პა-სპორტი: ”ხიზანა”
- ფეხბურთელი რომ არა, ვინ იქნებოდი?
- არშემდგარი ფეხბურთელი. :) ან - "ძალით ეკონომისტი". :):)
- ბავშვობაში რაზე ოცნებობდი?
- როგორც ყველა ბავშვი - კოსმოსში გაფრენაზე. :)
- მამაშენს - ნოდარ ხიზანიშვილს ფეხბურთის ყველა მოყვარული იცნობს. ოჯახის დანარჩენი წევრები გაგვაცანი...
- დედა - ბაია კალმახელიძე, ძმა - გიორგი და ტყუპი დები - ნინო და მარიამი. მყავს მეუღლე სალომე ღვინიაშვილი და სამი შვილი - დათუნა, ტასუნა და ნიტა...
- რის გარეშე ვერ წარმოგიდგენია ცხოვრება?
- ოჯახის და, რა თქმა უნდა, ფეხბურთის გარეშე.
- ნივთი, რომლის გარეშეც სახლიდან არ გადიხარ...
- გულსაკიდი ჯვარი, რომელსაც მხოლოდ თამაშის დროს ვიხსნი.
- ფრაზა ან სიტყვა, რომელსაც ყველაზე ხშირად ამბობ...
- "გენაცვალე" და "შეჩემა". :)
- უცნაური თვისება თუ გაქვს?
- როცა ქუჩაში მესალმებიან და მეხუტებიან, მეც ისე გულიანად გადავეხვევი ხოლმე, თავადაც ვიჯერებ, რომ ვიცანი. :) ერთ-ერთმა ასეთმა "ნაცნობმა" მკითხა, ხომ გახსოვარო. როცა დავეთანხმე, აბა, საიდანო? აი, მაშინ "დამერხა". :):)
- ადამიანი, რომელმაც ყველაზე დიდი შთაბეჭდილება მოახდინა შენზე...
- ბავშვობაში მამა ხშირად აკრიტიკებდა ხოლმე ჩემს თამაშს, რამაც ფეხბურთელად ჩემს ჩამოყალიბებაში დიდი როლი შეასრულა... ევროპაში სათამაშოდ წასვლის შემდეგაც ბევრ საინტერესო ადამიანს შევხვედრივარ...
- ქვეყანა, სადაც იცხოვრებდი...
- საქართველო, უფრო ზუსტად კი - თბილისი...
- საყვარელი წიგნი, რეჟისორი, მუსიკოსი...
- სხვადასხვა ჟანრის ბევრი წიგნი წამიკითხავს, თუმცა, რომელიმეს გამორჩევა გამიჭირდება. რეჟისორებიდან კვენტინ ტარანტინო და გიგა ლორთქიფანიძე მიყვარს. მუსიკოსი... ბევრია, გააჩნია, როგორ ხასიათზე ვარ.
- ფეხბურთის გარდა რა გიყვარს?
- ავტომანქანები, კიდევ - კინოთეატრში წასვლა, შვილებთან თამაში...
- რა გაღიზიანებს ყველაზე მეტად?
- არაფერი. :)
- მატჩი, რომლითაც ყველაზე მეტად ამაყობ...
- 1981 წლის 13 მაისს გამართული ფინალი... მეამაყება, რომ ქართული ფეხბურთის ყველაზე დიდი გამარჯვების მონაწილე მამაჩემიც იყო...
- სოციალური ქსელით ხშირად სარგებლობ?
- ძალიან ხშირად. სოციალური ქსელით მეგობრებს ვეხმიანები. ძალიან სასიამოვნოა, როცა წლობით უნახავი ყოფილი თანაგუნდელი "დაგელაპარაკება"...
- დაახასიათე საკუთარი თავი ერთი სიტყვით...
- მაქსიმალისტი!
- იდეალური ქალი შენთვის არის...
- იდეალური არც ქალია და არც კაცი... ამიტომაც ასე გიპასუხებთ: გვერდით მყავს ჩემი ოცნების ქალი, რომელზეც შეყვარებული ვარ.
- დაასრულე ფრაზა: "მჯერა, რომ"...
- ...ქართველი ვარ.
- შენი საყვარელი სპორტსმენი...
- ყველა ის სპორტსმენი, ვინც ჩვენი ქვეყნის სახელი მთელ მსოფლიოს გააცნო - მნიშვნელობა არა აქვს, სპორტის რომელი სახეობის წარმომადგენელია.
- პერსონაჟი, რომელსაც ყველაზე მეტად გამსგავსებენ...
- მგონი, არავის... :)
- სიმღერა, რომელსაც ყველაზე ხშირად ღიღინებ...
- ამინდსა და განწყობას გააჩნია. :)
- საყვარელი კერძი?
- ქართული სამზარეულოდან - ხინკალი. :)
- ყველაზე უცნაური კითხვა, რაც ჟურნალისტს დაუსვამს.
- მწვრთნელად რობერტ პროსინეჩკი დაგინიშნეს, ამხელა ფეხბურთელი იყო და როგორ გგონია, გათამაშებსო?! :):)