პა-სპორტი - ალექსანდრე იაშვილი
- რაზე ოცნებობდი ბავშვობაში?
- პატარაობიდანვე ფეხბურთელობაზე ვოცნებობდი. თუმცა, მხოლოდ ოცნება საკმარისი არ არის... წარმატების მისაღწევად თავდაუზოგავი შრომა და ბრძოლაა საჭირო. ფეხბურთის გამო ბევრ რაღაცაზე უნდა თქვა უარი!
- ფეხბურთელი რომ არა, ვინ იქნებოდი?
- ალბათ, ექიმი, რადგან ჩემი ოჯახის წევრების უმეტესობა ექიმი იყო... სხვათა შორის, სანამ თბილისში ვცხოვრობდი და ვთამაშობდი, სამედიცინო უნივერსიტეტში მეც ვსწავლობდი.
- ოჯახის წევრები გაგვაცანი...
- მყავს მეუღლე და სამი შვილი... მეტის თქმა საჭიროდ არ მიმაჩნია, რადგან ჩემთვის პირადი ცხოვრება ძალიან მნიშვნელოვანია.
- მეტსახელი თუ გაქვს?
- ბავშვობაში ჩემმა ძმამ "აკუნა" დამიძახა და მას შემდეგ ოჯახის წევრები და ახლო მეგობრები ასე მომმართავენ.
- ვის ან რის გარეშე ვერ წარმოგიდგენია ცხოვრება?
- ოჯახის წევრების, ჩემთვის მნიშვნელოვანი და საყვარელი ადამიანების გარეშე!
- ნივთი, რომლის გარეშეც სახლიდან არ გადიხარ...
- საფულე, საათი და მობილური ტელეფონი.
- ჰოროსკოპის თუ გჯერა?
- ასეთი რაღაცები ოდნავადაც არ მაინტერესებს და არც ყურადღებას ვაქცევ. ისე, ჰოროსკოპით ხან "სასწორი" ვარ, ხანაც - "მორიელი". :):)
- ფრაზა ან სიტყვა, რომელსაც ყველაზე ხშირად ამბობ...
- ასეთი არაფერი მახსენდება. :)
- საყვარელი კერძი და სასმელი...
- ჭამის მხრივ მრავალფეროვნება მიყვარს, ჩემი საყვარელი სასმელი კი გაზიანი წყლით გაზავებული ვაშლის წვენია. :)
- ადამიანი, რომელმაც ყველაზე დიდი გავლენა მოახდინა შენზე...
- რა თქმა უნდა, ჩემი მშობლები!
- ქვეყანა, სადაც იცხოვრებდი...
- საქართველო! ყოველთვის დარწმუნებული ვიყავი, რომ კარიერის დასრულების შემდეგ საცხოვრებლად აუცილებლად სამშობლოში დავბრუნდებოდი...
- საყვარელი მწერალი, რეჟისორი, მუსიკოსი...
- ნოდარ დუმბაძე ჩემი საყვარელი მწერალია, მომღერლებიდან კი ნიაზ დიასამიძეს დავასახელებდი... კინოც ძალიან მიყვარს, ბევრი რეჟისორის ნამუშევრები მომწონს და რომელიმეს გამოყოფა გამიჭირდება.
- ფეხბურთის გარდა რა გიყვარს?
- იყო დრო, ძალიან მომწონდა ავტომანქანები, რომლებიც მაღალ სიჩქარეს ავითარებენ, თუმცა, იმ ასაკიდან უკვე "გამოვედი". :) უკვე ვთქვი, რომ კინო ძალიან მიყვარს...
- რა გაღიზიანებს ყველაზე მეტად?
- უსამართლო და მატყუარა ადამიანები.
- მატჩი, რომლითაც ყველაზე მეტად ამაყობ...
- საბედნიეროდ, ჩემს კარიერაში ასეთი ბევრი ყოფილა, ამიტომ რომელიმეს გამორჩევა გამიჭირდება...
- სოციალური ქსელით ხშირად სარგებლობ?
- რა თქმა უნდა. დღეს სოციალური ქსელის გარეშე წარმოუდგენელია. :)
- დაახასიათე საკუთარი თავი ერთი სიტყვით...
- ერთი სიტყვა საკმარისი არ იქნება. :)
- იდეალური ქალი შენთვის არის...
- დედაჩემი და ჩემი მეუღლე!
- შენი საყვარელი სპორტსმენი.
- მაიკლ ჯორდანი.
- პერსონაჟი, რომელსაც ყველაზე მეტად გამსგავსებენ...
- პერსონაჟის რა გითხრათ, მაგრამ ძალიან მამსგავსებენ მამაჩემს და ეს ყველაზე მეტად მსიამოვნებს!
- დაასრულე ფრაზა: "მჯერა, რომ..."
- ...საბოლოოდ, ყველა იმას მიიღებს, რასაც იმსახურებს!