"ბალახსაც და ტალახსაც ერთნაირად "ვჭამთ" - კვირის პალიტრა

"ბალახსაც და ტალახსაც ერთნაირად "ვჭამთ"

ლადომ ბოლოშიც და პირველშიც მესამე გაიტანა

ახალი წლის "აღნიშვნის" შემდეგ, საქართველოში ბევრი ჯერ კიდევ გამოფხიზლებას უნდება, ეროვნული ნაკრებისა და ხაიფას "მაქაბის" ფორვარდმა ლადო დვალიშვილმა კი უკვე ბურთის გატანაც მოასწრო ისრაელის ჩემპიონატში. "მაქაბიმ" 2011 წლის პირველივე მატჩში გაიმარჯვა და თელ-ავიველი სეხნია (ისრაელში კლუბების უმრავლესობას "მაქაბი" ჰქვია) 3:0 დაამარცხა, შეხვედრის ბოლო გოლი კი დვალიშვილის ანგარიშზეა. სხვათა შორის, ხაიფელებმა გასული წლის უკანასკნელი მატჩიც ამ ანგარიშით მოიგეს და მესამე ბურთი მაშინაც ლადომ გაიტანა. აშკარაა, ლადო დვალიშვილს წარმატება 2010 წლის მიწურულიდან გადმოჰყვა და ამის გამოა, რომ ახალ წელთან ერთად გოლიც მივულოცეთ...

- მიხარია, წელი გოლით რომ დავიწყე. თანაც, ძლიერი მეტოქე დავამარცხეთ - დედაქალაქური კლუბი ჩვენი კონკურენტია ჩემპიონობისთვის ბრძოლაში და უკვე 7 ქულით ჩამოვიტოვეთ.

- ისე დაემთხვა, რომ ქვეყნის ჩემპიონატში 2010 წლის ბოლო მატჩიც 3:0 მოიგეთ და მესამე გოლი იმ შეხვედრაშიც შენ გაიტანე...

- ჩემთვის ნაკლებად მნიშვნელოვანია, რა ანგარიშით მოვიგებთ. მთავარია, გავიმარჯვოთ და გოლსაც თუ გავიტან, მთლად უკეთესი. ისე დაემთხვა, რომ წლის ბოლო და პირველ მატჩებში მესამე გოლით შევეწიე საკუთარ კლუბს.

- ერთგვარი რევანშიც გამოვიდა - ისრაელის თასის მეოთხედფინალიდან ხომ სწორედ თელ-ავივის "მაქაბიმ" გამოგთიშათ რამდენიმე დღის წინ...

- ქვეყნის თასის გათამაშება თებერვალში იწყება, ეს კი "ტოტოს თასი" გახლდათ, რომელიც ევროთასის საგზურს არ იძლევა და შესაბამისად, არაპრესტიჟულიც არის. ამიტომაც მწვრთნელმა გუნდის რამდენიმე ლიდერს დასვენების საშუალება მისცა და ვინც ითამაშა, განსაკუთრებულად არც მათ მოუკლავთ თავი სირბილით. "ტოტოს თასს" სერიოზულად არავინ უყურებს და გუნდები, ძირითადად, ახალი მოთამაშეების გამოსაცდელად იყენებენ.

- წლის მიწურულის ორივე გოლი "ქართულ" კლუბებს გაუტანე - ნოემბერში ზურაბ მენთეშაშვილის "ჰაპოელ აშქელონს" და დეკემბერში გაგა ჩხეტიანის "მაქაბი ნათანიას". ესეც დამთხვევაა?

- ქართველი ფეხბურთელების გუნდებთან "განსაკუთრებულად მონდომებული" ვარ (იცინის). როგორც ჩანს, იმ მატჩებს შედარებით კარგ ფორმაში შევხვდი, თორემ ბიჭებს რას ვერჩი? შარშან ისრაელის ჩემპიონატში 16 გოლი გავიტანე, ამ სეზონში, ჯერჯერობით - 6, მაგრამ წინ კიდევ ოცი ტურია და...

- როგორი წელი იყო 2010 ლადო დვალიშვილისთვის?

- საქართველოს ნაკრები ჩემთვის უმნიშვნელოვანესია და რადგან ნაკრებს გამორჩეული წელი ჰქონდა, უკმაყოფილო არც მე ვარ, მიუხედავად იმისა, რომ ბევრი გოლი არ გამიტანია ეროვნული გუნდის მაისურით. თემურ ქეცბაიას დამსახურებაა, რომ ნაკრების ყველა ფეხბურთელი თავდაუზოგავად იბრძვის და ეროვნული სტადიონის მოედანზე ბალახსაც და ტალახსაც ერთნაირად "ვჭამთ"... სამწუხაროდ, ქვეყნის მთავარი სტადიონის მოედანს არც ტალახი აკლდა. იმედია, 2011 გაცილებით მეტ წარმატებას მოგვიტანს.

- ებრაული ახალი წელი ჩვენებურისგან რითი გამოირჩევა?

- ამათი ახალი წელი სექტემბერშია, მაგრამ განსაკუთრებულად არც იმას აღნიშნავენ და ახლა ხომ ისრაელში საერთოდ არ იგრძნობა ეს დღესასწაული, ნაძვის ხესაც კი ვერსად წააწყდები. არც ამინდია "საახალწლო" - თბილა, საშუალოდ, 20-22 გრადუსია... თუმცა, მე და ჩემმა მეგობარმა გიორგი დარასელიამ, რომელიც აქ მწვრთნელად მუშაობს, მაინც აღვნიშნეთ "ქართულად" ახალი წლის დადგომა.