ლიგამ ფინალები დააბრუნა
გასული კვირის მიწურულს ქალაქ ნიონში გამართულმა კენჭისყრამ უეფას ჩემპიონთა ლიგის მერვედფინალისტები დააწყვილა.
წყვილების უმრავლესობა მეტ-ნაკლებად თანაბარია, თუმცა, რამდენიმე მათგანი მაინც გამოირჩევა. უპირველესად, ალბათ, მაინც "ინტერი"-"ბაიერნი" - არა გუნდების სიძლიერის, არამედ შარშანდელი ფინალის გამო.
როგორც გახსოვთ, ლიგის წინა ფინალში სწორედ ეს ორი კლუბი დაუპირისპირდა ერთმანეთს და მილიტოს დუბლის წყალობით "ინტერმა" 2:0 გაიმარჯვა. 2006 წლის ფინალს გაიმეორებენ "ბარსელონა" და "არსენალი", ჩემპიონთა თასის ცხრაგზის მფლობელი "რეალი" კი, რომელიც ბოლო ექვსი წელიწადია, მერვედფინალურ ეტაპს არ გასცდენია, ნავსის გატეხას შარშან თავის გამამწარებელ "ლიონთან" შეეცდება.
"ინტერი" - "ბაიერნი"
"ლიონი" - "რეალი"
"მილანი" - "ტოტენჰემი"
"ვალენსია" - "შალკე"
"რომა" - "შახტარი"
"არსენალი" - "ბარსელონა"
"კოპენჰაგენი" - "ჩელსი"
"მარსელი" - "მანჩესტერი"
პირველი მატჩები 15-16 და 22-23 თებერვალს ჩატარდება.