიდგენია ცხოვრება?

- ოჯახის წევრებისა და მეგობრების გარეშე.

- ნივთი, რომლის გარეშეც სახლიდან არ გადიხარ...
- მობილური ტელეფონი და საფულე.

- ფრაზა ან სიტყვა,
რომელსაც ყველაზე ხშირად ამბობ...

- მგონი, ასეთი სიტყვა არ არსებობს... ან ახლა არ მახსენდება.

- ჰოროსკოპთან როგორი დამოკიდებულება გაქვს?
- ჰოროსკოპით ღრიანკალი ვარ, თუმცა, ასეთი რაღაცების არ მჯერა.

- უცნაური თვისება თუ გაქვს?
- ვარჯიშის შემდეგ, სანამ არ დავნაყრდები, ცუდ ხასიათზე ვარ და ლაპარაკიც არ მიყვარს. :)

- ადამიანი, რომელმაც შენზე ყველაზე დიდი შთაბეჭდილება მოახდინა...
- განსაკუთრებულს ვერავის ვიხსენებ... ალბათ, ჯერ არ შემხვედრია ასეთი გამორჩეული პიროვნება. :)

- ქვეყანა, სადაც იცხოვრებდი...
- საქართველოს გარდა? იტალიასა და სლოვენიაში. ამ ქვეყნებში სამ-სამი წელიწადი ვიცხოვრე და, ალბათ, ამის გამო. :)

- საყვარელი წიგნი, რეჟისორი, მუსიკოსი...
- საყვარელი წიგნი "დათა თუთაშხია". გამორჩეულად არც ერთი რეჟისორი არ მიყვარს. მუსიკოსებიდან ბარი უაითი, ვასკო როსი... თუმცა, შემიძლია, ნებისმიერი ჟანრის მუსიკას მოვუსმინო - გააჩნია, როგორ ხასიათზე ვარ...

- კალათბურთის გარდა, რა გიყვარს?
- სპორტის სხვა სახეობებსაც ვუყურებ, თევზაობაც მიყვარს, თუმცა, ამის დრო იშვიათად მაქვს. დროის გაყვანის საუკეთესო საშუალებად კი კინო მიმაჩნია. :)

- რა გაღიზიანებს ყველაზე მეტად?
- ტყუილი და თვალთმაქცობა.

- მატჩი, რომლითაც ყველაზე მეტად ამაყობ...
- არ მიყვარს თავის მოწონება ჩემ მიერ ჩატარებული მატჩებით. მით უმეტეს, საკუთარი თავით...

- სოციალური ქსელით ხშირად სარგებლობ?
- Facebook-საც და Twitter-საც ხშირად ვიყენებ. თუმცა, პოსტების წერა არ მიყვარს - ძირითადად, სიახლეებს ვეცნობი და მეგობრების ფოტოებს ვათვალიერებ.

- დაახასიათე საკუთარი თავი ერთი სიტყვით...
- სპორტსმენი. :)

- სახალისო სიტუაციაში ბევრჯერ აღმოჩენილხარ?
- კურიოზების გახსენება ჩემი სუსტი წერტილია. :) იმიტომ არა, რომ ხუმრობა არ მიყვარს ან იუმორის გრძნობა არა მაქვს, უბრალოდ, მეხსიერება არ მივარგა. :):)

- იდეალური ქალი შენთვის არის...
- ჩემი მეუღლე.

- დაასრულე ფრაზა: "მჯერა, რომ"...
- ...ყველაფერი კარგად იქნება.

- შენი საყვარელი სპორტსმენი...
- მაიკლ ჯორდანი, მანუ ჯინობილი.

- მეტსახელი თუ გაქვს?
- მანუ.

- პერსონაჟი, რომელსაც ყველაზე მეტად გამსგავსებენ...
- წარმოდგენა არა მაქვს. :)

რედაქტორის რჩევით