პა-სპორტი - ლევან ყენია - კვირის პალიტრა

პა-სპორტი - ლევან ყენია

- ფეხბურთელი რომ არა, ვინ იქნებოდი?

- ძნელი სათქმელია... მსახიობის პროფესია ძალიან მომწონს, მაგრამ სათანადო ნიჭი არა მაქვს. :)

- რის გარეშე ვერ წარმოგიდგენია ცხოვრება? -

- მართლმადიდებლობის, ოჯახისა და ფეხბურთის გარეშე!

- ნივთი ან აქსესუარი, რომლის გარეშეც სახლიდან არ გადიხარ...

- მიყვარს და სულ მიკეთია მაჯის საათი. მზის სათვალეც მიყვარს, მაგრამ ძალიან ბევრი გავტეხე და ამ ბოლო დროს აღარ ვიკეთებ. :)

- ფრაზა ან სიტყვა, რომელსაც ყველაზე ხშირად ამბობ...

- სიხშირის რა გითხრათ, მაგრამ ყველაზე მეტად მომწონს გამოთქმები: "არასოდეს თქვა არასოდეს" და "მიზანი ამართლებს საშუალებას"...

- საყვარელი კერძი და სასმელი...

- მიყვარს მჭადი და ლობიო, სასმელებიდან ყველაზე ხშირად წყალს ვსვამ. :)

- ყველაზე ეგზოტიკური საჭმელი, რაც გაგისინჯავს...

- შემწვარი მაჩვის კისერი. :))) და სხვათა შორის, არ მომეწონა. :)

- საქართველოს გარდა სად იცხოვრებდი?

- ძალიან მომწონს მალიორკა. ესპანეთში ყოველ ზაფხულს ჩავდივარ და მალიორკას საცხოვრებლადაც სიამოვნებით ავირჩევდი...

- საყვარელი წიგნი, ფილმი, მუსიკოსი...

- საყვარელი წიგნი წმინდა იოანე სინელის "კიბე". ფილმი "ვანილის ცა", მსახიობი კიანუ რივზი, მართალია, ცოტა არ იყოს, დაბერდა, მაგრამ არა უშავს. :) განწყობას გააჩნია, თორემ ყველანაირ მუსიკას ვუსმენ, ოღონდ უფრო მგზავრობისას, რადგან თამაშის წინ კონცენტრაციას მაკარგვინებს...

- სიმღერა, რომელსაც ყველაზე ხშირად ღიღინებ...

- ბაკურ ბურდულის "ფეთქავს"...

- ფეხბურთის გარდა რა გიყვარს?

- ჩოგბურთი, ავტომანქანები, ფილმების ყურება...

- რა გაღიზიანებს ყველაზე მეტად?

- როცა ტრავმა მაქვს, თავი ჯოჯოხეთში მგონია... სპორტსმენისთვის უმოქმედობა ძალიან ძნელი გადასატანია...

- მატჩი, რომლითაც ყველაზე მეტად ამაყობ...

- რომელიმე თამაშს არ გამოვყოფ. ყველაზე მეტად კი იმით ვამაყობ, რომ ამდენი ტრავმის მიუხედავად, მაინც არ დავნებდი და ისევ ვთამაშობ ფეხბურთს!

- სტადიონის გარდა, ყველაზე ხშირად სად შეიძლება ლევან ყენიას ნახვა?

- თუ სახლში ვარ, ტელევიზორის წინ, დივანზე. :))) საუკეთესო ადგილია ჩემთვის! :)

- შინაური ცხოველი თუ გყავს?

- დიახ, ამჟამად სახლში ორი კუ მყავს. :))))

- სოციალური ქსელით ხშირად სარგებლობ?

- წინათ უფრო ხშირად ვსარგებლობდი. რაც ცოლ-შვილის პატრონი გავხდი, ამის დრო იშვიათად მრჩება. :)

- მეტსახელი თუ გაქვს?

- მეცინება, როცა მახსენდება, რომ ბავშვობაში "ფორვარდას" მეძახდნენ. :)) მეგობრები ყენოს მეძახიან.

- ყველაზე უცნაური ჭორი, რაც საკუთარ თავზე გაგიგია...

- უცნაური არა, მაგრამ შეურაცხმყოფელი ჭორი კი გავიგე: ლევან ყენია გეია და ნარკოტიკს მოიხმარსო. თავიდან ძალიან გავბრაზდი, მერე კი ბევრი ვიხალისე... :)))

- შენი საყვარელი სპორტსმენი...

- ლიონელ მესი - ჩემი აზრით, ყველა დროის საუკეთესო ფეხბურთელია!

- ყველაზე ხშირად გავიწყდება...

- ...კარის დაკეტვა ოთახიდან გასვლისას. :))

- დაასრულე ფრაზა: "მჯერა, რომ..."

- ...მსოფლიო ან ევროპის ჩემპიონატზე ვითამაშებ!

- რომ არ ვყოფილიყავი ლევან ყენია, ვიქნებოდი...

- ჯიმ ქერის პერსონაჟი ფილმიდან "სულელი და კიდევ უფრო სულელი". :))))